ዓይኑሞ ማፃኣፖ 48

ቆሬ ናኣቶ ዓይኑሞ

ፆኦሲ ካታሞ ማዔ ፂዮኔ

1ናንጊና ናንጋ ጎዳ ዼኤፒኬ፤

ኑ ፆኦዛሢ ካታሞይዳ፥ ዒዛም ዱማዼ ዹካ

ዼጊ ጌዔ ጋላታ ዒዛም ጋላቲንታንዳያ ኮይሳኔ።

2ዓጮ ቢያኮ ዎዛ ማዔ

ኬዶ ባንፆና ሃኬና ጴዻ ዼጌ ቤዞይዳ ሚዛጳ ፂዮኔ ዹካ

ዼኤፖ ካኣታሢ ካታሞኬ። 1

3ፆኦዛሢ ዒዞኮ ዋርዲዮ ጋራ ማዒ

ዒዞኮ ጊቲማሢ ማዒፆ ማርካሴኔ።

4ካኣታ ዎላ ቡኪንቲ ሙኬኔ፤

ዔያታ ዎሊ ዑፃ ዖሎሮ ጎዔኔ።

5ጋዓንቴ ዔያታ ዬኖ ካታሜሎ ዛጋዖ ዲቃቴኔ፤

ዒጊጪያ ጳሽኬኔ።

6ሾይቺ ዓርቄ ላኣሊጉዲ

ዒኢካ ጎጋይቂ ዔያታ ዚኪንቴኔ።

7ዓባ ኬስካ ባንፆ ዢባራ

ቴርሴሴ ዓጮኮ ዋኣፆ ካኣሚሎ ሜንሣሢጉዲ

ኔኤኒያ ዔያቶኮ ዎልቆ ላቢሲ ጎቃይሴኔ።

8ናንጊና ናንጋ ጎዳ ማዼ ባኮ ኑ ዋይዜሢጉዲ

ቢያ ባኮ ዳንዳዓ ጎዳሢ ካታማ ዬኖ ጎይፆ ማዓንቴ

ኑ ዓኣፒና ኑ ዛጌኔ፤

ዒዚ ዬኖ ካታሜሎ

ናንጊና ዶዲሺ ዴይሣንዳኔ።

9ፆኦሲዮ! ኑኡኒ ኔኤኮ ጌኤዦ ማኣሮይዳ ማዒ

ኔኤኮ ማኣሪፆ ኑ ማላኔ።

10ፆኦዛሢዮ! ኔና ጋላቲፃ ዓጫ ማዔ ካሮና ሄሌሢጉዲ

ሱንፃኣ ኔኤኮ ዒማ ጎይፆ ማዔኔ።

11ኔኤኒ ፒዜ ዎጋያ ማዔሢሮ

ፂዮኔይዳ ናንጋ ዴራ ዎዛዻኔ፤

ዪሁዳ ካታማ ናንጋ ዓሶዋ ዎዛሳኔ።

12ዎሊ ጊንፆ ኬስኪ ፂዮኔ ሺሩዋቴ፤

ዒዞ ዴዒ ካፖ ሴኤሎዋ ፓይዱዋቴ።

13ዒንሢ ሙካ ሾይንቶም ኬኤዛኒ

ዒዞኮ ዶዶ ኬኤሎ ዲፆዋ ማሊ ጶቂሡዋቴ፤

ዋርዲዮ ቤዞዋ ዛጉዋቴ።

14ዒንሢ ዔያቶም ኬኤዛንዳሢ፦ «ፆኦሲ ያዺኬ፤

ኑ ፆኦዛሢ ናንጊና ናንጋያኬ፤

ሴካ ቤርቲማኣ ዒ ኑና ዔኪ ዓኣዻንዳኔ» ጌዒኬ።