Skip to content
BibleKenya

Mbembe Adun [mfn]

Hosea 14

Akpen obhubhona m'atima ẹda akwu

Israẹl o, màkpa nnam z'Ọvaar Ibinọkpaabyi, kw'ode Ibinọkpaabyi kwabọnga.

Mpyibha sabọnga jọ iwọhkọ bọnga matto!

Màtima nkwukọ

kpa nnam z'Ọvaar Ibinọkpaabyi.

Màben-ẹ bẹ́,

“Bina nang mpyibha samina maphyir,

abira atọka mina k'ottemlebh

mfha motima ẹmma chamina, ọtọhng-ọ.

Asiriya mina mòkpo ọkkaana,

m'ọdọk nnyanya mòvura bẹ́, moyin egbong.

Ogbe kode kw'mm'obir oben

ekpo py'mbọhk samina isi bẹ́, ‘Aka pamina’

okurọ bẹ́, anọng p'nna ab'otte ayen, mad-ayena ikwosisi ny'ikọ.”

“Kaam m'nsi bẹ makpọka ewéna chabẹ,

m'mbir nkọhka bẹ ọdaakẹ kw'ofon-m z'ettem,

okurọ bẹ́, ottempyibha kw'nyen mmaana bẹ́, kk'aam ọsa z'ettem.

Kaam m'nde mach'ifọhng nnang Israẹl;

kẹ m'ovoma mach'azizaarẹ p'akekakonga.

K'ose kw'Sida kw'Lẹbanọn ode,

minna kw'aranga pẹ m'adim z'izek,

amenẹ pẹ m'agorọ.

Ajibhada pẹ m'ade mach'ochi kw'oliv,

eruk chẹ elebh mach'sida kw'Lẹbanọn.

Anọng m'abir akwu aruk ny'ofokodo kwẹ;

m'ojibh ọnang bẹ mach'akpomọma,

mm'avoma mach'ochi kw'grep,

Israẹl m'oyin eche mach'atuk p'Lẹbanọn.

Ephraim, kaam m'mbira ntima aka nsi mbọng o?

Kaam m'nnang-ẹ ẹpọhna, mbira nkker-ẹ.

Kaam nde mach'ochi kw'Juniper kw'ovom-ovomọ;

ọkkọkka kwọ ofon k'kaam.”

Anyi wọ ode odikzonganọng ma? Tte idik nja ittaan-ẹ.

Bọng-ọnọng wọ od-otin idik k'akpen pẹ? Tte ozonga idik nja.

Nden s'Ọvaar Ibinọkpaabyi itor-otor;

anọng p'ator-otor ad-azenga ny'nden njo,

ńnòde anọng p'agaangẹ nso, mm'asira nya, matto.

Mbembe Adun [mfn]. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.