ጌኤዦ ማፃኣፖ
ዓይኑሞ ማፃኣፖ 6
ዓይኑሞ ሱኡጋሢ ዓይሣ ጎይፆና ሳሊ ሻሺ ጎኦላና ዓይናዺንታ ዳውቴ ዓይኑሞ
ሜቶ ዎዴና ሺኢቂንታ ሺኢጲሢ
ናንጊና ናንጋ ጎዳሢዮ! ኔ ዻጎና ታና ጎሪፖ፤
ኔኤኮ ታሞጉዴ ዻጎና ታጊዳ ሜቶ ዓጊፖ። 1
ናንጊና ናንጋ ጎዳሢዮ! ታኣኒ ላኣፓታሢሮ ታና ሚጪንቴ፤
ሜጌፃ ታኣኮ ኮልኮልቄሢሮ ሃዳራ ታና ዓውሴ።
ናንጊና ናንጋ ጎዳሢዮ!
ሼምፓሢ ታኣኮ ጉቤ ካራ ባይዚ ሜታዼኔ፤
ኔኤኒ ማኣዱዋዖ ዴዓሢ ዎማ ሄላንዳኣናዳይ?
ናንጊና ናንጋ ጎዳሢዮ! ጊንሣ ማዒ ታና ዓውሴ፤
ኔኤኮ ናንጊና ናንጋ ናሹሞና ታና ፓሤ።
ሃይቄ ዓሶይዳፓ ኔና ማሊ ጶቂሣይ ባኣሴ፤
ዱኡኪንቴ ቤዛ ዓኣዖ ኔና ጋላታይ ዖናዳይ?
ዖዪፆ ሚርጊፆፓ ዔቄያና ታኣኒ ላቤኔ፤
ዬኤፓ ታኣኮ ሚርጌሢሮ ዋንቶ ሻኣላ ታኣኮ ዎዓኔ፤
ኬራኣ ታኣኮ ማስኪንታኔ።
ታ ሞርኮኮ ማኪፃፓ ዔቄያና
ሚርጌ ታ ዬኤኬሢሮ ዓኣፓ ታኣኮ ዴይ ዔቴኔ፤
ዴንቃኒያ ታኣኒ ዳንዳዑዋሴ።
ናንጊና ናንጋ ጎዳ ዬኤፖ ዒላቶ ታኣኮ ዋይዜሢሮ
ዒንሢ ፑርቶ ማዻ ዓሳ ታ ኮራፓ ባይቁዋቴ! 2
ናንጊና ናንጋ ጎዳ ሺኢጲፆ ታኣኮ ዋይዜኔ፤
ታ ሺኢቄ ሺኢጲፆዋ ዒዚ ዔኬኔ።
ሞርካ ታኣኮ ቢያ ቦርሲንታንዳኔ፤
ማሊባኣዖ ዻውሲንቲ ጊንሢም ዔያታ ጳሽካንዳኔ።
Source notes (2)
- Cross-reference ዓይኑ. 38፡1።
- Cross-reference ማቲ. 7፡23፤ ሉቃ. 13፡27።
ጌኤዦ ማፃኣፖ. Copyright © 2008 The Word for the World International and The Bible Society of Ethiopia. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.