ዋንሳ ቆንጭ 15

ዉርስ ቦሽታ

1ታኒ ሳሎል ሀራ ዳማኔ ፓላ ማላባዝ በኤዛ። ጾስ ዉርስ ካች ፖልዛ ላፑን ቦሽታ አይኬዝ ላፑን ኪታንችታ ታ በኤዛ።

2የይፕ ጉየ ታማር ዋላክንቴዝ ቡርጩኮ አባ ኣዝዛ ባዝ ታ በኤዛ። የ አባይ ጋጻ ዶአ፥ ኤ ምስላኔ ኤ ሱንይ ታይባ ጋሜዝታ ታ በኤዛ። ጾሲ ኡንትስ እንጌዝ ዲ አይኪ ቡርጩኮ አባል ኤቄዛ። 3ኡንቲ ጾስ አይለ ሙሰ ማዝሙራኔ ዱራይ ማዝሙራና Ꮊይ ጋርክ ዬጊ የጼዛ።

«ጎዳዮ፥ ኡባፕ ዎልቃማ ጾሳዮ፥

ነ ኦሳይ ዳማኔ ማላባዚ።

ዎያ ኡባይስ ካታዮ፥

ነ ኦጋይ ጽሎኔ ቱማ።1

4ጌሺ ነ ኣዳ ማቄዝ ግሾስ

ጎዳዮ፥ ኔስ ያሽቶዛይኔ

ነ ሱን ቦንቾዛይ ኦኖ?

ነ ጽሎ ኦሳይ አስ ኡባይስ ቆንጨ ማቄዝ ግሾስ ዎያ

ኡባይ ነ ቲና ይኢ ጎይኖዳ»

ዬጊ የጽዛ።2

5የይፕ ጉየ፥ ሳሎ ዶይንቲ የዝ ማርካት ዱንካነ ማቄዝ ጾስ ኬ ታ በኤዛ።3 6ላፑን ቦሽታ አይኬዝ ላፑን ኪታንችታይ ጾስ ኬይፕ ከዜዝ። ኡንቲ ጌሽኔ ፖጭዝ ሊኖ ማኦ ማኤዛ፤ ፋ ትራል ዎርቀ ዳንጮ ዳንጬዛ። 7ኦይዲ መትታይፕ ፐታይ፥ መናስ የዝ ጾስ ካቺ ኩሜዝ ላፑን ዎርቃ ጹእታ ላፑን ኪታንችታይስ እንጌዛ። 8ጾስ ቦንቻይፐኔ ኤ ዎልቃይፕ ደንዴዛይድ ጾስ ኬይ ጩያር ኩሜዛ። ላፑን ኪታንችታይ አይኬዝ ላፑን ቦሽታይ ፖልንቶድ ሄሎዳይስ ጾስ ካራ ኦንካ ገሎዳይስ ዳንዳኤካያ።4