Utumbuli

Kitabu su utumbuli

Ulongulelu

Liina lende li kitabu su Utumbuli mana jaki gagatumbuli. Kitabu sehesi kilongale nndema ewabombwa nu utumbuli wa bandu na mahakau egatumbuliya na mang'aliku pu nndema. Ahelahe kilandi Sapanga ejatumbuliya kwaahenge bandu majambu gingi.

Kitabu su Utumbuli kiwesa kubaganiswa pandu pabeli. 1. Sula ja 1-11, jilangi nndema ewabombwa na Sapanga na majambu ga bandu mwandi. Hapa wagabona majambu gaka Adamu na Eva, Kaini na Abeli, ling'ai la masi nu nnala uku Babeli. 2. Sula ja 12-50, homu wagabona majambu ga aseja ba mwandi ba bandu buku Izilaeli. Mundu ju utumbuli jwabiya Ibulaimu jojamanyikana ndaba jukunzoane nu kunhobale Sapanga. Ndienu wagabona majambu gaka Isaka mwana mwanalomi jwaka Ibulaimu na Yakobu nsokoo waka Ibulaimu. Kabee ankemika Izilaeli. Ndienu wagabona majambu ga bana akanalomi komi na abeli baka Yakobu babube kupete bombi makabila komi na mabeli guku Izilaeli gatenda kutumbuli. Ahelahe majambu makolongu galangi mwana jumu jwaka Yakobu liina laki Josepu na hindu yeyahenga Yakobu na bana baki bangi akanalomi na bandu bu nyumba yabu ajenda kutama ku nndema guku Misili.

Kitabu senze kibii ngati kilandi majambu ga bandu, lakini majambu makolongu ngani mu kitabu senze ndi majambu gaguge Sapanga jutei kugahenga. Kitumbuli kutulangi kubanga Sapanga jabombiki nndema woti na kijomule sukutulandi Sapanga jupwagiki jiendaliya kwaapwatali bandu baki. Mu kitabu soti joandogo ngani ndi Sapanga, hoju juamuu na kwaapeke azabu bandu baahenga mahakau jalongosa na kwaajangatii bandu baki, jwaahenga abiya baamboni mu womi wabu.

Kitabu senze sa mwandi kiandikwi ili kutunza majambu ga bandu babunhobaliya Sapanga na saakolo bandu aendaliya kunhobale Sapanga.

Gagabii nkati

Kubobwa ku nndema joti na bandu. Lipungu la 1:1-2:25

Mahakau egatumbuliya na azabu. Lipungu la 3:1-24

Kuhuma kwaka Adamu mbaka kwaka Noa. Lipungu la 4:1-5:32

Noa na Ling'ai la masi. Lipungu la 6:1-10:32

Nnala uku Babeli. Lipungu la 11:1-9

Kuhuma kwaka Shemu mbaka Abulamu. Lipungu la 11:10-32

Aseja Ibulaimu na Isaka na Yakobu. Lipungu la 12:1-35:29

Ibeleku yaka Esau. Lipungu la 36:1-43

Josepu na alongu baki. Lipungu la 37:1-45:28

Bandu buku Izilaeli ebabiya atama ku Misili. Lipungu la 46:1-50:26