ቢያፓ ባሼ ዓይኑሞ 3

1ዋንቶ ጉቤ ሻኣሎይዳ ታ ላሃዖ

ዒናፓ ታ ናሽኬሢ ታኣኒ ኮዔኔ፤

ታ ኮዔኔ፥ ጋዓንቴ ታ ዒዛ ዴንቂባኣሴ።

2ሃሢ ታኣኒ ዔቂ ካታሞ ኬስካንዳኔ፤

ዼኤፖ ጎይፆና ዓሳ ቡካ ጶኦኮናይዳ ታ ሃንታንዳኔ፤

ዒናፓ ታ ናሽኬሢ ታ ኮዓንዳኔ፤

ታ ዒዛ ኮዔኔ፥ ጋዓንቴ ታኣኒ ዴንቂባኣሴ።

3ዒማና ካታሞ ሳዛ ሃንታ

ካታሞ ካፓ ዓሳ ታና ዴንቄኔ፤

ታኣኒያ ዔያቶ ኮራ

«ዒናፓ ታ ናሽካ ናዓሢ ዒንሢ ዴንቂያ?» ጌይ ዖኦጬኔ።

4ዔያቶይዳፓ ዻካ ታ ዓኣዻዖ

ዒናፓ ታ ናሽካሢ ታኣኒ ዴንቄኔ፤

ቶሉዋጉዲ ዶዲሺ ታ ዒዛ ዓርቄኔ፤

ዬካፓ ታ ዒንዶ ማኣሪ ታ ዒዛ ዔኪ ዓኣዺ

ታና ፔ ጎጳ ኬዴ፥ ታ ዒንዶ ቆልዖ ሄሊሳንዳኣና

ታ ዒዛ ሃሺባኣሴ።

5ዒንሢ ዬሩሳላሜ ዉዱራሢ!

ታ ናሽካሢ ፔኤሮ ኮዓንዳያ ሄላንዳኣና

ዒንሢ ዒዛ ካኣሚ ጴቹዋጉዲ

ካዮ ቦዖ፥ ዶቆዞና ሞይሎ1 ሱንፆና

ታ ዒንሢ ሺኢቃኔ።

ሃይሣሳ ዓይኑሞ

6ኮርሞ ዓሶኮ ሳውቃ ዼኤሾጉዲ ቃራ ሳውሞ ዓኣ

ዑንጄና ኬርቤ ጩቦናጉዲ ዔቂ

ዓሳ ናንጉዋ ዳውላፓ ሙካዛ ዬና ዖናዳይ?

7ሃይሾ፥ ሴሎሞኔኮ ሳርጌሎ ዖይታ ሙኪ ሙኪኬ፤

ዒስራዔኤሌኮ ዖሎና ዔርቴ ዓሶ ባኣካፓ ዶኦሪንቴያ

ዒዞ ካፓ ላሂታሚ ፖኦሊሴ ዎላ ዓኣኔ።

8ቢያሢ ጬንቾ ዓፓሮና ዖልቶ ጎይፆ ዔሬያ

ዖልዚናኣ ኮሺ ዔርቴያኬ፤

ዹሞና ሄላኒ ዳንዳዓ ሜቶ ቃዛኒ

ፔቴ ፔቴ ጬንቻ ዓፓሮ ኬርና ዔያታ ቱኡቲ ዓኣኔ።

9ካኣቲ ሴሎሞኔ ፔኤም ሳርጌላ ዖይታ ኮሼኔ፤

ዒዚ ኮሼሢያ ሊባኖኦሴ ሚፆናኬ።

10ዬያ ዖይቶኮ ቶካ ቢራ ዓንጊና ጳርቂንቴያኬ፤

ቶኦኮ ጌኤቂሶሢያ ዎርቄና ኮሾናያኬ፤

ዒ ዴዓ ቤዛኣ ዞቄ ዲንኪ ሻኣዣ ዓፒላና ካንቂንቴያኬ፤

ኬኤፆ ጋራ ዬሩሳላሜ ዉዱራሢ ሚዛጲሴያኬ።

11ዒንሢ ፂዮኔ ዉዱራሢ! ካኣቲ ሴሎሞኔ ዛጋኒ ሃኒ ኬስኩዋቴ፤

ካኣቲ ሴሎሞኔ ፔኤኮ ቦንቾሮ ዓጎ ባኮ ዓጊ ዓኣሢ ዛጉዋቴ፤

ዒዛኮ ዬይ ቦንቾሮ ዓጎ ባካ ዒና ዒዛኮ ዎዛዼ

ዒዛኮ ዔፖ ዓቤሎና ዒንዳ ዒዛኮ ቶኦካ ዓጌ ቦንቾ ባኮኬ።