Mbula
2 Amurǝm 9
À ɗārǝ́ Jehu ɓǝ̀ duk murǝm a Isǝrayila
Adyan ngga Elisha mǝɓangnǝa tunǝ ɓwa mwashat a nggǝsan mala amǝ'ɓangnǝa sǝ ne wi ama, <<Kàr kún nggea-daura mô, kùrrì a taɓuno, sǝ wu twal dù mùrú olif mǝnia ka a buo, sǝ wu o a Ramot Gilǝyat. Lang a bwalǝna ka, alta Jehu muna-ɓwabura mala Jehoshafat, mǝkà Nimshi. Pusǝì zak aɓalǝ aɓî, sǝ wu kyan nǝi aɓa ɓè kurǝm ɓaɓalǝu. Sǝ wu twal mùrú mǝnana aɓa dù ka, solǝì wi a ɓamuri, sǝ wu bang ama, <Mǝnia ka nda cau mǝnana Yahweh bang ngga: Ən ɗārǝno, a nda murǝm amúr Isǝrayila.> Anzǝm mǝno ka, mǝn kunkurǝm sǝ wu ɓang akaurǝa wu o; kǝa dǝndi ɗàng.>>
Pǝlǝa lagga mǝno, yì lagga mǝɓangnǝa ka wari a Ramot Gilǝyat. Sǝ lang bingŋǝ́nà ka, kya kum amǝ'sàrǝ̀ban-lwa na ban do atārǝia. Sǝ bang ama, <<Mǝ ndanǝ cau a bano, mǝ'sàrǝ̀ban.>> Sǝ Jehu ɗì ama, <<Aban yan mwashat atà sǝm?>> Sǝ laggè bang ama, <<Abano, we mǝ'sàrǝ̀ban.>> Pǝlǝa Jehu lo kútí a ɓala. Sǝ lagga mǝno solǝ mùruî a ɓamur Jehu, sǝ ne wi ama, <<Mǝnia ka nda cau mǝnana Yahweh, yì Ɓakuli mala Isǝrayila na ka: Ən ɗārǝó, a nda murǝm amúr aɓwana mala Yahweh, amúr Isǝrayila. Awu nǝ kiɗiki ɓala mala Ahap ɓwamǝgule mò, ace mǝnana mǝ mbwegìr-akúnì nkila mala aguro mem amǝ'ɓangnǝa, andǝ nkila mala aguro mala Yahweh mǝnana kat Jezebel sukki ka. Ɓala mala Ahap puppup ka, dumǝna púp nǝ̀ kìɗìkì, sǝ mǝ nǝ twalta koya muna-ɓwabura mǝnana pur a nkila mala Ahap ka, a Isǝrayila, ko guro, ko mǝnana nda atàrǝì ka. Sǝ mǝ nǝ kiɗiki ɓala mala Ahap kǝla mǝnana ǝn kiɗiki ɓala mala Jerobuam muna-ɓwabura mala Nebat, andǝ mala Ba'asha muna-ɓwabura mala Ahija ka. Sǝ anvwa nǝ̀ shak nyam Jezebel amur nzali a Jezǝril, sǝ kǝɓwa pà nǝ̀ tsǝk-luí ɗàng.>> Pǝlǝa laggè mǝn kunkurǝm, ɓangŋa o akaurǝa.
Lang Jehu pur aban amǝ'sàrǝ̀ban mala ɓwamǝgule male ka, à ɗi ama, <<Nda jam le? Palang sǝ mǝɓanggya man yiu a bano?>> Sǝ earia wia ama, <<Wu súrǝ́nà rǝ ɓwê andǝ acau male.>> Sǝ à ne wi ama, <<Mǝno nda mǝsǝcau ɗang; bangga sǝm ado.>> Pǝlǝa Jehu nea wia ama, <<Mǝnia ka nda gìr mǝnana banggam ngga, ama, <Yahweh bang ama, Ən ɗārǝo, a nda murǝm amúr Isǝrayila.> >> Pǝlǝa koya ɓwabura ateà ka, swár nggea-daura male akaurǝa sǝ sárǝí a kusǝ Jehu amúr aban-eauwe. À twang njawe, sǝ à loasǝ gia ama, <<Jehu ka murǝma!>>
Jehu wal-lú Joram andǝ Ahaziya
(Adyan ngga Murǝm Joram andǝ amǝ'lwa mala Isǝrayila kat ka, à warina a Ramot Gilǝyat ace mgbàllì amǝ'lwa mala Hazayel murǝm Suriya arǝ yinǝ lwa a Ramot Gilǝyat. Sǝama Murǝm Joram ngga, à tsǝki wi anpenye a munǝo mǝno andǝ Hazayel murǝm Suriya ka, sǝ nyare a Jezǝril ace ká sonzǝ anpenye mǝnana amǝ'Suriya tsǝki wi ka.) Nda Jehu muna-ɓwabura mala Jehoshafat, mǝkà Nimshi kùrkún amur Joram nǝ̀ wal-luí ka. Banggi aɓî amǝ'sàrǝ̀ban-lwa ama, <<Ɓǝ̀ mǝnia nda ɗenyicau ma'wun ngga, kǝɓwa ɓǝkǝa swár zàng ɓǝ̀ purî ɓá nggea-là ace ká bangce a Jezǝril ɗàng.>> Pǝlǝa Jehu lo eau aɓa waru-pǝr male, sǝ o a Jezǝril, acemǝnana Joram na kam aban nongŋo nǝ rǝkwana. Sǝ Ahaziya murǝm Yahuda gbal ka, nda kam abanì, acemǝnana angŋa-dǝmba warina ace sǝn Joram ngga.
Adyan ngga mǝ'sǝn múr nggea-là ka nda ban came amúr ndà-kulí mǝnana a Jezǝril ka, sǝ sǝn Jehu andǝ amǝtè aban yiu, sǝ loasǝ gì bang ama, <<Ən nggǝ sǝn nggǝsan mala aburana aban yiu.>> Sǝ Joram tasǝ cau ama, <<Wu twal mǝpǝr mwashat, wu túrí ɓǝ̀ kya kumia, sǝ ɓǝ̀ ɗia ama, <Wu yiu aɓa rǝpwala le?> >>
Nda ɓè ɓwabura a nzǝm pǝr wario kya kumia, sǝ bang ama, <<Murǝm na ama, <Wu yiu aɓa rǝpwala le?> >> Sǝ Jehu ear ama, <<Mana oasǝo arǝ dorǝpwala? Pǝlǝa atàm, sǝ wu yiu.>> Sǝ mǝ'sǝn múr nggea-là nyesǝ cau ama, <<Mǝ'na-túrbân bingŋǝna bania, sǝama pà aban nyare ɗang.>>
Pǝlǝa murǝm tasǝ ɓaria mǝpǝr, mǝnana wari abania sǝ banggia wia ama, <<Mǝnia ka nda cau mǝnana murǝm na ka, <Wu yiu aɓa rǝpwala le?> >> Sǝ Jehu pa eare ama, <<Mana oasǝo arǝ dorǝpwala? Pǝlǝa atàm, sǝ wu yiu.>>
Ɗǝm ngga mǝ'sǝn múr nggea-là nyesǝ cau ama, <<Bingŋǝna bania, sǝama pà aban nyare ɗang. Ɓwa mǝnana kǝ kok waru-pǝr a dǝmba ka, kǝ koe kǝla koě mala Jehu muna-ɓwabura mala Nimshi; kǝ koe wak.>>
Joram na ama, <<Wu kùrâm waru-pǝr mem arǝ apǝr.>> Lang à kùrna waru-pǝr arǝ apǝr ka, Murǝm Joram mala Isǝrayila andǝ Murǝm Ahaziya mala Yahuda puro, koyan ngga aɓa waru-pǝr male, ace ká je andǝ Jehu, sǝ à kya kum Jehu a ban nzali ɓaban mǝnana ɗiɗyal mala Nabot ɓwa'Jezǝril na ka. Sǝ lang Joram sǝn Jehu ka, ɗì ama, <<A yiu aɓa rǝpwala le, Jehu?>> Pǝlǝa earî wi ama, <<Ya dorǝpwala nǝ̀ pàk kàm mǝnana peri atà ankúl andǝ pakkiagir monzǝo mala nggo Jezebel ak koya ban ngga?>> Kara Joram wuli múr waru-pǝr male, ace ɓangŋa nǝ̀ o akaurǝa, sǝ kǝ ne Ahaziya ama, <<Ɓosǝkiban na, Ahaziya!>> Sǝ Jehu nun nta male nǝ rǝcandǝa male kat, ta Joram a nzǝmi nǝ mundi, kya tusǝ dunkile. Joram swárô kpa aɓa waru-pǝr male. Jehu banggi Bitkar, mǝ'pakkî-gbasha ama, <<Twali túrí aɓa nzali ɓaban mǝnana ɗiɗyal mala Nabot ɓwa'Jezǝril na ka. Ɓǝ̀ ɓalǝo kasǝa ama mim sǝnǝ we ka, sǝm nda mǝnana sǝm nda ban gya a nzǝm apǝr atà tárrí Ahap, lang Yahweh bang ɓashi mǝnia amurí ka ama: <Kǝla mǝnana mbak-kàngkàng ǝn sǝn nkila mala Nabot andǝ mala amuni yilung ngga, mǝ nǝ mbwekô-akúní gìr mǝnana a pak ka, a mǝnia yì nzali ɓaban ngga.> Ado ka, twali túrí amúr nzalî kǝla mana cau mala Yahweh na ka.>>
Lang Ahaziya murǝm Yahuda sǝn gìr mǝnana kumban ngga, ɓangŋa dǝshi Bet-Hagan. Sǝ Jehu pǝrte kǝ bang ama, <<Ɓǝà tè gbal.>> Pǝlǝa à tè aɓa waru-pǝr male amúr njar eauwe mala ɓangŋaban Gur, mǝnana nda a nkanggari Ibǝliyam ngga. Sǝ Ahaziya ɓangŋa akaurǝa o a Megido, sǝ kya wû kàm. Aguro male twal luí aɓa waru-pǝr, à umnǝi a Urǝshalima, sǝ à kya tsǝì a ɓembe-ɓa-tali male atà akê aɓa nggea-là mala Dauda.
Nda aɓa lum-nong-mwashatia pǝlǝa mala do-bunomurǝm mala Joram muna-ɓwabura mala Ahap, sǝ Ahaziya duk murǝm amúr Yahuda.
Jehu wal-lú Jezebel
Pǝlǝa Jehu wari a Jezǝril. Lang Jezebel okce gìr mǝnana kumban ngga, hasǝki agir a mǝsǝi, sǝ gilǝki nyang-múrí, pǝlǝa came kǝ sǝnban a mǝsǝkurǝm. Lang Jehu nǝ̀ kùtí a kunɓala ka, Jezebel ɗì ama, <<A yiu aɓa rǝpwala le, 1Zǝmri mǝ'wal-lú ɓwamǝgule male?>> Sǝ Jehu loasǝ ɓamǝsǝi sǝnban nǝban mǝsǝkurǝm, sǝ bang ama, <<Yana kana nda atàm? Yana?>> Aɓea abaran lǝmdǝ ɓamǝsǝia a mǝsǝkurǝm, à sǝni. Jehu bang ama, <<Wu ramtè ɓǝ̀ yi kpa a nzali!>> Nda à ramtè yi kpa a nzali, sǝ apǝr andǝ waru-pǝr mala Jehu gya amurí à parki, nkile takkya arǝ bumkurǝm sǝ arǝ apǝr.
Jehu pǝlǝa kutio kya lili sǝ nu. Sǝ bang ama, <<Wu twal lú man yì suna ɓwama ka, sǝ wu kya tsǝî, acemǝnana yì ka ɓoarnsarile murǝm na ka.>> Sǝama lang à wario à nǝ̀ nggá tsǝì ka, à kya kum kǝ bare rǝì ɗàng, shekǝ nkpoula ɓamuri andǝ amu akusǝi andǝ abui. Pǝlǝa à nyare à kya ne Jehu. Pǝlǝa bang ama, <<Cau mala Yahweh mǝnana bangŋi nǝ kún guro male Iliya, ɓwa'Tishbe ka yi lúmsǝ̀nà. Bang ama: <Aɓa mǝnia yì nzali ɓaban a Jezǝril ka, anvwa nǝ̀ shak nyam Jezebel, sǝ lú Jezebel ka dumǝna púp nǝ̀ duk kǝla gìgí amur nzali ɓaban mǝnana a Jezǝril ka. Kǝɓwa pà nǝ̀ gandǝ na ama: Mǝnia ka nda Jezebel ka> ɗang.>>
Source notes (1)
- Footnote Zǝmri: Cau-sangban na arǝ Jehu ace kánǝ ɗenyicau mala arǝ Zǝmri mǝnana ak bunomurǝm sǝ yálmúrû male ka mala anonggio tongno-nong-ɓari na kutǝl; ɓalli aɓa: 1Amur 16:8-20.
Mbula. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.