Skip to content
BibleKenya

Kwamashi

AkwaKolose 4

Añathsire, mu tende apikenu nawa karo mu wa tende omu ku na roera, inene mu na dimuka ci namwe mu di no Ñathsire mu wiru.

Eraerera imweya

Mu tanare mu ku rombera, mu mamere no ku kanderera. Karo mu tu romberere natwe ci Nyambi a tu yanthzurwere thsero ci tu rongithse yo diano dyenthzi keyi ya Krisitu, ayo eyi ni nekarera mu kamenga pano. Mu rombere ci ni i rongithse ko ku yuvahara, komu ni na roera ku tendera. Mwikare owanyanyami mu kaci kanu o kukana ku tawa, o ku mu cikwathsithsa nawa thsikati thsothsihe. Kaambero kenu kekare ko thsihemo, karo kekare ko ku roerithsa ci nga mu dimuke ku tawa nawa munu yomuhe.

Kuvumenena ko mamaneneno

Tikike kenge a ku na mi tongwera keyi yange yoihe. Muenthzetu oyu twa shima karo ngamba o ku rurama oyu kwamena pofoci nange mwikwama ya Fumu. Eyo ngeyi ni mu tumena ku kwenu ci naa mi tanarithse micima ko ku na mi tongwera edi tu di kuno. Aa keya na Onesimasi, muenthzetu oyu twa shima o ku rurama, yumweya o ku kwenu. Kenge a ku na mi tongwera enu yoihe eyi i tendiwa kuno.

Arisitako muenthzange thsinthzinda aa mi vumenena, no Mareka kengeyo mwepwa Banabasi. Eci diya mwa raereriwire, mwa ku na mu tambure nawa ngeci waa ku keye ku kwenu. Yesu oyu nethsiwa Jusitasi naye aa mi vumenena. Awo ahatu wodiyo pohuma Majuda awa kwamena pofoci nange yo Kutumina kwa Nyambi. Karo awo na ni huu mucima.

Epafurasi yumweya o ku kwenu no mupika Krisitu Yesu, aa mi vumenena. Aa vendananga thsikati thsothsihe ku mi rombereranga ci mu tanare keshima ya Nyambi, mu kure no kwikara no ku tawa shemwa eshima ya Nyambi yoihe. Naa pa ombangi o kuninga ci aa mi kwamena nene mofoci kengeyo nowa o mu Laodisea no mu Hierapolisi.

Luka, mukwakupanga, aye mushimiwa, na Demasi aa mi vumenena. Mu ni vumenenene aenthzetu o mu Laodisea noyo mbuyama Nimfa, mofoci kengeyo no kereke ethzi thzi na ciwanenanga mu nthzio thzenthzi.

Munyima thzo ku mi varera edi diñoro, mu mone ci dyaa ka vareriwa karo no mu kereke thza Laodisea. Karo namwe mwa ku vare diñoro edi na ni wa ñorera.

Karo mu tongwere Arikipo ci: “O mone ci waa manenena ekwama eyi no piwa kwa Fumu.”

Ame no Paulu naa ñora oku kuvumenena ko dyoko dyange. Mu vuruke madyenge ange. Thsihemo thsa Nyambi thsikare nenu.

Kwamashi. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.