ጌኤዦ ማፃኣፖ
ዓይኑሞ ማፃኣፖ 99
ፆኦሲ ዼኤፒ ካኣቲ ማዔሢ
ናንጊና ናንጋ ጎዳ ካኣታዼኔ፤
ዴራ ጎጋይቆንጎ፤
ዒዚ ኪሩቤኤሎ ዑፃ ዓኣ ካኣቱሞ ዖይታ ዴዔኔ፤
ሳዓኣ ዓጊፆንጎ። 1
ናንጊና ናንጋ ጎዳ ፂዮኔይዳ ዼኤፒኬ፤
ዴሮኮ ቢያ ዑሣ ዒ ዼግ ዼጊ ጌዔኔ።
ኔኤኮ ዔያታ ዼኤፑሞና ዒጊቻ ሱንፆና ሄርሾንጎ፤
ዒዚ ዱማዼያኬ።
ፒዜ ዎጌ ናሽካ ዎልቆ ካኣቲዮ!
ኔኤኒ ፒዜ ባኣዚ ማዺንታንዳጉዲ ማሄኔ፤
ፒዜ ዎጊሢና ፂሉሞና ያይቆኦቤ ዓሶም ዔኪ ሙኬኔ።
ናንጊና ናንጋ ጎዳ ማዔ ኑ ፆኦዛሢ ዼግ ዼጊዱዋቴ!
ቶካ ዒዛኮ ሄርቃ ሳዖይዳ ዚጉዋቴ!
ዒዚ ዱማዼያኬ።
ዒዛም ቄኤሶ ማዔዞንሢ ባኣካ ሙሴና ዓኣሮኔና ዓኣኔ፤
ሃሣ ዒዛ ሺኢቄዞንሢ ባኣካፓ ሳሙዔኤሌ ፔቴሢኬ፤
ዔያታ ናንጊና ናንጋ ጎዳ ዔኤላዛ
ዒዚ ዔያቶም ማሂ ዬሄኔ።
ቱርቱሮጉዲ ዔቄ ሻኣሮ ባኣኮይዳ ዒ ጌስቴኔ፤
ዔያታኣ ዒዚ ዔያቶም ዒንጌ ዳምቦና ዎጎና ካፔኔ። 2
ናንጊና ናንጋ ጎዳ ማዔ ኑ ፆኦዛሢዮ!
ኔኤኒያ ዔያቶም ዬሄኔ፤
ኔ ዔያቶኮ ዻቢንቶሮ ኮሜ ኮፃያ ማዔቴያ
ኔኤኒ ዔያቶም ዓቶንጎ ጋዓ ፆኦሲኬ።
ናንጊና ናንጋ ጎዳ ማዔ ኑ ፆኦዛሢ ዼግ ዼጊዱዋቴ!
ዒዛኮ ዱማዼ ዹካ ዒዛም ዚጉዋቴ፤
ናንጊና ናንጋ ጎዳ ማዔ ኑ ፆኦዛሢ ዱማዼያኬ።
Source notes (2)
- Cross-reference ኬሲ. ማፃ 25፡22።
- Cross-reference ኬሲ. ማፃ 33፡9።
ጌኤዦ ማፃኣፖ. Copyright © 2008 The Word for the World International and The Bible Society of Ethiopia. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.