3 Johani 1

Kuvumenena

1Edi diñoro dyaa tunda ku kwange ame no mukuru. Naa ñorera Gayusi oyu na shima mushemwa. 2Mushimiwa wange, naa rombera ci enu yoihe i ku endere nawa no kwikara nawa mwirama eci edi ni na dimuka ci waekara nawa mu mupepo. 3Shime naa na roera nene uya na keya aenthzetu no ku na tongaura edi o na rurama nedi o na twarerera ku enda mushemwa thsikati thsothsihe. 4Kwithsa ethsi thsi na ni nyanyukithsanga nene eci ku yuva ci anange aa enda mushemwa.

Ku vavarera akwakukwama ya Nyambi

5Mushimiwa wange, waa rurama mwikwama eyi o kwama kwaenthzetu, shaanga ci enda. 6Na na tongwera kereke thsishimo thsoe. Naa ku romba ci o wa fundure mu ruendo rwo ko dikuñwa edi nga di roerithsa Nyambi. 7Mu ruendo a di mukaci ko dithzina dya Krisitu, ka tamburangire ekwathsa kwakwakukana ku tawa. 8Mweyo, atwe twa Makrisitu twaa roera ku kwathsa anu o kengeyo, ci tu kwamene pofoci mushemwa.

9Shime naa ñorera kereke, unone Dioterefi oyu na shimanga kwikara ku rupara ka a fotire ku cipakerera netu. 10Ou na ku keya, kenge na ku na tongora eyi a kwama neyi yoimango eyi a tu shangethza. Ka a kanine pohuma ku tambura akwakutawa amweya awa di mu miendo, unone aa kanithsanga nowa a na foto ku kwama kengeyo no ku wa tundithsa mu kereke.

11Mushimiwa wange, wa temununa yoimango, unone o temunune yoiwa. Yomuhe o ku kwama yoiwa a tunda kwa Nyambi, karo yomuhe o ku kwama yoimango ka a mona Nyambi.

12Anu wahe aa shangara Demetiriusi karo noshemwa nao wa tenda kengeyo. Natwe twaa twethsa ku amba kengeyo yenthzi karo o na dimuka ci twaa ambanga yoshemwa.

13Ni di neyi yoingi yo ku ku ñorera, unone ka ni fotire ku i ñora no thsiñorithso no enge. 14Naa kurupera ci ni tamba ku ku mona, mweyo, kenge twa ku na ambaura o ku tu na citanekera.

15Thsiyaro thsikare noe. Ambushoe kuno aa ku vumenena. O tu vumenenene ambushetu ko mathzina o.