Mbembe Adun [mfn]
Nnwẹr kw'Ozenga 11
Nkwurọ s'obo kw'acheden-jinọngva p'Ijip
Nya o, Ọvaar Ibinọkpaabyi oben Mosẹs bẹ́, “Kaam m'mbir nkọhka Phero, ọmaana anọng p'Ijip nkwurọ janẹ ọdọk. Íkk'nsa minna maphyir, kẹ m'otte bọnga ọbọhk mafona, obir okwubh bọnga kibungọ-kibungọ. Tek anọng p'Israẹl k'ejinọng ọttara k'ẹpanọng bẹ́, maphyem anọng p'Ijip ekpo py'matim gol, ọmaana silva, asi.” (Ọvaar Ibinọkpaabyi osi anọng p'Israẹl madaak anọng p'Ijip idik maa, atọhmnọng p'Phero, ọmaana anọng p'Ijip maphyir, makpobha Mosẹs mawuriji.)
Nya o, Mosẹs oben Phero bẹ́, “Ọvaar Ibinọkpaabyi obenẹ bẹ́, ‘Za k'orungittem, m'nzenga nkọbha Ijip maphyir. Ocheden-jinọngnwa kpenamkpen ny'Ijip, m'ope, tọma z'ocheden-jinọngnwa kw'Phero kw'oning z'ẹvaarkkọhbhọ, pyirẹ z'ocheden-jinọngnwa kw'obira-kwanọng kw'od-okok bẹ ekpo, ọmaana achedenva p'adamogbodo maphyir. Mm'abhom ẹmọng ẹkpa-ẹkpa ny'Ijip, ekira ch'nna atima ad-abhoma, ọttara ch'ikwuna nna màbir abhom. Ṉ́nòde anọng p'Israẹl, zaabẹ́ ode ẹffa, oyokinọng mẹ̀gbọ, eten kpenamkpen mèbir ẹgbọ.’ Nya kw'mm'atima azonga bẹ́, Ọvaar Ibinọkpaabyi kk'ẹbhaangẹ ọka ny'njeka kw'anọng p'Ijip, ọmaana p'Israẹl. Asonọng mba pọ maphyir, mm'akwu attima ndudungọ anang-m, maben-m bẹ́, ‘Kọ ọmaana anọng maphyir p'ator-ọ, màzọhng!’ Ńkk'asa minna, kaam m'mfon-ofona.” Nya o, ettem epyibh Mosẹs, ofona orik Phero nya.
Ode ch'Ọvaar Ibinọkpaabyi ikk'Mosẹs obena bẹ́, “Phero bọnga itọhng mòyonga, ọfha nsi ikkonọ-kkonọdik saam inyaamẹ ny'Ijip maphyir.” Mosẹs ọmaana Aarọn masi ikkonọ-kkonọdik akọhka Phero, okenaka, Ọvaar Ibinọkpaabyi osi ettem ch'Phero ẹgaangẹ echina ororo, kocher bẹ́, anọng p'Israẹl mabina arik ẹkọma chẹ.
Mbembe Adun [mfn]. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.