Mareka 11

Yesu aengena mu Yerusalema

(Mat 21.1-11; Luk 19.28-40; Joh 12.12-19)

1O kwa kokera ku Yerusalema, po pepi no maumbo a Betifage na Betania pa Mukinya wEtondo yo Miywera, Yesu wa tumine idi kwirongwa yenthzi ku citangethza. 2Wa i amberire ci: “Mu thze muya mu diumbo di di pa rupara, popa mu kengenamo, kenge mu ka wana thsindongiana ethsi thsi na fungiwa, ethsi a kana ku pahama munu. Mu ka thsi puture no ku thsi reta kuno. 3Yomuhe oyu ka mipura ci: ‘Ine eyi mu tendera kengeyo?’ Mu ka mu ambere ci: ‘Fumu na thsi foto karo aa ka thsi huthsa popano.’ ”

4Ya thzire no ku ka wana thsindongiana ethsi thsa fungereriwire pora pa thsero thzo nthzio, ku mbadi thzo dikuñwa. 5Anu amweya awa emanine apo, a ipurire ci: “Ine eyi mu kwama, mwaa thsi putwera ine ethso thsindongiana?” 6Erongwa ya tawire eci edi a i amberire Yesu, a i tawethzire ci i thze nathso. 7A retire thsindongiana kwa Yesu, no ku yarapo ekoveyo yo, Yesu ngou a pahaminepo.

8Anu owangi a yarire ekoveyo yo mu mukwakwa, amweya a yarire mapukumuna aa a ka tetire mu makanda. 9Awa a tangerire ku rupara nowa thsiarerire munyima a kuererire ci:

“Hosana!1

Wa thsiyauthzi oyu keya mu dithzina dya Fumu!

10“Kwa thsiyauthzi Kutumina kwa tata wetu Davida oku ku keya! Hosana mu diwiru!” 11Yesu wengenine mu Yerusalema no ku thza ku Tembere. Ou a manine ku rondorora enu yoihe, wa tundiremo pakuninga ci nedi kanguronguro. Ngou a thzire nerongwa yenthzi yo dikumi na idi ku Betania.

Yesu aa kuta thsitondo thsokuyu

(Mat 21.18-19)

12Diyuwa edi dya randireko o kwa tunda mu Betania, Yesu wa yuvire nthzara. 13Wa monine thsitondo thsokuyu ko kure kamanana, ethsi thsekarire no mamuna oangi. Ngou a thzireko ku ka mona ci kenge nga a wanako ñuyu. Unone ou a ka kumineko ka a ka wanineko thsimweya shime mamuna pohuma, inene nedi kadi thsikati thso kwima. 14Yesu ngou a amberire ethso thsitondo thsokuyu ci: “Mbera kwa dya munu ñuyu ku koe karo!” Erongwa yenthzi ya yuvire ao maywi.

Yesu aa kanithsa ku urithsera mu Tembere

(Mat 21.12-17; Luk 19.45-48; Joh 2.13-22)

15Ou a kumine mu Yerusalema, Yesu wengenine mu Tembere no ku tateka ku cithzacithzamo awa a urithsire nowa a urire. Wa thzire o thsindathzekera pashi matafure owa cinjire madi, nepura yowa a urithsire mayembe. 16Ka a tawethzire munu ku pitithsa muuro mu dirapa dyo Tembere. 17O ku wa rongithsa, wa wa amberire ci: “Ene ka ya ñoriwa ci: ‘Nthzio thzange kenge mba thzithsiwa nthzio thzerombero thzo mambunga oahe’? Unone amwe mwaa thzi pirura macihoreko ethzi.”

18Akuru o mapurisita narongithsi o murao ou a i yuvire eyo, a tatekire ku ceka dyo ku mwipaa. Inene shime a mu yapire mukaci kerongithsa yenthzi eyi ya komokithsire mbunga thzothzihe.

19Runguro Yesu nerongwa yenthzi a tundire mu thsikuña.

Erongithsa yo thsitondo thsokuyu

(Mat 21.20-22)

20Mathsikuthsiku diyuwa edi dya randireko o kwa pita kengeyo mu dikuñwa, a monine thsiya thsitondo thsokuyu ci thsi na kukuta ku tatekera ku mithzithzi. 21Peturu ngou a vurukire eyi ya tendaharire, wa amberire Yesu ci: “Ñathsire wange, o mone uya okuyu no kutu u na kukuta!”

22Yesu wa i tawire ci: “Mwikare no thsitawo kwa Nyambi! 23Naa mi tongwera yoshemwa ci yomuhe o ku ambera ou mukinya ci: ‘O thzuruke o ka cikonthzere mu diwate,’ karo kadi wa ku tamangera mu mucima wenthzi, unone aa tawa ci eyi a na amba kenge i tendahara, kenge a ku i tendiwera. 24Mweyo, naa mi ambera ci yoihe enu eyi mu romba ko thsirombero mu kurupere ci mu na i piwa, karo kenge ya kwikara yenu. 25Yoihe mwimana ku rombera, mu tange tango ku tetera yomuhe oyu naa mipithsera ci Tata wenu o mu wiru a mi tetere namwe mirandu thzenu. 26[Unone ngeci kadi mwakwa ku tetera awa a na mipithsera, Tata wenu o mu wiru naye ka a ku mi tetera mirandu thzenu.]”2

Yesu aepuriwa pokoro wenthzi

(Mat 21.23-27; Luk 20.1-8)

27A kumine mu Yerusalema karo, Yesu o ku endaura mu dirapa dyo Tembere, akuru o mapurisita narongithsi o murao nakuru o mbunga a keyire ku kwenthzi. 28A mwipurire ci: “Kokoro upi ou tenda eyi enu eyi? Karo edye naa ku pa okoro o ku i tenda.”

29Yesu wa wa tawire ci: “Ni mipure ngudi thzofoci, ngeci o mu ni tawe, name kenge ni mi tongwera ou okoro ni kwamithsa eyi. 30Okoro wa Johani o ku korovethza ne waa tunda ku wiru nji kwanu? Mu ni tongwere.”

31A i ciyongorire mu kaciko, no ku amba ci: “Ngeci o tu ambe ci: ‘Waa tunderera ku wiru,’ aye kenge a twipura ci: ‘Ine eyi na mu kana ku tawa yenthzi?’ 32Unone ngeci o tu ninge ci: ‘Waa tunderera kwanu?’ ” Apo honi shime a yapire anu, inene wahe a tawire ci Johani nedi mukwakukethza shemwa. 33Ngou a tawire ci: “Ka tu dimuka.”

Yesu wa ambire ci: “Name ka ni mi tongwera oukoro ni kwamithsa eyi ci waa tunda kupi.”