1Watesalonike

Lihamba lya mtumbulo lya Paulo kwa

Watesalonike

Ulongulelo

Lihamba lya mtumbulo kwa Watesalonike iyandikilwi na mndumindumi Paulo 1:1 na inguwesekana ni lihamba lya mtumbulo ivile Paulo ayandikilili na kuwela mahala gha Bibilia na iyandikililwi kumachuva gha 51 badili gha kuwelekwa kwa Kilisito. Paulo awelili ku Kolinto paayandika lihamba hai kwa lipinga wawela ku Tesalonike wamkwinila Kilisito lipinga hali alitumbulisili kumwanja ghaki gha ivili gha kutangasa Habali gha Yesu hai inguhuma ku Matendu gha Wandumindumi Sula gha 17:1-10. Kihitabu kya Matendu kingulongela yiwa Lipinga lya wandu wamkwinila Kilisito litumbulisilwi na Wayahudi mayaghani na Wagiliki watangala.

Paulo kawesa ng'ogha kuhighala ku Tesaloniki badili gha kuyomola kutumbulisa lipinga lya wandu wamkwinila Kilisito hali hinu kuulongolo ayeghili lihamba hai kuwataya moyu wala wamkwinila Kilisito. lihamba hai imema mavulo ghatangala na inguvula milando itangala gha pamonga ilongela vila Wakilisito wangupalwa kulikala. Paulo alongelelili nesu Habali zya kuhika kwa Kilisito. inguwoneka wayitikila wa lipinga lya ku Tesalonike wahekeleliswi nesu na mavulo hagha. Paulo atumilili Habali zya kuhuya kwa Yesu kuwataya moyu walikali ngalilu gha kumtundamila Sapanga. Hai inguhuma ku Sula gha 5:6-8.

Gha mghati

Paulo angutumbula lihamba hai kwa kuwajambusa lipinga lya kumkwinila Kilisito na kumshukwile Sapanga kwaikiva gha weni hai inguhuma ku Sula gha 1.

Paulo angulongela Habali gha mighalu ghaki na Habali amyeghilili Timoseo hai inguhuma ku Sula 2-3.

Paulo anguwalaghila wakilisito vila wangupalwa kulikala kunu wakimanya yiwa Yesu atehika kangi. Hai inguwoneka ku Sula gha 4:1-5:15.

Paulo anguyomola kwa kuwajambusa kangi na kuwaluwa nesu kila mmonga ahighilisi anguisoma lihamba hai. Hai inguwoneka ku Sula gha 5:16-28.