Skip to content
BibleKenya

Matengo Bible Version

Kukomboka 34

Kuwa kwaka Musa

Ndienu Musa jaboka kuubamba unndema uku Moabu, jajenda ku kitombi suku Nebu, jakwela ku lubekubeku luku Pisiga lolubii pambipi na Yeliku. Hapa ndi Bambu Sapanga anndangia nndema woti. Kuhuma ku Gileadi mbaka ku Dani, lieneu loti luku Nafutali, lieneu luku Efulaimu na Manasi, lieneu loti luku Yuda mbaka nhanga uku Meditelania, lungwenza luku Negebu ni lieneu luku ligomba luku Yeliku, musi uku Mitendi mbaka ku Soali. Ndienu Bambu Sapanga ampwagila Musa, “Gongo ndi nndema gola gonundagila Abulamu ni Isaka na Yakobu kubanga naapekiya ibeleku yabu. Nugulangii nndema gongo, lakini ngawihiki hoku.”

Ndienu, Musa ntumisi waka Bambu Sapanga jakuwa ku nndema uku Moabu, ngati Bambu Sapanga ejabiya jupwagiki. Bambu Sapanga anntaga. Anntaga mu ligomba luku Moabu, pambipi na musi uku Beti Peoli, lakini mbaka lelenu, ngakuba mundu jojumanyiki paantagiki. Musa jabii na yaka mia jimu ni ishilini pajakuwa, mihu gaki gabiii gakona gabii na makili gukulinga. Aizilaeli balobalakiya kuwa kwaki kwa masoba selasini mu nndema gupuubamba guku Moabu. Ndienu lisoba lukukanga luwai nukulobalake kwaki, gatenda kujomoka.

Joshua mwana waka Nuni jatweli loho ja malangu, kwa ndaba Musa jabiya ammbeki maboku. Ndienu Aizilaeli bunzetakiya Joshua nu kupwata malagalaki gaguge Bambu Sapanga jabiya ampeki Musa.

Tumbuka kipindi hesi ngasekupitii kabee mlota ku Izilaeli ngati Musa, jojuwe Bambu Sapanga jukubika julongee naku ngati mundu nu nkosi waki. Ngakuba nndota jongi jojabiya juhenga nginyuli ngati yela yeyuye Bambu Sapanga antuma Musa juhenga kwaka bambu nkolongu juku Misili, na akolongu baki nu mu nndema gwaki gwoa. Ngakuba nndota jongi jojuhengika majambu makolongu gukujogoo ngati ejabiya juhenga Musa palongi ja Aizilaeli boti.

Matengo Bible Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.