2Watesalonike

Lihamba lya ivili lya Paulo kwa

Watesaloniki

Ulongulelu

Lihamba lya ivili kwa Watesaloniki iyandikilwi na mndumindumi Paulo ku Sula gha 1:1. Paulo ayandikili lihamba hai lipindi lihupi badili gha lihamba lya mtumbulo kwa Watesaloniki, handa kunu lipindi lya machuva 51 badili gha kuwelekwa Kilisito. Paulo ayandikili lihamba hai kwa lipinga lya wandu Sapanga wamkwinila Kilisito lya haku ku Tesaloniki akiva ku Kolinto, Lipinga alitumbulisili ku lihanja ghaki lya ivili gha kutangasa Habali zya Yesu Kilisito, hai inguwoneka ku Matendu sula gha 17:1-10. Kihitabu kya Matendu kingulongela yiwa lipinga lya wandu wa Sapanga wamkwinila Kilisito lya Tesaloniki liwelili na Wayahudi mayaghani na Wagiliki watangala.

Lipinga lya wandu wa Sapanga wamkwinila kilisito lya Watesaloniki wawelili wakiliwachila lila lipindi lya mwihu na kuhika kwa lihanja lya ivili kwa Kilisito, kwaikiva Paulo ayandikili nesu kulihamba zyaki zyogha ivili kwa Watesalonike. Mandina gha lihamba lya ivili kwa Watesaloniki ingulongela machuwa gha mwihu. Paulo kangi akanisili kuleka upweli. Kila mundu angupalwa kughola lihengu ili apati mulyo ku Sula gha 3:6-10.

Gha mghati:

Paulo angutumbula kuyandika lihamba kwa kujimanyisa mweni na wayaki ku Sula gha 1:1-2.

Angumshukwile Sapanga kwa lipinga lya wandu wa Sapanga wamkwinila Kilisito lya ku Tesaloniki na kuwayupila ku Sula gha 1:3-12.

Paulo angulongela mighalu gha lipindi lya mwihu Ku Sula gha ivili.

Paulo angulongela mighalu gha upweli na vila tungupalwa kughola lihengu ku Sula gha 3:1-15.

Paulo anguyomola kwa kujambusa lipinga lya wandu wa Sapanga wamkwinila Kilisito ku Sula gha 3:16-18.