Ɓal 2

Came mala agumli arǝ akattì mala amǝ Isǝrayila

1Yahweh banggi Musa andǝ Haruna ama: 2<<Amǝ Isǝrayila ɓǝà tsǝki agumli arǝ akattì malea zak nǝ ban Tara Ban-peri, koya gumli a kàttì ka ɓǝ̀ ɓamǝsǝi pǝlǝ nǝban Tara Ban-peri a koya buì; koyan ngga a ban tútà nǝ baji mala ɓala-kàu malea. 3Amǝ Isǝrayila mǝnana à nǝ̀ tsǝk agumli malea a njar-takuli, a buì mala eauwe mala pwari ka, à nda ka anggǝsan mala amǝ'lwa aɓata tútà mala kàttì mala Yahuda. Ɓwa mǝnana nǝ̀ duk ɓwamǝgule amur amǝkà Yahuda ka nda Nashon, muna-ɓwabura mala Aminadap; 4amǝ'lwa mǝnana à ɓallia a nggǝsan male ka, làkkì malea na á-lumi-tongno-nong-ɓari-bwamdǝ-ine nǝ gbǝman-tongno-nong-mwashat (74,600). 5Amǝnana à nǝ̀ tsǝk agumli malea a nkanggaria ka nda tàu mala Isaka, sǝ ɓwamǝgule amur amǝkà Isaka ka nda Netanel, muna-ɓwabura mala Zuar; 6amǝ'lwa mǝnana à ɓallia a nggǝsan male ka, làkkì malea na á-lumi-tongno nǝ á-ine nǝ gbǝman-ine (54,400). 7Pǝlǝa tàu mala Zebulu nǝ̀ kpa; ɓwamǝgule amur amǝ'kà Zebulu ka nda Eliyap, muna-ɓwabura mala Helon, 8sǝ amǝ'lwa mǝnana à ɓallia a nggǝsan male ka, làkkì malea na á-lumi-tongno nǝ á-tongno-nong-ɓari nǝ gbǝman-ine (57,400). 9Yià mǝno kat à ɓallia arǝ anggǝsan mala amǝ'lwa malea a kàttì mala Yahuda ka, làkkì malea na á-gbǝman-mwashat nǝ á-lumi-tongno-nong-tàrú nǝ á-tongno-nong-mwashat nǝ gbǝman-ine (186,400). Yia na à nǝ̀ tita lo gya ka.

10<<Amǝ Isǝrayila mǝnana a njar-kunmur ka, à nda ka anggǝsan mala amǝ'lwa mala kàttì mala Ruben aɓata tútà malea; ɓwamǝgule amur amǝkà Ruben ngga nda Elizur, muna-ɓwabura mala Shedeur; 11amǝ'lwa mǝnana à ɓallia a nggǝsan male ka, làkkì malea na á-lumi-ine nǝ á-tongno-nong-mwashat nǝ gbǝman-tongno (46,500). 12Sǝ aɓwana mǝnana à nǝ̀ tsǝk agumli malea a nkanggaria ka nda tàu mala Shimiyon; ɓwamǝgule amur amǝkà Shimiyon ngga nda Shelumiyel, muna-ɓwabura mala Zurishaddai; 13amǝ'lwa mǝnana à ɓallia a nggǝsan male ka, làkkì malea na á-lumi-tongno nǝ á-tongno-nong-ine nǝ gbǝman-tàrú (59,300). 14Pǝlǝa tàu mala Gad nǝ̀ kpa, sǝ ɓwamǝgule amur amǝkà Gad ka nda Eliyasaf, muna-ɓwabura mala Rewel; 15amǝ'lwa mǝnana à ɓallia a nggǝsan male ka, làkkì malea na á-lumi-ine nǝ á-tongno nǝ gbǝman-tongno-nong-mwashat nǝ lumi-tongno (45,650). 16Yià mǝno kat à ɓallia arǝ anggǝsan mala amǝ'lwa malea a kàttì mala Ruben ngga, làkkì malea na á-gbǝman-mwashat nǝ á-lumi-tongno nǝ á-mwashat nǝ gbǝman-ine nǝ lumi-tongno (151,450). À nda ka ɓaria aɓwana aɓa lo gya.

17<<Anzǝm Ruben ngga Amǝ'Lawi nǝ agir mala Tara Ban-peri a buia ka, à nǝ̀ lo gya a tsùrú mala akattì; à nǝ̀ lo gya kǝla mana à tsǝì ace bwal kàttì ka, koyan ngga a ban male aɓata tútà male.

18<<Amǝ Isǝrayila mǝnana à nǝ̀ pa a njar-nzali ka, à nda ka anggǝsan mala amǝ'lwa mala kàttì mala Ifǝrem aɓata tútà malea; ɓwamǝgule amur amǝkà Ifǝrem ngga nda Elishama, muna-ɓwabura mala Ammihud; 19amǝ'lwa mǝnana à ɓallia a nggǝsan male ka, làkkì malea na á-lumi-ine nǝ gbǝman-tongno (40,500). 20Aɓwana mǝnana a nkanggaria ka nda tàu mala Manasa; ɓwamǝgule amur amǝkà Manasa ka nda Gamaliyel, muna-ɓwabura mala Pedazur; 21amǝ'lwa mǝnana à ɓallia a nggǝsan male ka, làkkì malea na á-lumi-tàrú nǝ á-ɓari nǝ gbǝman-ɓari (32,200). 22Pǝlǝa tàu mala Benjami nǝ̀ kpa, sǝ ɓwamǝgule amur amǝkà Benjami ka nda Abidan, muna-ɓwabura mala Gidiyoni; 23amǝ'lwa mǝnana à ɓallia a nggǝsan male ka, làkkì malea na á-lumi-tàrú nǝ á-tongno nǝ gbǝman-ine (35,400). 24Yià mǝno kat à ɓallia arǝ anggǝsan mala amǝ'lwa malea a kàttì mala Ifǝrem ngga, làkkì malea na á-gbǝman-mwashat nǝ á-tongno-nong-tàrú nǝ gbǝman-mwashat (108,100). À nda ka tàruia aɓwana aɓa lo gya.

25<<Amǝ Isǝrayila mǝnana à nǝ̀ pà a njar-nza ka, à nda ka anggǝsan mala amǝ'lwa mala kàttì mala Dan aɓata tútà malea; ɓwamǝgule amur amǝkà Dan ngga nda Ahieza, muna-ɓwabura mala Amishaddai; 26amǝ'lwa mǝnana à ɓallia a nggǝsan male ka, làkkì malea na á-lumi-tongno-nong-mwashat nǝ á-ɓari nǝ gbǝman-tongno-nong-ɓari (62,700). 27Aɓwana mǝnana à nǝ̀ tsǝk agumli malea a nkanggaria ka nda tàu mala Asha; ɓwamǝgule amur amǝkà Asha ka nda Pagiyel, muna-ɓwabura mala Okran; 28amǝ'lwa mǝnana à ɓallia a nggǝsan male ka, làkkì malea na á-lumi-ine nǝ á-mwashat nǝ gbǝman-tongno (41,500). 29Pǝlǝa tàu mala Naftali nǝ̀ kpa, sǝ ɓwamǝgule amur amǝkà Naftali ka nda Ahira, muna-ɓwabura mala Enan; 30amǝ'lwa mǝnana à ɓallia a nggǝsan male ka, làkkì malea na á-lumi-tongno nǝ á-tàrú nǝ gbǝman-ine (53,400). 31Yià mǝno kat à ɓallia a kàttì mala Dan ngga, làkkì malea na á-gbǝman-mwashat nǝ á-lumi-tongno nǝ á-tongno-nong-ɓari nǝ gbǝman-tongno-nong-mwashat (157,600). À nda ka amǝ'tànkwàng aɓa lo gya.>>

32Amǝnia ka à nda ka amǝ Isǝrayila mana à ɓallia arǝ aɓala-kàu malea ka. Yià mǝno kat à ɓallia arǝ akattì malea, arǝ anggǝsan mala amǝ'lwa malea ka, làkkì malea na á-gbǝman-tongno-nong-mwashat nǝ á-tàrú nǝ gbǝman-tongno nǝ lumi-tongno (603,550). 33Sǝama Amǝ'Lawi ka à ɓallia atà amǝ Isǝrayila ɗàng, kǝla mana Yahweh banggi Musa ka.

34Anggo sǝ amǝ Isǝrayila pa. À kpata cau mǝnana kat Yahweh banggi Musa ka, sǝ anggo sǝ à duk kàttì aɓata atútà malea, sǝ anggo gbal sǝ à puro aban ká, koyan ngga a tàu andǝ ɓala-kàu male.