2 Samu 9

Dauda lǝmdǝì Mefiboshet pěmǝɓoarne

1Pǝlǝa Dauda ɗìban ama, <<Kǝɓwa ueo atà amǝ'ɓala mala Sawul, mǝnana mǝ nǝ lǝmdǝì wi pěmǝɓoarne atàcau mala Jonatan ngga re?>>

2Adyan ngga, ɓè mǝturo-ɓala nakam a ɓala mala Sawul, lùllǝì ama 1Ziba. À tunǝi, sǝ yiu aɓadǝm Dauda. Pǝlǝa murǝm Dauda ɗì ama, <<A nda Ziba le?>>

Ziba ear ama, <<E, mǝ nda, mim guro mò.>>

3Murǝm ɗì ama, <<Kǝɓwa pà kàm a ɓala mala Sawul mana ue mǝ nǝ lǝmdǝì wi pěmǝɓoarne mala Ɓakuli ka re?>>

Ziba earî murǝm ama, <<Ɓè muna-ɓwabura mala Jonatan nakam; gbakǝre na arǝ akusǝi kǝm.>>

4Murǝm ɗìban ama, <<Ndake?>>

Ziba pe wi eare ama, <<Nda a ɓala mala Makir muna-ɓwabura mala Ammiyel a Lo-Debar.>>

5Pǝlǝa murǝm Dauda túrban a ɓala mala Makir muna-ɓwabura mala Ammiyel, a Lo-Debar, sǝ à kya yinǝ Mefiboshet.

6Lang 2Mefiboshet muna-ɓwabura mala Jonatan, mǝ'kà Sawul yina aban Dauda ka, yi ɓun a nzali ace pe wi gulo.

Dauda tunǝban ama, <<Mefiboshet!>>

Pǝlǝa Mefiboshet ear ama, <<Mǝ ndya ka, mim guro mò.>>

7Dauda ne wi ama, <<Ɓangciu ɓǝkǝa pakko ɗàng, acemǝnana mǝ nǝ lǝmdǝo pěmǝɓoarne atàcau mala tárró Jonatan. Mǝ nǝ nyesǝô anzali mala keò Sawul, sǝ awu nǝ̀ nggǝ ligirlina a kpamgbang-lǐ mem.>>

8Nda Mefiboshet nyare ɓun a nzali sǝ bang ama, <<Mǝ nda yana mǝnana awu nǝ̀ ɗenyinǝ mim ngga? Yì mim guro mò mǝnana ǝn kútì luna nva nǝ gulo raka.>>

9Pǝlǝa Dauda tunǝ Ziba, mǝtúró mala Sawul, sǝ ne wi ama, <<Ən pani Mefiboshet mǝ'kà mǝtala-ɓala mò agir mǝnana kat amala Sawul andǝ ɓala male na ka. 10We wunǝ amuna-burana mô, sǝ amǝ'túró-ɓala mò ka, wun nǝ̀ nggǝ rikì wi ɓaban male, sǝ wun nǝ̀ nggǝ yinǝi wi agirɓaban male, ace mǝnana ɓǝ̀ wu kúmbi muna-ɓwabura mala mǝtala-ɓala mò girlina mǝnana nǝ̀ lì ka. Sǝama Mefiboshet mǝ'kà mǝtala-ɓala mò ka, nǝ̀ nggǝ ligirlina a kpamgbang-lǐ mem koya pwari.>> (A bàkú mǝno ka, Ziba ndanǝ amuna-burana lum-bwamdǝ-tongno andǝ amǝ'túró-ɓala lumi-ɓari.)

11Pǝlǝa Ziba banggi murǝm ama, <<Mim guro mò ka, mǝ nǝ̀ pàk gìr kat kǝla mǝnana we, mǝtala-ɓala mem, yì murǝm, a nam ama mǝ pak ka.>> Nda Mefiboshet ligirlina a kpamgbang-lǐ mala murǝm Dauda, kǝla mwashat aɓalǝ amuna-burana mala murǝm ngga.

12Mefiboshet ndanǝ muna-ɓwabura lo-ɓwa, lùllǝì ama 3Mika. Sǝ aɓwana mǝnana kat à ndanǝdo a ɓala mala Ziba ka, à duk amǝ'túró mala Mefiboshet. 13Nda Mefiboshet do a Urǝshalima, acemǝnana kǝ ligirlina a kpamgbang-lǐ mala murǝm koya pwari ka. Yì ka, gbakǝre na arǝ akusǝi kǝm.