Yové Koĩni Vana
Gênesis 16
Ismael vaketi ivo yoã
Abrão ãwẽ aĩ Saraimẽsho vakema niá. Ãwẽ aĩni mee ima aĩvoro, Hagar, Egito shavo. Askáki shavá wetsã Saraĩ ã vene tanamakĩ. “Yavepa vake noke inãmaka, askásho ẽ mee ima aĩvo oĩtso, anõshoro taíse vake mĩ meramaĩnõ, enákékatsa”, akĩ. Ãwẽ aská akatõsho, ãwẽ aĩni vana anõ akĩ. Aská akĩ ãwẽ mee ima aĩvo, ã vene eneshokĩ. Aatiã ã vene Canaã maĩ 10 vari tavái nii. Askái ã vene Hagarnĩ ãwẽ meenanãase, tooinái. Ãwẽ tooa tanainã, aa toĩya ichnakéki.
Askámaĩnõ Saraĩ ã vene aská akĩ. “Mĩ chinãneshõ Hagarpa ea ranokasmakésai. Eãvisi mia ẽ eneshochĩamẽkĩ, tooináki ea aská aka. Yavepa noke ave oĩnõ, tsoaraki kanéya, ea taíse, mia taíse”, akĩ.
Ãwẽ askámaĩnõ ã venero, “roase, aa yonoya miarvi, mĩ awesakatsíki mirí chinãtso”, akĩ. Anosho Saraĩ ã mee ima ivo roa atãtãmatõsho kayai.
Askái ãwẽ kamaĩnõ Yavepa Yonoa Yovepa askata wenẽ, Sur vai kesó vaná wakanamãsho meramashõ nĩkãki. “Hagarpá, Saraĩ mee ima ivó, atonamãsho oshõ, awetokiri mĩ kaarkĩ?” ãwẽ imaĩno, “ea toĩya ẽ kayashovarãai”, akĩ.
Ãwẽ aská nĩkãinã, “iokaĩta, arimẽse mia toĩyanamã. Mia ãwẽ yonoarasĩ katsése ashõtso, ãwẽ vana tavámaóroa”, akĩ. Askái vanaóki. “Minõsho revokaĩyarasĩro eã ato ẽ ãtsa akatõsho, yorã ato tanátĩpa ikatsai. Naa mĩ too nanéa venevake pakékatsavere. ‘Ismael’ akĩ anetso.1 Awesáma, onís awei mĩ txakar imaĩnõ Yavepa mĩ oi nĩkãyasho ikí. Askái naaivo vake yoini rawema keská ivo ikatsai. Nerishõ atonĩ ãwẽ ichnánanãmaĩnõ, orishõ atovõ ichnáókatsavo. Arí ãwẽ wetsamavorasĩnĩ roaka ikinãnãiamai nikatsai”, akĩ Yavepa.
Askámaĩnõ Hagarpa Yavé ane wetsã aneóki. “Miaro katsése oĩya ivo Yové”, akĩ.2 Askái, “ii anõserá, ãatõ ea oĩvaĩvaĩa keskásevi akĩ eã ẽ oĩóaisevi”, akĩ. Askásho aaivo vaná waka Cadesnĩ Berede tõovakĩ tsaóa ivo anémtaro “Beer-Laai-Roi”, akĩ anemtá.3
Askávai txipo, Abrãone Hagarmẽsho venevake merasho, “Ismael”, akĩ aneki. Aatiã Abrão 86 vari aya.
Source notes (3)
- Footnote Hebraicõ vana “Ismael” ikíro “Yovepa nĩkãmtsãwa”
- Footnote Hebraicõ vanaro “El-Roi”
- Footnote Hebraico vana, “Beer-Laai-Roi” ikíro “nishõ ea oĩyatõ vaná waka”
Yové Koĩni Vana. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.