Nnwẹr s'Akpaar-aponga 12

Ọmmaphyaangẹ kw'Jẹphta ọttạra anạng p'Ephraim

1Wa anạng p'Ephraim atobh akpongnạng pabẹ, abẹ ajekha k'ukhubha afona k'Zaphon. Abẹ ata abạbh Jẹphta bẹ́, “Ukwuru yạn kw'ata arima anạng p'Ammọn abẹ, kw'nạn mạna náyera antwạn abọ-o? Amạna mankkạm-ọ ọttạra ọchọhm kwọ.”

2Jẹphta ubhin bẹ́, “Irima ch'amma ọttạra anạng paam annim anạng p'Ammọn abẹ, ede irima ch'ẹkpọhkh-ọkpọhkhọ. chibhi s'nyeri bạnga, abạnga k'haam k'mbọhk sabẹ nákaana. 3Masẹ nse bẹ́, abạnga khaam mákaana, amma nchera obo njekha nta nnima anạng p'Ammọn abẹ. Wa Ọvaar Ubinọkpaabyi usi-m nkhema bẹ. Mantọhmma ode yạn kw'abạnga akwu chemma bẹ́, arima abamẹ o?”

4Wa Jẹphta n'oyeri anạng p'Gilead otobha, utima bẹ ota urima anạng p'Ephraim abẹ. Wa anạng p'Gilead afhọ anạng p'Ephraim, ukwuru s'uwa anạng p'Ephraim kk'abena bẹ́ “Abạngama anạng p'Gilead ade arạbh-ekpong p'abin Ephraim ọttạra Manasẹ.” 5Wa anạng p'Gilead akpa igbin-gbini s'ọraanga kw'Jọrdan s'm'ajekha Ephraim. K'okpe kw'idede kw'ọnạng kw'Ephraim arạbh-ọ ọnnaanga, obeni bẹ́ “Tte njekha k'ukhubha,” ajunung p'Gilead abạbh-ẹ bẹ́, “Ọma abin Ephraim o?” Ode ubhin bẹ́,“Mma,” 6abẹ aben-ẹ bẹ́ “Ode mạna ben bẹ́, ‘Shibolẹt.’ ” Ode obeni bẹ́, Sibolẹt,’ ”ukwuru bẹ k'okke oyeri k'ọyọhng ngwọmma obengana, abẹ m'avạkh-ẹ afhọ mạmma k'igbin-gbini s'm'akwu ajekha ọraanga kw'Jọrdan. Anạng nnọhna arạbh-afa ukuma chi p'Ephraim, bọ wa abẹ afhọ ma.

7Jẹphta wa ode ọkpaara aponga kw'Israẹl k'icho isajạnẹ. Wa Jẹphta kw'ubin k'ẹkhạma ch'Gilead ope, abẹ anọhng-ẹ k'ofhon gwạnọ kha Gilead.

Ibzan ọttạra Ẹlọn ọttạra Abdọn, akpaara aponga p'Israẹl

8Masẹ Jẹphta kk'upua, Ibzan kw'ubin Bẹtẹlẹhẹm, ukwu ode ọkpaara akponga k'Israẹl. 9Wa ẹma ọkhaam adikkobh ẹrạbh ukuma jobh ọttạra aminava ẹrạbh ukuma jobh. Wa ọtạkha aminava pẹ ọnạng nnạmma idwạk-ọdwạk k'ọbada, ọbạra ọtạ ọtạkha aminava ẹrạbh ukuma jobh k'nnạmma idwạk-ọdwạk okkena adikkobh pẹ k'obada. Wa Ibzan ode ọkpaar-aponga k'Israẹl k'icho isenọfa. 10Wa Ibzan ope, abẹ annọhng-ẹ k'Bẹtẹlẹhẹm.

11Masẹ Ibzan kk'upua, Ẹlọn kw'ubin Zẹbulun, ode ọkpaara aponga kw'Israẹl k'icho jobh. 12Wa Ẹlọn ope, abẹ annọhng-ẹ kha Ayijalọn k'ẹkhạma ch'zebulun.

13Masẹ Ẹlọn kk'upua, Abdọn kw'ode nnwa kw'Hilẹl kw'ubin Piraton, ukwu ode ọkpaara-aponga k'Israẹl. 14Wa ẹma ọkhaam adikkobh arạbh afa ọttạra adikkobh ẹrạbh ukuma jobh p'iva-mfhona, p'ạbẹ n'ayaar k'nnyạnyaang arạbh attaan ukuma jobh. Wa ẹma ode ọkpaara-aponga k'Israẹl k'icho isenọttaan. 15Wa Abdọn kw'ode nnwa kw'Hilẹl ope, abẹ annọhng-ẹ k'Piraton kha ẹkhạma ch'Ephraim, k'ukhubha kw'efhondiden ch'okpecho kw'anạng p'Amalẹk.