ዓይኑሞ ማፃኣፖ 75

«ባይዚፖ» ጌይንታ ዓይኑሞና ዓይኑሞ ሱኡጋሢ ዓይሣ ጎይፆ ዓይናዺንቴ ዓሳኣፔኮ ፆኦሲ ሄርሺፆ ዓይኑሞ

ፆኦሲ ዎጋያ ማዒፆ

1ፆኦሲዮ! ኑኡኒ ኔና ጋላታኔ፤

ኔኤኒ ሃንጋ ኑ ባንሢ ዑኬሢሮ

ኔ ሱንፆም ኑ ጋላታ ሺኢሻኔ፤

ኔ ማዼ ዲቃሢ ሄርሺሳ ማዾ ኑ ኬኤዛኔ።

2ኔኤኒ፦ «ታኣኒ ዎጌ ዎጋንዳ ኬሊ ሜንሤኔ፤

ዬኖ ዎዶና ፒዜ ታ ዎጋንዳኔ።

3ሳዓ ዓጊፄታቴያ

ዒኢካ ዓኣ ማዢንታ ጎጋይቄቴያ

ታኣኒ ሳዖኮ ዓይፆ ዶዲሻኔ።

4ዖቶርቃዞንሢያ ‹ዒንሢ ሄርሺንቲፖቴ›

ፑርቶ ዓሶዋ ‹ጪኢዺንቲፖቴ› ታኣኒ ጋዓንዳኔ፤

5ፆኦሲ ዑፆይዳ ኔና ዼግ ዼጊዲፖ፤

ሃንጎ ሃሣ ዖቶርቂ ጌስቲፖ» ጌዔኔ።

6ዎጌ ዓባ ኬስካ ባንፃፓ ማዖም ጌላ ባንፃፓ

ጊንሣ ሃሣ ዓሲ ናንጉዋ ዳውላፓ ሙኩዋሴ።

7ፔቴሢ «ዻቤኔ» ጌዒ ዎጋሢ

ባጋሢ «ዔኤቢ ኔኤኮ ባኣሴ» ጌዒ

ፒዜ ዎጋሢ ፆኦሲኬ።

8ዑዦ ዑሽኮ ዓንጋ ናንጊና ናንጋ ጎዳኮ ኩጫ ዓኣኔ፤

ኮይሳሢጉዲ ጊኢጊሾና ዱባዻ ዎይኖ ዑዣ ኩሚ ዓኣኔ፤

ዬያ ዒ ዓንጋፓ ላኣላዛ ሳዖይዳ ዋይዞ ዒፃ ዓሳ

ሞጮዋ ዓይሱዋዖ ጋፒሲ ዑሽካንዳኔ።

9ታኣኒ ጋዓንቴ ዬያ ናንጊና ኬኤዛንዳኔ፤

ያይቆኦቤ ፆኦዛሢም ዓይኑሞ ሺኢሻንዳኔ።

10ፑርቶ ዓሶኮ ካኣሮ ቢያ ታ ሜንሣንዳኔ፤

ፂሎ ዓሶሲ ጋዓንቴ ዼግ ጋዓንዳኔ።