Mbula
1 Amurǝm 4
Amǝgulo mala Solomon
Adyan ngga, Solomon nda murǝm amur Isǝrayila puppup. Sǝ amǝnia ka, à nda ka amǝgulo male:
Azariya muna-ɓwabura mala Zadok ka nda pǝris;
Elihoref andǝ Ahija amuna-burana mala Shisha ka, à nda ka amǝ'gilǝgir;
Jehoshafat muna-ɓwabura mala Ahilud nda mǝ'twalcau aɓa malǝmce;
Benaya muna-ɓwabura mala Jehoyada nda mǝ'sàrǝ̀ban mala amǝ'lwa;
Zadok andǝ Abiyata ka, à nda ka apǝris;
Azariya muna-ɓwabura mala Natan ngga, nda ɓwamǝgule mala amǝgulo;
Zabud muna-ɓwabura mala Natan ngga, nda pǝris, sǝ nda gyajam mala murǝm;
Ahishar nda ɓwamǝgule mala ɓala-murǝm;
Adoniram muna-ɓwabura mala Abda nda mǝɗenyi nǝ túró-púp.
Solomon ngga ndanǝ anggwamna lum-nong-ɓari amur Isǝrayila kat, mǝnana à kǝ yinǝi wi nǝ girlina aceì andǝ ɓala-murǝm ngga. Koya nggwamna ka, kǝ yinǝ girlina mala zongŋo mwashat aɓa pǝlǝa. Amǝnia ka, à nda ka alullǝ anggwamnê:
Ben-Hur, a bu-nzali múr ankono mala Ifǝrem;
Ben-Deker, a nggea-là Makaz, andǝ Sha'albin andǝ Bet-Shemesh, andǝ Elon-Bet-Hanan;
Ben-Hesed, a nggea-là Arubbot (Soko andǝ anzali mala Hefer kat ka, à nda aɓate.)
Ben-Abinadap, a Nafat-Dor (yì na al Tafat ɓoarnsarile Solomon ngga);
Ba'ana muna-ɓwabura mala Ahilud, a Ta'anak andǝ Megiddo, andǝ Bet-Shan mǝnana nda a nkanggari Zaretan ɓǝ a sùlǝî Jezǝril ka, sǝ lo a Bet-Shan aban ká Abel-Mehola, sǝ sárǝ́ aban ká Jokmeyam;
Ben-Geber, a Ramot Gilǝyat (alá mala Jayir muna-ɓwabura mala Manasa, mǝnana à nda a Gilǝyat, andǝ bareban mala Argop mǝnana nda a Bashan ngga, anggea-là mǝgulke lumi-tongno-nong-mwashat (60) mana à ndanǝ asheran sǝ akún nggea-lê ka, à pea nǝ bolo-bángŋá ka, à nda aɓate.)
Ahinadap muna-ɓwabura mala Iddo, a Mahanayim.
Ahima'az (mǝnana al Basemat ɓoarnsarile Solomon ngga), a Naftali;
Ba'ana muna-ɓwabura mala Hushai, a Asha andǝ Beyalot;
Jehoshafat muna-ɓwabura mala Paruwa, a Isaka;
Shimeyi muna-ɓwabura mala Ela, a Benjami;
Geber muna-ɓwabura mala Uri, a Gilǝyat (yì nzali mala Sihon murǝm mala amǝ'Amor andǝ nzali mala Og murǝm mala Bashan); sǝ yì ka nda mǝgulo nǝmurǝi mǝnana nda amur nzalinì ka.
Gǝna andǝ sǝlǝe mala Solomon
Aɓwana mala Yahuda andǝ Isǝrayila lakki kǝ̀rkǝ́r kǝla 1mǝsǝsala a kún nggeamùr; à lili, à nu sǝ banɓoaria wia. 2Sǝ Solomon yálmúr adomurǝm kat tite a Nggeasala Yiufǝretis aban ká nzali mala amǝ'Filisti, sǝ sárǝ́ aban ká kún nzong-nzali mala amǝ'Masar. 3Amǝnia yì anzali ka, à kǝ yinǝì Solomon boalo-cemi, sǝ à kǝ pàkki wi túró ba do-yilǝmu male kat.
Girlina mala Solomon a pwari mwashat ka, buku lumi-tàrú (30) mala muku mǝssa-alkama na andǝ buku lumi-tongno-nong-mwashat (60) mala muku mǝssa, andǝ andá mǝnana à lǝsǝia a ɓala ka lum (10), andǝ andá mǝnana à lǝsǝia a bondo ka lumi-ɓari (20), andǝ anzur andǝ ambul gbǝman-mwashat (100), sǝ ambamba andǝ aɓwacembe andǝ alùrú, sǝ anggu mǝnyangge. Solomon yálmúr bareban kat andǝ amurǝma mǝnana a njar-nzali mala Yiufǝretis ka, twal a Tifsa aban ká Gaza, sǝ do aɓa rǝpwala andǝ anzali mǝnana a nkanggari ka. Aɓa do-yilǝmu mala Solomon kat ka Yahuda andǝ Isǝrayila duk jam, twal a Dan aban ká Biyasheba. Koya ɓala ka ndanǝ male yì anggun-anap andǝ anggun-vwari.
Solomon ndanǝ andà-ka-pǝr á-lumi-ine (40,000) ace apǝr male mǝnana à kǝ nun awaru-pǝr male ka, andǝ amǝpǝr á-lum-nong-ɓari (12,000).
Koya nggwamna ka, ndanǝ zongŋo male mǝnana kǝ yinǝi Murǝm Solomon girlina sǝ ace aɓwana mǝnana à kǝ̀ li girlina atārǝia andǝa murǝm ngga. À yinǝ gir mǝnana kat murǝm earkiyice ka. Ɗǝm ngga, à yinǝ mǝssa-bálì andǝ bondo ace apǝr andǝ apǝr-lwa a ban mǝnana à earce ɓǝà kyan nǝia kam ngga; koyan ngga pè kǝla mǝnana à tsǝki wi ka.
Ɓakuli pè Solomon sǝlǝe mǝgule andǝ bwaltagir mǝlime, andǝ súrǝè, kǝla làkkì mala mǝsǝsala a kún nggeamùr. Sǝlǝe mala Solomon kútì sǝlǝe mala aɓwana mǝnana kat a takuli ka, andǝ sǝlǝe mala nzali Masar kat. Solomon kútì koya ɓwa ka nǝ sǝlǝe; sǝlǝe male kútì mala Etan ɓwa Ezǝra, andǝ Heman, andǝ Kalkol, andǝ Darda, amuna-burana mala Mahol. Lullǝì mesǝe aɓalǝ anzali mǝnana kat à gumbǝliban ngga. Solomon bang acau 4pasǝlǝe á-tàrú (3,000) sǝ tsǝk 5anggyal á-mwashat nǝ mǝsǝi tongno (1,005). Bangcau amur agirpwala, tite nǝ anggun-Seda mala Lebano yi sulǝo amur bondo hissop mǝnana kǝ to arǝ sheran ngga. Ɗǝm ngga, bangcau amur agirkusǝu, andǝ anyal, andǝ agir-nzali, andǝ anji. Aɓwana mala anzali kat yiu ace ok sǝlǝe mala Solomon; à purkio arǝ abân mala amurǝma kat mala ɓanza mǝnana à ok cau mala sǝlǝe mala Solomon ngga.
Source notes (5)
- Footnote Ɓalli gbal aɓa: Tite 22:17.
- Footnote Ɓalli gbal aɓa: Tite 15:18; 2Acau 9:26.
- Footnote Ɓalli gbal aɓa Ang 68:29; 72:10-11.
- Footnote Ɓalli gbal aɓa Pas 1:1; Ham 12:9.
- Footnote Ɓalli gbal aɓa Ear 1:1.
Mbula. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.