Skip to content
BibleKenya

Mbembe Adun [mfn]

Nnwẹr kw'Ozenga 40

Ettima ch'iruk-byi s'Ibinọkpaabyi

Nya o, Ọvaar Ibinọkpaabyi oben Mosẹs bẹ́, “K'echedenwu ch'ochedenphe, ttima iruk-byi s'Ibinọkpaabyi, kw'ode ikkira s'etobha. Sok Ẹkkọhbhọ ch'Echekẹ z'ẹtaanga, abir atima ibara s'ọmma abubh-ẹ. Tima okpokkoro dim z'ẹtaanga, anana ekpo pyẹ nya. Atima etorongkkang-nana akwu, ayenẹ atorongkkang pẹ. Sok ija-byi s'insẹns s'matim gol asi ny'ititika s'Ẹkkọhbhọ ch'Echekẹ, agbana ọbara f'ọmma ny'ẹsọhmma ch'iruk-byi s'Ibinọkpaabyi.

“Sok ija-byi s'nnanga okwukwọmọ ny'ititika kw'ẹsọhmma ch'iruk-byi s'Ibinọkpaabyi, z'ikkira s'etobha. Abir ake asi k'ogbobhmbọhk asok ny'njeka kw'ikkira s'etobha, ọmaana ija-byi. Si eterttem tima kọbh-ẹ ọkọbha, agbana ọbara f'ọmma ny'ẹmmakwukden ch'eterttem ndo.

“Tọka ana p'mad-abyenga ọnọng k'eso, byenga ny'iruk-byi s'Ibinọkpaabyi, ọttara k'ọttọhk kpenamkpen f'oning nya. M'akọm-ẹ asok, ọmaana ekpo py'ndoka sẹ maphyir. Minna kw'im'izenga iwur. M'abir abyenga ana ny'ija-byi s'ẹnanga okwukwọmọ, ọmaana k'ọttọhk kpenamkpen f'oning nya. M'asi jẹ iwur, ibir iwur iyọhng-ọyọhnga. M'abir abyenga ana ny'ogbobhmbọhk, ọttara ny'ẹnana chẹ, asi pyẹ ewur.

“Tima Aarọn, ọmaana ajinọngva pẹ kwu z'ẹsọhmma ch'ikkira s'etobha, atima asi agbobhọ bẹ. Fọra Aarọn ẹnya ch'awuriji, abyeng-ẹ ana k'eso, abir asẹ-ẹ owur, ọfha osi ọtọhm mach'ọfọhn-nja kwaam. M'abir atima ajinọngva pẹ akwu, afọra bẹ akpaar-mbọhk p'apyirẹ ny'ndudungọ. Byenga bẹ ana k'eso k'ose kw'uwa abyeng otte kwabẹ, mfha masi ọtọhm mach'afọhn-nja paam. Ana p'im'abyenga bẹ m'asi bẹ made afọhn-nja k'epemaanitor.” Mosẹs osi ọttọhk kpenamkpen k'ose kw'Ọvaar Ibinọkpaabyi ikk'ẹ obena.

Nya wọ osi, wa mattima iruk-byi s'Ibinọkpaabyi ny'echedenwu ch'ochedenphe kw'icho ttong afa. K'ogbe kw'Mosẹs ottim iruk-byi njo s'Ibinọkpaabyi, wa ochi eden osi arin pabẹ, ofu mkpọmmachi, ọnọhma nzemachi nya, pira noffu achiva p'adum-odum. Okwu ọmmaama ikkira njo obubha z'ẹrọng kw'iruk-byi s'Ibinọkpaabyi, pira nodo jẹ obubha z'ẹrọng k'ose kw'Ọvaar Ibinọkpaabyi ikk'ẹ obena.

Ọtọka ata p'makkẹrẹ Asana, oyika ny'Ẹkkọhbhọ ch'Echekẹ. Ọtọka achiva p'adum-odum, ọnọhma ny'Ẹkkọhbhọ ndo, pira ọtọka efokọkpa obubha nya. Minna kw'ọtọk Ẹkkọhbhọ ndo ch'Echekẹ, osok z'iruk-byi s'Ibinọkpaabyi, ọgbana ibara s'ọmma s'ikpa Ẹkkọhbhọ ch'Asana ayik, k'ose kw'Ọvaar Ibinọkpaabyi ikk'ẹ obena.

Mosẹs obera okpokkoro nwo z'ẹtaanga kw'ikkira s'etobha, k'iyaan-iyaan kw'ibara s'ọmma s'ining z'ebir-ebir kw'iruk-byi njo. Ọtọka brẹd ọnana ny'okpokkoro nwo kw'oning ny'ititika s'Ọvaar Ibinọkpaabyi, k'ose kw'Ọvaar Ibinọkpaabyi ikk'ẹ obena.

Osok etorongkkang-nana ny'ikkira s'etobha, ekkerẹ okpokkoro ititika z'ẹwọn-ẹwọna kw'iruk-byi s'Ibinọkpaabyi, obir obera atorongkkang ny'ititika s'Ọvaar Ibinọkpaabyi k'ose kw'Ọvaar Ibinọkpaabyi ikk'ẹ obena.

Mosẹs ọnana ija-byi njo s'matim gol asi z'ẹtaanga kw'ikkira s'etobha, ny'ititika s'ibara s'ọmma, ọkwọmọ insẹns nya k'ose kw'Ọvaar Ibinọkpaabyi ikk'ẹ obena. Ọgbana ibara s'ọmma ny'ẹsọhmma ch'iruk-byi s'Ibinọkpaabyi.

Osi ija-byi s'ẹnanga okwukwọmọ inyọma ẹsọhmma ch'iruk-byi s'Ibinọkpaabyi, s'ide ikkira s'etobha. Otima nnanga s'ẹkwọmọ, ọttara nnanga s'agwu, ọfọhnọ ẹja nya, k'ose kw'Ọvaar Ibinọkpaabyi ikk'ẹ obena.

Oke asi p'ẹttọhkgbobhọ k'ọgbangbang, obera ny'njeka kw'ikkira s'etobha ọmaana ija-byi njo. Mosẹs ọmaana Aarọn, ọttara ajinọngva p'Aarọn magbobhọ mbọhk ọttara mmokpatọkọ sabẹ nya. Wa magbobhọ mbọhk ọmaana mmokpatọkọ sabẹ k'ogbe kpenamkpen kw'madimẹ z'ikkira s'etobha, wanẹma, k'ogbe kw'mazeng anyọma ija-byi, k'ose kw'Ọvaar Ibinọkpaabyi ikk'Mosẹs obena.

Nya o, Mosẹs ottima eterttem ọkọbha iruk-byi s'Ibinọkpaabyi, ọmaana ija-byi, ọgbana ọbara f'ọmma ny'ẹsọhmma ch'eterttem ndo. Minna kw'uwa Mosẹs ocher ọtọhm mvo osisi.

Abarada p'Ọvaar Ibinọkpaabyi

Nya o, ebonọ ebubha ikkira s'etobha, abarada p'Ọvaar Ibinọkpaabyi maffu iruk-byi s'Ibinọkpaabyi bẹ́ gbing. Mosẹs ọdọk z'ikkira s'etobha kokpo odim, okurọ ch'ebonọ ikk'ẹsaka nya, abarada p'Ọvaar Ibinọkpaabyi maffu iruk-byi s'Ibinọkpaabyi bẹ́ gbing.

Ny'ozenga kw'uwa anọng p'Israẹl masi maphyir, ogbe kpenamkpen kw'ebonọ eyebhẹ ny'iruk-byi s'Ibinọkpaabyi, mabina ozenga. Okenaka, óde ebonọ ndo ina eyebhẹ, m'ẹtọkọ masọbhọ, oye bẹ́, k'eyebha. K'ozenga maphyir kw'uwa anọng p'Israẹl masi, wa mad-aze ebonọ ch'Ọvaar Ibinọkpaabyi ch'ed-ebubha ny'ẹrọng kw'iruk-byi s'Ibinọkpaabyi k'ẹya; otum k'erungọ, maze ekpon ch'ẹd-ẹwọma nya.

Mbembe Adun [mfn]. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.