Skip to content
BibleKenya

Kwamashi

Mateu 14

Kufa kwa Johani Mukwakukorovethza

(Mar 6.14-29; Luk 9.7-9)

Mwethso thsikati Heroda fumu o mu Galilea wa yuvire ya Yesu. Wa amberire anduthzienthzi ci: “Oyu munu aa roera kwikara Johani Mukwakukorovethza. O na pinduka kwafu ngeyi ekarera nokoro o ku kwama ekomokithsa yo kengeyo.”

Heroda yodiyo karo wa tuminine ci Johani a kwatiwe, angiwe no ku pakiwa mu kamenga. Eyi a i tenderire eyi po mukaci ka Herodiasi munu wa minenthzi Filipu, inene Johani shime a mu amberangire ci: “Murao ka u tawethzire ci o mu yeke!” Heroda wa fotire kwipaa Johani, unone shime a yapire anu, inene wahe shime mu shimbire ci mukwakukethza.

Mu diyuwa dyo thsidika thso kwerekiwa kwa Heroda, mwana Herodiasi o mbuyamaana shime a kinine ku rupara ro mbunga. Heroda wa roerire nene kuninga ci mane wa mu kumbwethzire ko ku cethzera ngoro ci kenge a mu pa thsothsihe ethsi a romba. Kokuthza komu a ka mu hongerire mama wenthzi, oyo mbuyamaana wa rombire ci: “O ni pe mo muno mutwi wa Johani Mukwakukorovethza pa dironga.” Fumu wa i cinyengire nene, unone mukaci ko ku cethzera ngoro pa meho anu awa ethsire, wa tuminine ci ku tendiwe kengeyo. Wa tuminine ci a ka tete Johani mutwi mu kamenga. Mutwi wa retiwire pa dironga no ku na u pa oyo mbuyamaana, aye wa u twarire kwa mama wenthzi. Erongwa ya Johani ya thzire ku ka shimba erama yenthzi, no ku ka i vumbeka. Ngou a thzire no ku ka tongwera Yesu eyi ya tendaharire.

Yesu aekutithsa anu o 5,000

(Mar 6.30-44; Luk 9.10-17; Joh 6.1-14)

Yesu ou a yuvire eyi ya tendaharire, wa tundire omo mu ndau no wato, no ku thza kokumengi oku a kekarire yofoci. Unone mungi wanu ou a i yuvire a mu shupwerire no mauru ku tunderera mu mambongi. Ou a shamukire Yesu mu wato, wa monine mbunga thzothzikuru. Wa wa yuverire ñekeñeke no ku porithsa akwakukora wo.

Runguro odyo diyuwa, erongwa yenthzi ya keyire ku kwenthzi no ku amba ci: “Muno po mu murundu no diyuwa di na thzi, o kature anu a thze mu maumbo ci a ka ciurere edya.”

Yesu wa wa tawire ci: “Kwithsa eyi a thzera, mu wa pe edya yoyamwe.”

A mu tawire ci: “Shime makende mutanu no thsi thzidi tu di nayo.”

Yesu wa ambire ci: “Mu i ni retere kuno.” Wa amberire mbunga ci thzikare pa mwenge. Wa shimbire ao makende o mutanu no thsi thzidi, no ku diamena ku wiru ku kanderera. Wa kuyaurire ao makende no ku a pa erongwa yenthzi ci i ere anu. Wahe a dire no kwikuta. Erongwa ya yarithsire mayongo o dikumi na edi omwamwaethzi ou wa thsiarirepo. Kowa dire kwa tariwire pohuma akwerume o ku fota kukwana 5,000, ku tundithsako ambuyama nanuke.

Yesu aa enda pa meyu

(Mar 6.45-52; Joh 6.15-21)

Ko wanguwangu munyima thzeyi, Yesu wa raererire erongwa yenthzi ci i shamukere mu wato i citangethze mu thsambwadiya thzo diviya, aye o ku katura mbunga. Yesu ou a manine ku ciraa nanu, wa thzire pa mukinya yofoci ku ka rombera. Dyo peraurire pashi o ku ka diko yofoci. Wato o ku u ka endera kokure no dikambo, wa ndengandengithsiwire ku mañithsingi, inene shime a tambire oku dya tundererire dipepo.

Ruura Yesu wa thzire kwirongwa yenthzi o ku thza o enda pa meyu. Erongwa ou ya mu monine o ku enda pa meyu, ya yapire nene no ku kumba ko wowa ci: “Thsirumba!” Unone Yesu wa ambireno wangu ci: “Mu tanare micima, mwa yapa, yame!”

Peturu wa tawire ci: “Fumu, ngeci yowe shemwa, o ni tumine ni keye ku koe o ku ni enda pa meyu.”

Yesu wa mu amberire ci: “O keye!”

Peturu ngou a shamukire mu wato no ku enda pa meyu ku thza kwa Yesu. Unone ou a monine mañithsingi no mupepo oukuru edi wa pepire, wa yapire nene. Wa fotire ku thzera, ngou a kumbire ci: “Fumu, o ni yoyithse!”

Popo Yesu wa ororire dyoko ku mu kwata no ku mu ambera ci: “Ine eyi o tamangerera owe shopu thsitawo?”

A shamukerire mu wato momu widi wo, no mupepo wa ongire. Erongwa ngou yekarire mu wato, ya tongamine ku manwi ku rupara rwa Yesu no ku amba ci: “Yoshemwa yowe o Mwana Nyambi.”

Yesu aa porithsa anu mu Genesareta

(Mar 6.53-56)

A yavukire, no ku ka thsekera mu ditunga dya Genesareta. Anu o muya mu ndau ou a dimukire Yesu, a tumithsire maywi o kukuma kwenthzi muya mu ndau thzothzihe. Anu a retire akwakukora wo ci na a wa porithse. Anu a adikanenine Yesu ci a wa tawethze shaanga ku kwata ku munganja o thsikoveyo thsenthzi. Awa kwatireko wahe a porire.

Kwamashi. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.