ዓይኑሞ ማፃኣፖ 44

ዓይኑሞ ሱኡጋሢ ዓይሣ ጎይፆና ቆሬ ናኣታ ኬኤዚ ዔርዜ ባኮ

ማኣዶ ኮዒ ሺኢቆና ሺኢጲሢ

1ፆኦሲዮ!

ሚናኣ ዎዶና ኔኤኒ ማዼ ባኮ ቢያ

ኑኡኒ ኑ ዋዮና ዋይዜኔ፤

ኑኡኮ ቤርታኣ ዓዶንሢ ዔያቶ ዎዶና

ኔኤኒ ዔያቶም ማዼ ዲቃሣ ዓኮ ባኮ ኑም ኬኤዜኔ።

2ሚናኣ ዎዶና ኔኤኒ ማዼ ባኮ ቢያ

ኑ ዓዶንሢ ኑም ኬኤዜኔ፤

ዬይያ፦ ኑ ዓዶንሢ ቤዞ ጌልዛኒ

ሜሌ ዴሮ ኔኤኒ ዳውሴኔ፤

ዔያቶ ጊኢጊሺ ዴይሣኒ ቤርታ ዒኢካ ናንጋ ዓሶ ኔ ባይዜኔ።

3ዓጬሎ ዔያታ ዓርቄሢ ዔያቶኮ ጬንቾ ዓፓሮና ዖሊቱዋሴ፤

ባሺ ዔያታ ዔኬሢያ ዔያቶ ዎልቄናቱዋሴ፤

ዬያ ቢያ ዔያታ ማዼሢ ኔኤኒ ዔያቶ ናሽኬሢሮና

ዔያቶና ዎላ ማዒ ኔኤኮ ዎልቆና ዶዱሞና

ዔያቶ ኔ ማኣዴሢሮኬ።

4ኔኤኒ ታኣኮ ካኣቲኬ፤

ጊንሣ ሃሣ ኔ ታኣኮ ፆኦዛሢኬ፤

ያይቆኦቤ ዜርፆ ማዔ ኔ ዴራ

ባሻንዳጉዲ ማዼሢ ኔናኬ።

5ኔ ኑና ማኣዴም ኑ ሞርኮ ኑ ባሻኔ፤

ኑ ዑፃ ዔቃ ዓሶ ኔ ሱንፆና ኑ ዻውሲሳኔ።

6ታኣኒ ታኣኮ ሂኢዦ ጉሙርቁዋሴ፤

ታኣኮ ጬንቾ ዓፓራኣ ታና ዓውሱዋሴ።

7ኑ ሞርካፓ ኑና ዓውሳንዳሢ ኔናኬ፤

ኑና ዒፃ ዓሶ ቦርሲሳንዳሢያ ኔናኬ።

8ፆኦሲዮ! ኔኤና ኑ ሄርሺንታኔ፤

ሱንፆዋ ኑ ኔኤኮ ናንጊና ጋላታኔ።

9ሃሢ ጋዓንቴ ኔ ኑና ኬኤሬኔ፥ ቦርሲሲያ ቦርሲሴኔ፤

ኑኡኮ ዖሎ ዓሶና ዎላ

ኔኤኒ ኬስኪፆዋ ሃሼኔ።

10ኑኡኮ ሞርኮ ቤርታፓ ዓኣሺንቲ ጳሽካንዳጉዲ ኔ ኑና ማሄኔ፤

ኑ ሞርካኣ ኑኡኮ ዓኣ ባኮ ቢያ ቡሬኔ።

11ኔ ኑና ሹኪንታ ማራይጉዲ ማሄኔ፤

ሜሌ ዴሮ ዓጫ ኔ ኑና ዜርቄኔ።

12ዴሮ ኔኤኮ ኔ ዻካ ሚኢሼም ሻንቼኔ፤

ዬያ ኔ ሻንቺፆና ቃሲ ዴንቄ ባኣዚ ባኣሴ።

13ኑኡኮ ዓሺና ኑና ጫሽካንዳጉዲ

ኑ ኮሮይዳ ዓኣ ዓሶማኣ ኑ ሚኢቺ

ሃሣ ዓማሊ ባኣዚ ማዓንዳጉዲ ኔ ማዼኔ።

14ዴሬ ኑ ዛላ ጌስቲ ዓማላያ

ቶኦቺሢና ቶኦኮዋ ፔኤኮ ዓጊሣንዳጉዲ ኔ ማዼኔ።

15ቢያ ኬላ ዓኣፖ ካራ ታኣኮ ዻውሲንቲናኬ፤

ቢያ ባኣዚና ታ ቦርሲንታያ ማዔኔ።

16ታኣኒ ያዺ ማዔሢ

ሞርካ ታኣኮ ኮሞ ኮፃ ዎዶና

ሜሌ ዓሳ ቄኤዺ ታና ቶኦቻሢ ዋይዜሢሮኬ።

17ዬይ ቢያ ኑና ሄሌሢ

ኔና ኑ ዋሊባኣንቴ፥ ኔኤኮ ጫኣቁሞ ኑ ሃሺ ሻሂባኣንቴኬ።

18ዒና ኑኡኮ ኔኤም ጉሙርቂንታ ጎይሣ ዓኣንቴኬ፤

ቶካኣ ኑኡኮ ኔ ጎይፃፓ ኬስኪባኣሴ።

19ኔኤኒ ጋዓንቴ ቦዓ ፔኤቃ ቤዛ ሜንሢ ኑና ኬኤሬኔ፤

ሻኔ ዹሚና ኔ ኑና ባይዜኔ።

20ኑ ፆኦዛሢኮ ሱንፆ ኑ ዋሊ

ኩጮዋ ሜሌ ፆኦዞ ባንሢ ዔቂሴያ ኑ ማዔቴ፥

21ኑ ፆኦዛሢ ዬያ ዔሩዋዓዳ?

ዒዚ ዒናይዳ ዓኣ ባኣዚ ዔዔራያኬ።

22ጋዓንቴ ኔ ዛሎ ኬላ ኬላ ኑ ሃይቄዖ ዓቲ ዓቲ ዓኣኔ፤

ሹኪንታ ማራይጉዲያ ኑ ፓይዲንቴኔ። 1

23ናንጊና ናንጋ ጎዳሢዮ! ዔቄ! ዓይጋ ኔ ጊንዓይ?

ዔቄ! ናንጊና ኑና ኔ ኬኤሪ ሃሺፖ!

24ኔኤኮ ዓኣፖ ካሮ ኑ ጊዳፓ ኔ ዓይጋ ሺርሻይ?

ኑኡኮ ሜታዺፆና ሄርቂንቲ ዎይፆዋ ዓይጋ ኔ ዋላይ?

25ሳዖ ኬዲ ሄላኒ ዑኪ ኑ ኩንቴኔ፤

ዒኢካ ኑ ሎኦሚ ላሄኔ።

26ዔቂጋፓ ኑና ማኣዳኒ ሙኬ!

ኔኤኮ ናንጊና ናንጋ ናሹሞሮ ጌይጋፓ

ጊንሣ ማሂ ኑና ሻንቂ ዔኪ ዓውሴ!