Skip to content
BibleKenya

Mbula

Ɓal 24

Adyan ngga, lang Bil'am sǝnǝni ama, girî pwasǝbum Yahweh, acemǝnana tsǝki amǝ Isǝrayila bù ka, nyare wario kǝla mana ɗiɗyal ka nǝ̀ nggá ɓangnǝ-ɓangnǝa ɗang. A kún mǝno ka, pǝlǝ ɓamǝsǝi nǝ njar ɓabondo. Lang Bil'am loasǝ mǝsǝì sǝ sǝn amǝ Isǝrayila, aban do a kàttì, arǝ atau malea ka, Bangŋo mala Ɓakuli sulǝo amurí, sǝ ar cau-pasǝlǝe male, ama:

<<Cau-pasǝlǝe mala Bil'am, muna-ɓwabura mala Beyo,

cau mala ɓwa mǝnana mǝsǝi kǝ sǝn agir pepè ka;

yì cau mala ɓwa mǝnana kǝ ok gi Ɓakuli;

yì ɓwa mǝnana kǝ sǝn sǝna nǝban Mǝ'kàrmúr-gulo kat;

yì ɓwa mǝnana kǝ sárǝ́ nǝ múrbumi a nzali, sǝ amǝsǝì na mǝnna ka:

Wu sǝn ɓoarsǝna mala agumli ma'wun, We Yakupu,

nggearǝ abando ma'wun, We Isǝrayila!

À sarǝa kǝla aɓangŋaban,

kǝla aɓaban-girpwala a kún nggeasala,

kǝla agwalan mǝnana Yahweh nǝ̀ pandǝia ka,

kǝla anggun-seda a kún amúr.

Wun wunǝ amǝkà wun ngga wun nǝ̀ lidǝmba kǝla ɓaban-girpwala a myalmúr;

Murǝm malea nǝ̀ dumnǝ gulo mana kúti gulo mala Agag ka;

sǝ domurǝm malea ka nǝ̀ kum loasǝ́bân a kuli.

Ɓakuli pusǝia, à purî nzali Masar;

yia ka, à ndanǝ rǝcandǝa mala ndwakan;

à nǝ̀ lika anzali mǝnana aɓia-mǝbura na ka;

à nǝ̀ arki amuia raka-rakas;

à nǝ̀ tāki aɓia-mǝbura nǝ amundi malea.

Kǝla im, à nǝ̀ ɓun amur ankūnǝia aban nongŋo,

kǝla nggeàɓwaná-im, yana ɓwe kārǝa nǝ zorǝia?

Aɓwana mana à tsǝka wun bù ka, ɓǝà kum tsǝkbu,

sǝ aɓwana mana à sú wun ngga, ɓǝà kum suban!>>

Kara bumlulla mala Balak earbǝsa arǝ Bil'am. Balak wal abui aɓalǝarǝia, sǝ banggi Bil'am ama, <<Ən tunǝo nǝma, wu sukàm aɓiam-mǝbura, sǝ ndya ka a tsǝ́ngŋǝ́niabu kusǝ tàrú mǝnia. Ado ka, nying ban mǝnia ka tsuk-tsuk, o a là! Ən bang nǝma mǝ nǝ mbweo pepè, sǝama Yahweh tsǝ̀ngŋǝ̀nó a ɗwanyini mbweban mana ɓǝ́ awu nǝ kum ngga.>>

Pǝlǝa Bil'am pè Balak eare ama, <<Ən bangmì amǝ'na-túrbân mana a túriá abanam ngga re? Ən nana nǝma, ko ɓǝ̀ Balak nǝ̀ pam palta male, lumsǝ nǝ bolo-azǝrfa andǝ bolo-njengǝlan ngga, pà mǝ nǝ pàk ɓè kǝgir mala ɓamúràm, ko mǝɓoarne ko mǝɓane, mǝnana yàlî nzongcau mala Yahweh ka ɗàng; Dumǝnam púp, mǝ nǝ bang kǝ gir mǝnana Yahweh kǝ na ka. Adyan ngga, mǝ ndya mǝ nǝ nyare, mǝ nǝ o aban aɓwana mem. Sǝama, came mǝ nunkiro amur gir mǝnana aɓwana mǝnia, nǝ̀ yia pàkkî aɓwana mô arǝ apwari mana à kǝ yiu ka.>>

Inea cau-pasǝlǝe mala Bil'am nǝban Ɓakuli

Pǝlǝa Bil'am ar cau-pasǝlǝe male ama:

<<Cau-pasǝlǝe mala Bil'am, muna-ɓwabura mala Beyo,

cau mala ɓwa mǝnana mǝsǝi kǝ sǝn agir pepè ka;

yì cau mala ɓwa mǝnana kǝ ok gi Ɓakuli,

yì ɓwa mǝnana ndanǝ súrǝ̀gir nǝban Mǝ'Karban Kat ka,

yì ɓwa mǝnana kǝ kum sǝna nǝban Mǝ'rǝcandǝa kat ka;

yì ɓwa mǝnana kǝ sárǝ́ nǝ múrbumi a nzali, sǝ amǝsǝì na mǝnna ka:

Ən nggǝ sǝni, sǝama pà ado ɗàng;

Ən nggǝ pelǝkì, sǝama pà abanam tù ɗàng.

Nlero nǝ̀ puro aɓa Yakupu;

gara-murǝm nǝ̀ yia lo aɓa Isǝrayila,

sǝ nǝ̀ yia arki akundǝmba amǝ'Mowap,

yì ankpoulo-ɓamur amuna-burana mala Shet.

Edom ngga, à nǝ̀ lì nǝ lwa;

Seyir, ɓimǝbura malea ka, à nǝ̀ lì nǝ lwa,

sǝama Isǝrayila ka, nǝ̀ gulo nǝ̀ dumnǝ rǝcandǝa.

Mǝ'yálmúrû nǝ̀ pur aɓa Yakupu,

sǝ nǝ̀ yia kiɗiki acili aɓwana mala nggea-lê.>>

Masǝlǝata cau-pasǝlǝe mala Bil'am

Pǝlǝa Bil'am sǝn amǝ Amalek, sǝ ar cau-pasǝlǝe male ama:

<<Amalek ka, nda mǝdǝmba aɓalǝ anzali,

sǝama, à nǝ̀ kiɗiki kat a masǝlǝate.>>

Pǝlǝa sǝn amǝ Ken, sǝ ar cau male ama:

<<Bando ma'wun ngga, nda aɓata gbasha,

sǝ mpù ma'wun ngga, à kwakite aɓa tali;

kat andǝ amani ka, wun amǝ Ken ngga, à nǝ̀ kiɗiki wun,

lang Asshur nǝ̀ yia bwal wun aguro ka.>>

Pǝlǝa nyare ar cau-pasǝlǝe male ama:

<<Oi, sǝ yana nǝ̀ auwa, lang Ɓakuli nǝ̀ pàk mǝnia ka?

Awaru-mur nǝ̀ puro arǝ akunto mala Kitim;

à nǝ̀ yia gandǝ Asshur andǝ Eba,

sǝ yià gbal ka, à nǝ̀ kìɗìkya.>>

Pǝlǝa Bil'am lo sǝ nyare a là, sǝ Balak ka o a o male.

Mbula. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.