Skip to content
BibleKenya

Yové Koĩni Vana

Tiago 5

“Ramaro mãaimai shokoya kakáyavorasĩní, nĩkãtsoma. ‘Noke ichnák pakékatsíkĩ’, iinã naípai wai itsoma. Matõ awerasĩro patóyarvi. Õpo pashpi roapa ivorasĩ ichnáya, osõ piátõ ikí. Matõ ouro prata akárasĩ ichnái, pae okõvaĩi. Aaivo awẽ mã txipoásho txii txichkóatõ ikí mato keyokatsa. Keyókaĩa shavapa, Yové Koĩni awe pae okõa ivo oĩsho mato yostakatsa.1 Matõ waĩ mee ikiyavorasĩ, ato mã roa akĩ kopímamatõsho naí atõ txakar imaĩnõ Yové Weeya Ivõ ato nĩkãai. Naaivo mai shavapashõ awe roapatõ aweyái, marí mã roakatõ ishõ vesokõi akaya mato, ‘txasho yamamanosho’, iinã chaomatõ ikí. Yora, ãwẽ ichná yamamẽkĩ yora meki akaya ivo kakáyanamã mã ewevaĩshoatõsho, ãatõ ‘minõ ichná neevere’, ikĩ yoãshomíska, mĩ yonoatõ akĩ. Aaivorasĩ askásevi, ‘noke yamamashõ’, iinã mato aomtsãwasevi, teamasmẽkĩ”, iinã mato ẽ aká, mãaimai shokoya kakáyavorasĩní.

“Askásho atovõ mato yomãnamásmẽkĩ Yora Ivo oátishõi wenái shokotsomároa, takevó. Piti merámaiyaro aská chinãtso. Ãatõ vanavaíki oi txitavía ivo manái, enékaĩa manái avaikĩ ãwẽ ikaĩya ivo manáorívi. Askásho ‘Yora Ivo omakéaitserã’, iinã wenáimai shokoi, matõ chinã mestẽ mestẽ iskoĩtsoma.

Wetsaro, marímamẽ ichnánanãtsomároa. Enékaĩanamãsho mã ichná ivorasĩmẽ Yora Ivõ mato kayá amísi. Aarvi yora meki akaya ivo kakáya. Ma omakéaivere. Wetsaro neská akĩse mato ẽ tanáoshonõ, yomãa tanasmẽina wenáimai shokoa ivo. Yové Koĩni vana teki akayavorasĩro, ‘neskái vanatsoma’, iinã ato yonoatõsho ãwẽ vana yoãpaóvo. Atovo onís awei shokosmẽinã tenetivo. Yora, yomãnasmẽinã ‘Jesustxõiro ea enétĩpá’, ikiyaro noke anõ eséyamískatserã? Jó yoãnáa mã nĩkãyatĩ. Aaro enéti chinãsma ãwẽ nimaĩnõ Yora Ivõ enékaĩanamãsho roapa ivo ashõti. Aaro awesáma, yora onis akaipá, Yora Ivoro.

Askávaíse anipa ivo wetsa mato ẽ yoãoshonõ. ‘Ẽ vana anõserá’, ikĩ ato oĩmakatsiinãro, ‘ẽ ashõma ivoro Yové Koĩni, ioiro yora wetsãse ea yostatikĩ ẽ iki’, itsomároa. ‘Nõ anõ’, iinãro akí, ‘ashõmasnõ’, iinãro ashõma atsoma, Yové Koĩni anõsho mato kayá amísi.

Askámaĩnõ, mato wetsase ichnáse tanainãro, Yové Koĩ tanamatsoma. Wetsase mekípakĩ chinãi shokoshoro, aa ravii koká itsoma. Isĩ teneinãro, Jesusmẽ txipoyavo kakáya ivorasĩ kenatsoma. Atovõ Yora Ivo Jesus vana ashõvaíki ãwẽ anemẽsho shenĩ ave mavó aonõvo, aaivo yora. Yora Ivo anõ ashõ atõ vanamaĩnõro, ãatõ isĩ matsi akĩ tsaõníkatsa. Askámaĩnõ anõ itimatõ ãwẽ ishõ, isĩ teneshoro, ‘anõse, ea kanéai’, ikĩ yoãshoáro, Yora Ivõ, ãwẽ ichná neeakiri chinãshoóma ikatsai. Askásho anõ itimatõ ishõro wetsarasĩ tanamai, Yové Koĩ tanamashõi, akinanãtsoma, isĩ roanoshõ. Chinã meki ivo yorã Yové Koĩ ãwẽ tanamáaro, ãatõ weeyashõ ashõkatsa. Elias askáoti chinãtsoma, Yové Koĩni vana teki akayanã. Aaro nokenĩ yorarvimẽkĩ ano maĩ ‘oi imaroa’, iinã tavámatĩpá aweki Yové Koĩ tanamati. Ãwẽ aská akatõsho 3 varivaí wetsa potxini oi itãma. Aská ashõ txipo ãwẽ tanamaoáse, oi ãwẽ imaa, mai roakéi, atõ piti vanárasĩ iovaĩóti”, iinã mato ẽ yoãshoá.

“Askávaíse, mato wetsase anõpa ivo vana ãwẽ enemaĩnõro wetsã ãwẽ chinãne arimẽse mato imakeóro, neská, yora mã shavá amaorívi, vai ichnátõ shokoasmẽkĩ. Mã aská amaĩnõ Yové Koĩni ãwẽ ichná neea ivokiri chinãoshoáma ikatsai”, iinã mato ẽ yoãshoávere, takevó, aatíise.

Source notes (1)
  1. Footnote “Pae okõa”, ikíro neskásho ãwẽ ikí. Yora awẽ mãaimai shokoya kakáya ivorasĩni kopímati, awerasĩ akáse yora anõ onis akĩma kãtxiki ãwẽ ichnámáa ivo yoã.

Yové Koĩni Vana. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.