Mbembe Adun [mfn]
Joshua 20
Ibhondim s'etubha
Ọvaar Ibinọkpaabyi oben Joshua bẹ́, “Ben anọng p'Israẹl bẹ́, màkpe ibhondim njo ache, k'ose kw'ntọhnọ Mosẹs, mfha ọnọng kpenamkpen kw'ọfhọ ọnọng ch'ina ọkaamẹ bẹ́, ọfhẹ-ẹ, wanẹma, ọnọng k'ẹyaaka kobir ọfhọ, óde ọrọbhọ od-otubha za, ọnọng kw'im'otuk-otuka, oning-ẹ oze.
K'ogbe kw'marọbhọ achina m'ibhondim nja, mm'abe ny'ọmma kw'ebhumma ch'ebhondim agbaak odik kw'majẹ anang asonọng p'ebhondim ndo. Asonọng mbo manang ọnọng nwo kw'ọjẹ odik ibyi s'im'oruk ny'ottem kwabẹ ny'ebhondim ndo. Ó̱de ọnọng okwubhọ ọnọng kw'ọrọbhọ ebhon maa, opyirẹ ny'ebhondim ndo, asonọng p'ebhondim ndo, m'ọnọng nwo kw'ọrọbhọ ebhon ọbọhk matte anang ọnọng nwo kw'okwubh-ẹ, okurọ bẹ́, oyok k'ẹyaaka kọfhọ. Ọnọng nwo kw'ọrọbhọ ebhon m'oninga ny'ebhondim maa, obe aponga k'ititika s'ikpakaana njo. Ọnọng nwo m'oninga nya maa, opyire k'ogbe kw'ọfọhn-ẹja kwiden kw'osi ọtọhm ny'ogbe nwo, ope. Ny'ogbese nwo, ọnọng nwo, oning ch'ọbhan z'ikẹ k'obhon.”
Ofona nya, mateka Kedesh z'Galili, z'ogbe-bhon kw'Naphtali, asok okikaan, marọhbha Shẹkẹm z'ogbe-bhon kw'Ephraim, mabir arọhbha Kiriyat-Arba (kw'ode Hẹbrọn) z'ogbe-bhon kw'Juda. Z'Jọrdan, z'ẹbhaakẹ ch'ewuchen ed-eyin (z'ọbọhk nwoza kw'Jẹriko), wa marọhbha Bẹzẹr z'ibyi s'anọng nna arukọ, z'ẹkpẹmẹ ch'efona ch'Reuben, marọhbha Ramọt z'Gilead z'efona ch'Gad, marọhbha Golan z'Bashan z'ẹkọma ch'Manasẹ. Ọnọng kpenamkpen kw'ofon Israẹl, wanẹma, okikennọng kw'orukọ ny'Israẹl kw'ina ọnọng k'ẹyaaka ọfhọ, oning ch'ọrọbhọ od-oninga m'ibhondim nja s'mapyi ache ma, ọfha ọnaanga k'mbọhk s'ọnọng kw'im'otuk-otuka, pira opyire ny'ewu ndo ch'im'obe aponga k'ititika s'ikpakaana njo.
Mbembe Adun [mfn]. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.