ጌኤዦ ማፃኣፖ
ዓይኑሞ ማፃኣፖ 4
ዓይኑሞ ሱኡጋሢ ዓይሣ ጎይፆና ጎኦላና ዓይናዺንታ ዳውቴ ዓይኑሞ
ፆኦሲ ጉሙርቂ ሺኢቂንታ ሺኢጲሢ
ታኣኮ ፂሎ ፆኦዛሢዮ!
ታኣኒ ዔኤላ ዎዶና ታኣም ዬሄ፤
ሚርጌና ታ ዋኣያ ዋኣዪፆፓ ታና ሃውሺሴ፤
ታና ማኣሬ፥ ሺኢጲፆዋ ታኣሲ ዋይዜ።
ዒንሢ፥ ሃይ ዓሳ
ዎማ ሄላንዳኣና ታና ዒንሢ ቶኦቻይ?
ዓይዴ ሄላንዳኣና ፓሡዋ ባኣዚ ዒንሢ ናሽካይ?
ዎማ ሄላንዳኣናዳዖ ሉኡዙሞ ዒንሢ ኮዓሢ?
ናንጊና ናንጋ ጎዳ ጉሙርቂንታ ዓሶ ፔኤም ማሂ ዶኦሬሢ ዔሩዋቴ፤
ዬያሮ ታኣኒ ዒዛ ሺኢቃ ዎዶና ዒዚ ታኣም ዋይዛኔ።
ዎዚ ዒንሢ ዻጋዼቴያ ጎሜ ማዺፖቴ፤
ዒንሢ ላሃ ቤዛ ዓኣዖ ዚቲ ጌይ
ዒኖ ዒንሢኮ ኮሺ ማሂ ዛጉዋቴ። 1
ናንጊና ናንጋ ጎዳም
ፒዜ ማዔ ዒንጎ ባኣዚ ሺኢሹዋቴ፤
ዒዛ ጉሙርቁዋቴ።
«ዓይጌ ኑና ኮሺ ባኣዚ ዻዋንዳይ?»
ጋዓ ዓሳ ሚርጌኬ፤
ናንጊና ናንጋ ጎዳሢዮ!
ኔ ዓኣፖ ካሮ ፖዓ ኑኡም ፖዖንጎ2
ሜሌ ዓሳ ሃኣኮንታ ዎይኖ ዓኣፖዋ ዴንቃዖ ዎዛዻ ዎዛፓ
ኔኤኒ ታ ዒኖ ዎዛሴሢ ባሼኬ።
ናንጊና ናንጋ ጎዳሢዮ!
ኮሺ ናንጊ ታና ናንጊሻሢ ኔናታሢሮ
ሂርጋ ባኣያ ታ ላሃኔ፥ ጊንዒያ ታ ጊንዓኔ።
Source notes (2)
- Cross-reference ዔፕ. 4፡26።
- Footnote ኔ ዓኣፖ ካሮ ፖዓ ኑኡም ፖዖንጎ ጋዓዞ፦ ዒስራዔኤሌ ዓሳ ፆኦሲፓ ዓንጆ ዴንቃኒ ኮዓዖ ሂዚ ጌይ ሺኢቃ ሺኢጲሢኬ።
ጌኤዦ ማፃኣፖ. Copyright © 2008 The Word for the World International and The Bible Society of Ethiopia. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.