Skip to content
BibleKenya

Kwamashi

Etenda 6

Akwerume o mutanu naidi aa hanguriwa

Mwao mayuwa, erongwa ou ya thzire o vura, kwekarire kooko mu kaci ko Majuda o Thsigerike no Majuda o Thsiheveru. Majuda o Thsigerike a ningire ci mafakathzi o ka a erangire nawa kwikwathsa eyi ya eriwangire diyuwa no diyuwa. Tunganda to dikumi na twidi ngou twethserire mbunga thzakwakutawa pofoci no ku amba ci: “Ka ku roerire ci tu thsie ku rongithsa diywi dya Nyambi ci tu erange edya. Mweyo, andengenu, mu hangureko akwerume o mutanu naidi mukaci kenu awa na remekiwa, awa na yara Mupepo Oukenu nonyanyami awa tu pa eyi ekwama. Atwe tu mone pohuma yo ku rombera no ku rongithsa diywi dya Nyambi thsikati thsothsihe.”

Eyi twa ambire tunganda ya roerithsire mbunga thzothzihe. Ngou a hangurire Setefani mukwerume oyu wa yarire thsitawo no Mupepo Oukenu, Filipu, Porokoro, Nikanora, Timoni, Paramena no Nikolasi o ku Antioke, Munukenge oyu wa cipirurire Mujuda. Ngou a wa retire pa meho o tunganda, awa a wa rombererire no ku wa kambeka moko.

Diywi dya Nyambi dya twarire ku rupara ku henya. Taro thzerongwa thza vurire nene mu Yerusalema, no mapurisita owangi a cipakire ku thsitawo.

Setefani aa kwatiwa

Setefani, mukwerume oyu wa yarire thsihemo nokoro wa Nyambi, wa kwamine ekomokithsa yoikuru nemonithso mu kaci kanu. Unone anu amweya o mu sinagoge thzAkwakurukuruka (eci edi thzethsiwire), Majuda o ku Sirene no ku Alekisandiria mofoci kengeyo nakwa Silisia nakwa Asia a tatekire ku cikanyeka na Setefani. Unone a kwangire ku tata onyanyami no Mupepo ou a ambithsire.

Ngou a hongaurire anu ku mukunda ci a ambe ci: “Shime twaa mu yuva o ku yengwera Mushe na Nyambi.” Eyi ya anthzipithsire anu nakuru narongithsi o murao. A kwatire Setefani no ku mu purututa ku mu twara mu Nthzango.

A retire mambangi o mbango awa ambire ci: “Oyu munu oyu thsikati thsothsihe aa yengweranga thzino Tembere thzo shokenu no murao wa Mushe. Inene shime twaa mu yuva o ku amba ci: ‘Oyu Yesu wa Nazareta kenge a ku umburura thzino Tembere no ku pirura ethsemwa eyi a tu thsierire Mushe!’”

Wahe awa ekarire mu Nthzango a rupukerire Setefani, a monine ci rupara rwenthzi rwa monaharire eci ro kangeru.

Kwamashi. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.