Skip to content
BibleKenya

Kwamashi

Tite 1

Kuvumenena

Yame no Paulu, mupika Nyambi karo kanganda ka Yesu Krisitu. Na ni tumiwa ku honga yo thsitawo kowa naa hangura Nyambi, no ku wa rongithsa ku dimuka oshemwa ou u wa twara mu ku yoya mwoyo o thsitawo. Ou oshemwa waa wa pa okurupero o mwoyo o diyere, ou a kumbwethzire Nyambi kaye o ku ka shime kumbiwa, aye shangera. Pano honi ko thsikati ethsi thsi na roera, naa u hokora ko diywi dyenthzi edi naa paka mu moko ange edi ni honga ko thsiraerera thsa Nyambi Muyoyithsi wetu.

Naa ñorera Tite, aye mwanange shemwa mu thsitawo omu tu na ciwanena.

Nyambi Tata na Krisitu Yesu Muyoyithsi wetu a ku pe thsihemo no thsiyaro.

Ekwama ya Tite mu Kirete

Eyi na ni ku thsiera mu Kirete po ci nga o manenene eyi na i thsiarera no ku hangura akuru mu mambongi oahe, eci edi na ni i ku raerera. Mutangereri o kereke aa roera kwikara o kupira kapongonyi, mukwerume oyu na yeke mbuyama yofoci, oyu di nana wakwakutawa, awa a na kana ku toyiwa mavangoka nji dikamba. Inene mutangereri o kereke po muendithsi o nthzio thza Nyambi, mweyo, aa roera kwikara o kupira kapongonyi. Ka a roerire kwikara no maranduru, nji kwikara no kacimacima, nji kwikara thsitakwa, nji kwikara o mushakararo, nji o rununa ro madi.

Uno honi aa roera kwikara o ku tambura nawa enda, o ku shima yoiwa, o ku cihenga, o muwawa, o mukenu, karo o mikarero thzothziwa. Aa roera ku tanarithsa maywi oshemwa aa naa rongithsiwa, ci naye a twethse ku tanarithsa amweya kerongithsa yoshemwa no ku kuturura awa a i rwithsa.

Inene kwa di anu owangi o dikamba awa a na kanyekanga yo kwithsa no kwangera, nenepo awa a na ootera yo mukanda. Aa roera ku tutwarithsiwa, inene aa anthzipithsa myanda thzothzihe mukaci ko ku rongithsa eyi a na kana ku roera ku rongithsa. Aa rongithsa yo ku fithsa honyi mukaci ko ku fota ku wanenapo madi. Yumweya kwakwakukethza wo shemwa naa amba ci: “AkwaKirete po anu o kwangera thsikati thsothsihe, ekondwama yo ku yapithsa, adyakudya owava.” Eyi naa amba po ya shemwa. Mweyo, o wa kuturure nene ci a tanare mu thsitawo. Aa roera ku thsia ku teerera matangu o Majuda neraerera yanu awa tunda mushemwa.

Kowa owakenu, enu yoihe ikenu, uno honi kwanu owamango nowa o kukana ku tawa, kwithsa yoikenu ku kwo, unone maano o no mimoneno thzo i na thsirekiwa. Aa amba ci a na dimuka Nyambi, unone ketenda yo aa mu hamura. Awo po anu owamango, o mukanayuva, awa a na kana ku roera ku tenda ngara ekwama yoiwa.

Kwamashi. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.