Mbula
1 Amurǝm 13
Ɓè mǝɓangnǝa mala Ɓakuli soa Jerobuam
Zuku ka, ɓè ɓwa mala Ɓakuli mǝnana Yahweh tasǝì ka, puro a bu-nzali Yahuda sǝ yiu a Betel. Lang bingŋǝna ka, yi kum Jerobuam na aban came a nkanggari gyangŋan aɓa gilǝrǝu nǝ̀ pà ɓoro mala loasǝ yele. Pǝlǝa ɓwa mala Ɓakuli loasǝ gì kpǝm bangcau aɓa rǝcandǝa mala cau mǝnana Yahweh pe wi amur gyangŋan man ngga ama, <<We gyangŋan, gyangŋan! Mǝnia ka nda cau mǝnana Yahweh bang ngga, <À nǝ̀ ɓǝl muna-ɓwabura a ɓala mala Dauda, lùllǝì ama Josiya. Apǝris mala amgbangban-peri atà ankúl mǝnana à kǝ yiu kani ace loasǝ yele amuro ka, muna-ɓwabura man nǝ̀ yia pwangi-myalia kǝla gìr'nkila amuro, sǝ à nǝ̀ pisǝ amú ɓwapǝndǝa amuro.> >>1 Pǝlǝa na ɗǝm a mǝno yì pwari ka ama, <<Mǝnia ka nda gìr mǝnana nǝ̀ lǝmdǝa ama Yahweh nana cau mǝnia ka: <Sǝni, gyangŋan mǝnia nǝ̀ ar gbas, sǝ tú mǝnana amurí ka nǝ̀ solǝo.> >>
Lang Murǝm Jerobuam ok cau mala ɓwa mala Ɓakuli, mǝnana ne amur gyangŋan a Betel ka, Jerobuam lǝmdǝ muna-bui arǝì nǝban gyangŋan, sǝ banggi aguro male ama, <<Wu gbami ɓwabura mǝna ka!>> Sǝ buì mǝnana lǝmdǝi arǝ ɓwa mala Ɓakuli ka shì kwangong, gandǝ nyesǝi ɗǝm a rǝì ɗàng. Gyangŋan gau gbas, sǝ tú mǝnana amurí ka sukki a nzali, kǝla mǝnana cau mala ɓwa mala Ɓakuli lǝmdǝ ama Yahweh bangŋǝ́nà ama gìrnî nǝ̀ kumban ngga.
Pǝlǝa ɓuaki arǝ ɓwa mala Ɓakuli ama, <<Ida, pakhiwi acem, zǝmbî Yahweh Ɓakuli mô ɓǝ̀ sǝn'mǝsǝswatǝr mem, ɓǝ̀ nyesǝâm buam abanì.>> Sǝ ɓwa mala Ɓakuli pakhiwi aban Yahweh, sǝ murǝm ngga à nyesǝî buì a banì sǝ nyare pa kǝla mana ɗiɗyal ka.
Pǝlǝa ne ɓwa mala Ɓakuli ama, <<Yiu atàm a ɓala wu li girlina, sǝ ɓǝn pô tangnakusǝu.>> Sǝ ɓwa mala Ɓakuli ka ear ama, <<Ko ɓǝ̀ awu nǝ pàm gauwa-tsùrú mala ɓala mò ka, pà mǝ nǝ ká atò ɗàng, sǝ pà mǝ nǝ li girlina ko mǝ nǝ nu kǝgir kani ɗang, acemǝnana Yahweh tsǝkam nzongcau ama, mǝ nggá li kǝgir ko mǝ nu kǝgir ɗàng, sǝ mǝ nggá nyar nǝ njargula mǝnana ǝn wari nǝi ka ɗàng.>> Nda nyare o nǝ ɓè njargula ka, kpata njargula mǝnana yiu nǝi a Betel ka ɗàng.
A bàkú mǝno ka ɓè jamgula mǝɓangnǝa na kam nǝdo a Betel. Amuna-burana male yiu abani sǝ à banggi wi cau mala gìr mǝnana kat ɓwa mala Ɓakuli pak a pwari mǝno ka, andǝ cau mǝnana banggi murǝm ngga. Tárrià ɗia ama, <<Nǝ ya njargula sǝ kàra?>> Sǝ amuna-burana male lǝmdǝi wi njar mǝnana ɓwa mala Ɓakuli mǝnana pùr a Yahuda ka, um nǝi ka. Sǝ banggi amuna-burana male ama, <<Wu tsǝkam buno-nzǝm a nzǝm mǝdambǝriso.>> Pǝlǝa à tsǝki wi buno-nzǝm a nzǝm mǝdambǝriso, sǝ eau amurí. Sǝ o atà ɓwa mala Ɓakuli, kya kumi aban do a tǝr nggun mǝgule. Sǝ ɗì ama, <<A nda ɓwa mala Ɓakuli mǝnana pùr a Yahuda ka le?>> Sǝ Ɓwa mala Ɓakuli eari wi ama, <<Mǝ nda.>> Sǝ jamgula mǝɓangnǝa banggi wi ama, <<Yiu atàm a ɓala, wu li girlina.>> Ɓwa mala Ɓakuli banggi wi ama, <<Pà mǝ nǝ gandǝ nyar atò, ko mǝ nǝ kútí a ɓala mò ɗàng. Sǝ pà mǝ nǝ li girlina ko mǝ nǝ nu kǝgir atò a ban mǝnia ka ɗàng, acemǝnana cau mala Yahweh bangŋǝ́nàm ama: <A pà wunǝ lì kǝgir ko awu nǝ nu kǝgir a ban mǝno ka ɗàng, sǝ a pà wunǝ nyar nǝ njargula mǝnana a yiu nǝi ka ɗàng.> >>
Sǝ jamgula mǝɓangnǝa banggi wi ama, <<Mim gbal ka, mǝ nda mǝɓangnǝa kǝla we. Yahweh tasǝ cau male nǝ kún mǝturonjar male ɓǝ̀ banggam ama mǝ yinǝ we a ɓala mem, wu li girlina sǝ wu nu gìr atàm.>> Sǝama nyir na ne wi ka. Nda ɓwa mala Ɓakuli nyar andǝi, sǝ à kya li girlina, à nu gìr a ɓala male ka. Lang à nda piu aban do a ban-li ka, cau mala Yahweh yiu aban mǝnia yì mǝɓangnǝa mǝnana nyesǝ ɓwa mala Ɓakuli ɓǝ̀ nyar ka; sǝ loasǝ gì bàng-bàng ne ɓwa mala Ɓakuli mǝnana pùr a Yahuda ka ama, <<Mǝnia ka nda cau mala Yahweh: <A mgbinacau arǝ cau mala Yahweh Ɓakuli mô, sǝ a kpata nzongcau male ɗàng; a nyarna, a lina girlina sǝ a nuna gìr a ban mǝnana ǝn pǝro arǝì ka; acemani ka, à pà nǝ̀ tsǝk-luio a ɓembe-ɓa-tali mala akeo ɗàng.> >>
Anzǝm mǝnana ɓwa mala Ɓakuli lina sǝ nuna gìr ka, mǝɓangnǝa mǝnana nyesǝi yinǝi ka tsǝki wi buno-nzǝm amur mǝdambǝriso. Sǝ lang nda njar aban o ka, ɓè im kumi sǝ wal-luí, sǝ nying luí aban nongŋo amur njargula, sǝ mǝdambǝriso andǝ im kǝm ngga à nda aban came a nkanggari. Aɓea amǝgya-kutio sǝn luí aban nongŋo amur njargula andǝ im aban came a nkanggari, sǝ à warinǝ bǝsacê a là mǝnana yì jamgula mǝɓangnǝa duk kam ngga. Lang mǝɓangnǝa mǝnana kya nyesǝi a njar ok cê ka na ama, <<Ɓwa mala Ɓakuli mǝnana mgbicau arǝ cau mala Yahweh ka nda. Yahweh tasǝni a ɓabu im, sǝ im sangini, walna-luí kǝla mǝnana cau mala Yahweh bang ngga.>> Sǝ banggi amuna-burana male ama ɓǝà tsǝki wi buno-nzǝm amur mǝdambǝriso, sǝ à pàk anggo. Pǝlǝa lo wario sǝ kya kum luí aban nongŋo amur njargula, andǝ mǝdambǝriso andǝ im aban came a nkanggari; im ngga shè ɗàng sǝ je mǝdambǝriso gbal ɗàng. Nda jamgula mǝɓangnǝa imsǝ lú ɓwa mala Ɓakuli sǝ nongsǝi a nzǝm mǝdambǝrisonî, sǝ nyesǝi a là male yì jamgula mǝɓangnǝa, ace ɓuě, sǝ ace tsǝk-luí. Nongsǝ luí a ɓembe-ɓa-tali male sǝ à ɓuè ama, <<Oi, mǝ'eambam!>> Anzǝm mǝnana tsǝ̀ngŋǝ̀nà luí ka, banggi amuna-burana male ama, <<Lang ǝn wuna ka, wu tsǝk luem a ɓembe-ɓa-tali mǝnana à tsǝk ɓwa mala Ɓakuli kam ngga; wu nongsǝ amuem a nkanggari amale. Cau mǝnana Yahweh banggi wi ɓǝ̀ yi hama arǝ gyangŋan a Betel, sǝ arǝ andaka-ankúl mala amgbangban-peri mǝnana kat arǝ anggea-là mala amǝ Samariya ka, ɓafo nǝ̀ yia lùmsǝo.>>
Cauɓikea mala Jerobuam mana yinǝ nggurlú male ka
Anzǝm mǝnia yì gìr mǝnana kumban ngga, Jerobuam pǝlǝ nzǝmi arǝ anjar mǝɓike male ɗàng; yì ka lidǝmba nǝ twal aɓwana aɓalǝ aɓwe kat, sǝ tsǝia ɓǝà duk apǝris mala amgbangban-peri atà ankúl. Ɓwa mǝnana kat ear ka, kùri wi pǝris mala mgbangban-peri. Nǝ gir mǝnia pè ka, nunbi ɓala male bafe mala cauɓikea mǝnana warinǝi a kpa andǝ kiɗiki male kàng a ɓanza ka.
Source notes (1)
- Footnote Ɓal lùmsǝo mala hama mǝnia ka aɓa: 2Amur 23:15-20.
Mbula. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.