Skip to content
BibleKenya

Mbembe Osopong

Ichedendik 16

Hagar ọttạra nnwa kwẹ Ishimayẹl

Wa Sarai kw'ọba Abram, nnwa nọ́maana. Okhenka, ọkhaam ubira kw'ikwanạng kw'ubin Ijip kw'okpen Hagar. Ma wọ, n'obeni Abram bẹ́, “Masẹ Ọvaar Ubinọkpaabyi nạn khaam ọmaan nọ́nạnga, n'mben bẹ́ mphyem-ọ bẹ́, atạkha ubira nwa kwaam ayima abẹ, de m'nsenga ma akhẹ nkhaama nnwa o.” Abram ochera udik ngwọ kw'Sarai ọkpaakhẹ. Masẹ Abram kk'icho jobh urukha k'Kenaan, ma wọ Sarai n'ọtạk Hagar kw'ode ubira kwẹ kw'ubin Ijip, ọnạng Abram bẹ́, uyima abẹ. Abram uyima Hagar abẹ, ukwu utima ifhạr.

Masẹ Hagar n'osong bẹ́, kk'ifhạr utima, ọtạma ọkka kwẹ kw'ọchọhm myạmyạna Osenga ma, Sarai ọdwạkh-ẹ, n'obeni Abram bẹ́, “Ọma wọ awọhkhọ irem nna s'n'ndọhbh ma e. Amma wọ ntạk ubira kwaam nnạng-ọ bẹ́, ayima abẹ, mantọhmma, masẹ n'osong bẹ́, kk'ifhạr utima, n'ose-m ẹsẹkha. Ọvaar Ubinọkpaabyi mạnkkeni wọ m'usi iponga saam ọma abẹ.”

Abram oben Sarai bẹ́, “Diri ettem, uminanwa nwọ ode ubira kwọ, si-ẹ oche kw'ọdaakh-ọ.” Tạma mạma o, Sarai ọtạma Hagar gbạgbạbhọ. Hagar osenga ma, ọrạbh.

Masẹ Hagar kk'ọrạbha, oseng-eden kw'Ọvaar Ubinọkpaabyi iyin abẹ k'isipe ch'ining k'ibyi s'owór, isipe ch'ining k'ọkkaden kw'oten k'Shur. Ma wọ, itọhmọ nwọ oben Hagar bẹ́, “Ọma Hagar, kw'ade ubira kw'Sarai, abin mạn o? N'ata mạn?” Hagar ubhin-ẹ bẹ́, “Amma n'nnạbh k'nna kwaam k'mbọhk ma e.”

Oseng-eden kw'Ọvaar Ubinọkpaabyi oben-ẹ bẹ́, “Kpa nnạm tor akka, abạra asạkha echo anạng-ẹ.” Oseng-eden nwọ kw'Ọvaar Ubinọkpaabyi ọbạra oben-ẹ bẹ́, “Amma m'nsi iva p'iva pọ asaabh-ọsaabh. Abẹ m'asaabh k'oche kw'ọnạng nạn bẹ mókke ubhik.”

Itọhmọ nnọ s'Ọvaar Ubinọkpaabyi ibạra ittạra-ẹ bẹ́,

“Ifhạr nnọ s'atim ma,

m'amaan ujunung,

m'akpẹ-ẹ Ishimayẹl,

ukwuru bẹ́, Ọvaar Ubinọkpaabyi kk'ẹmạng chọ ch'irem ọbhaanga.

Ishmayẹl nwọ m'usi idik-abhaang masẹ ẹnyạnyaang ch'abẹ nạn titira nátira,

m'ọkhaama iwawuna ọnạng kwidede abẹ,

ọnạng kwidede m'ọbạra uwun-ẹ,

anạng pẹ abẹ múruk.”

Ma wọ, Hagar n'obeni ifor sẹ bẹ́, “N'ode bẹ́, Ọvaar Ubinọkpaabyi wọ kw'nse maa, bạra ntim nnukhu akpen maa o?” Osenga ma, oyer-ẹ eche ch'ikpukpobha bẹ́, Ẹl-roi1, ọbẹ́, “Amma kk'Ubinọkpaabyi kw'okker-m nsia.”

Osenga ma, anạng n'ayeri isipe njọ, Beer-Lahai-Roi2, kw'uyini, “Isipe ch'ẹma kw'urukhu akpen, kw'ose-m.” Isipe njọ ining k'ngekha s'Kadẹsh ọttạra Bẹrẹd.

Ma wọ, Hagar ọmaanẹ ujunungnwa ọnạng Abram. Abram ukpuẹ-ẹ Ishimayẹl. Wa, Abram ode icho arạbh annebung ukuma isajạnẹ, k'okpe kw'Hagar ọmmaanẹ Ishimayẹl.

Source notes (2)
  1. Footnote K'eHiburu, Ẹl-Roi uyini, Ọma ade Ubinọkpaabyi kw'okker-m.
  2. Footnote K'eHiburu, Beer-Lahai-Roi uyini, Isipe ch'ẹma kw'urukhu akpen kw'ose-m.

Mbembe Osopong. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.