Skip to content
BibleKenya

Mbembe Osopong

Nnwẹr s'Akpaar-aponga 17

Ọkha f'Mika okpobh

Wa ujunung wạnọ kw'ubin k'ukhubha kw'akpecho p'Epraim, kw'okpen Mika, obeni ọkka bẹ́, “Ashekẹl p'silva nnọhna mfa ukuma arạbh chi, p'abẹ atạk k'akhọ-ọ k'mbọhk, p'aseng apyẹ anạng ọnạng kw'ọtạk ẹmma-raakha, p'abạra akpaak kwẹ age-m k'itọhng, kkeri pyẹ ma e, amma wọ wa ntạk pyẹ.”

Ọkka n'obeni bẹ́, “Nnwa kwaam, tte Ọvaar Ubinọkpaabyi udiọ-ọ!”

Masẹ urikhi ashekẹl mbọ p'silva nnọhna mfa ukuma arạbh chi ọnạng ọkka, ọkka n'obeni bẹ́, “K'udik-ọkka, amma m'ntte asilva mbọ paam ọbọhk nnạng Ọvaar Ubinọkpabyi, ọfha nnwa kwaam utima usi ọkpạta-nwa kw'abẹ atim silva afhạrọ. Amma m'ntạkha ọkpạta-nwa nwọ mkpa nnạm nnạng-ọ.”

Masẹ urikhi asilva mbọ ọnạng ọkka, ọkka n'ọtạk ashekẹl arạbh jobh p'silva ọnạng omenkka-nạng kw'silva, kw'utim pyẹ udwuk ọkpata-nwa. Wa abẹ atạk wẹ ata achok k'ọchọhm kw'Mika.

Wa ujunung nwa kw'okpen Mika ọkhaam ọkha-pa, kw'uwa usi ẹphọd ọttạra ikha s'ẹchọhmfhạr, ukwu ọtạkha nnwa wạnọ kwẹ kw'ujunung utima usi ọfọhnẹja kwẹ. K'okpe ngwọ, wa anạng p'Israẹl ọvaarnạng kákháam, ọnạng kwidede urukhu oche kw'ọdaakh-ẹ.

Wa udikkobh kw'efonamma ch'Lẹvi, kw'ubin Bẹtẹlẹhẹm kha ẹkhạma ch'Juda, ubin urik Bẹtẹlẹhẹm kha Juda, ọta oror ibyi idwạkh-ọdwạk s'm'uninga. Masẹ n'osenga k'eden, ọta ọyaakha k'ochọhm kw'Mika, k'ukhubha kw'akpecho p'Ephraim.

Mika ọbọbh-ẹ bẹ́, “Ọma abin mạn?”

Oben bẹ́, “Amma mbin k'efonamma ch'Lẹvi, kha Bẹtẹlẹhẹm, k'ẹkhạma ch'Juda. Amma n'nnor ibyi s'm'nnuk.”

Ma wọ Mika oben-ẹ bẹ́, “Ọma m'aruk abamẹ mama, ọfha asenga ma ade otte ọttạra ọfọhnẹja kwaam. Amma m'nnạng-ọ ashẹkẹl jobh p'silva k'icho, mbạra nnạng-ọ ọvạra ọttạra uchiattọhk.” Ujunung nwọ kw'efonamma ch'Lẹvi ọnwa kha ẹtaanga. Wa udikkobh nwọ kw'Lẹvi ocher bẹ́, uruk abẹ. Udikkobh nwọ o, n'ukwu ode masẹ ujunung-nwa kwẹ wạnọ. Ma wọ Mika usi udikkobh nwọ kw'Lẹvi ọfọhnẹja kwẹ, ọbạra uruk k'akhẹ k'ọchọhm. Mika, ọbẹ́, “Amma kk'nsonga bẹ́, Ọvaar Ubinọkpaabyi m'usi ijibha usi ọnạng-m, s'udikkobh nwa kw'Lẹvi kk'ọfọhnẹja kwaam udia.”

Mbembe Osopong. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.