Waefesu

Lihamba lya Paulo kwa

Waefesu

Ulongolelu wa Waefesu

Lihamba kwa Waefesu liyandikilwi lipindi lilalila paliyandikwa lihamba lya kolosai kumachuva gha isitini badili gha kuweleka Kilisito. Mndumindumi Paulo anguilongela yiwa myandika wa kihitabu haki ni mweni 1:1. Wasomi watangala wangujumila yiwa Paulo ndiwa kayandika pamonga na yiwa liwela ng'ogha na hila ndambu ghaki gha kujambusa hila iwoneka kukihitabu kya Kolosai. Kwaikiva gha nagha ikalasimika kutindila mapinga gha wandu wamkwinila kilisito watangala wa haku mmbwani. Paulo hila hila kalongela yiwa awelili mkihungo lipindi anguyandika lihamba hali. kusula gha 3:1, 4:1, na 6:20. Paulo akamtumila Tikiku kumwanja ghaki awayegheli lihamba wandu wa mapinga yeni kumkwinila Kilisito haku Efesu. Kusula gha 6:21-22

Efesu uwelili mmbwani mkulu nesu na mmbwani wenikuwela na selikali gha Waloma kumlima wa Asia mnung'una. Mmbwani wa Efesu uwelile ungumanyikana nesu kwa kuwela na lighuta lya mulungu mdala wa Kigiliki mwenikukemwa Atemi kusula gha Matendu 19:23-31. Lipinga lya wandu wamkwinila Kilisito lya haku Efesu liwelili na makakala palitumbula na kumwihu likapola Ugubutulo kusula gha 2:1-7.

Paulo angulongela nusu ghaki gha mtumbulo gha lihamba lyaki hali vila Sapanga kawahaghula wandu ghaki na kuwalokola kuhuma kusambi syao kwa kumkwinila Yesu Kilisito. Angulandanisa wandu ghaki wamkwinila handa mhiga na Kilisito ndiwa mutu hilahila mweni ndiwa kitamilo kya lighuta. Kumbandi ghangi kulihamba hali Paulo angulongela vila wandu wakilisito wangupalwa kulama.

Gha Mghati:

Paulo angulongela yiwa mweni kaghani na kuwajambusa wandu wa haku Efesu 1:1-2

Kangi angulongela mkonganiko wa wakwinila na Kilisito 1:3-3:21

Kangi Paulo angulongela vila Wakilisito wangupalwa kulama 4:1-6:20

Mwihu Paulo anguyomola kwa kuwapegha usauli wekaweka wandu wa Efesu. 6:21-24