ዓይኑሞ ማፃኣፖ 38

ዓይሁዶኮ ሃውሾ ኬሎ ማሊ ጶቂሢ ዓይናዾ ዳውቴ ዓይኑሞ

ሜቶ ዎዴና ሺኢቂንታ ሺኢጲሢ

1ናንጊና ናንጋ ጎዳሢዮ! ኔ ዻጎና ታና ጎሪፖ፤

ኔኤኮ ዼኤፖ ዻጎና ታጊዳ ሜቶ ዓጊፖ።

2ኔ ሂኢዦና ኔ ታና ዱኬኔ፤

ኔኤኮ ዶዶ ኩጮና ኔ ታና ጳርቄኔ።

3ኔኤኒ ጎሪንቴሢሮ ዑፃ ታኣኮ ኮሺቱዋሴ።

ታ ጎማፓ ዔቄያና ዒቢሊ ታኣኮ ባኣሴ።

4ዻቢንታ ታኣሲ ታና ዴኤፃያኬ፤

ዬይ ታኣኒ ኬዳኒ ዳንዳዓሢፓ ዑሣኬ።

5ታኣኮ ዔኤያቶና ታ ማዼ ዻቢንቶሮ

ኪፃ ታኣኮ ጊኢሽኪ ዛዓኔ።

6ታኣኒ ጊኢራፓ ዎቤኔ፥ ሚርጌና ታ ኩንቲ ሃንቴኔ፤

ኬሎ ቢያ ዖዪሢና ታ ፔኤቄኔ።

7ጊኢራ ታኣኮ ታሚጉዲ ዔኤቴኔ፤

ዑስካኣ ታኣኮ ኮሽኩዋሴ።

8ሚርጌና ታ ላቤኔ፥ ጋፒ ታኣኒ ሺኢቴኔ፤

ዒና ታኣኮ ሜታዼያታሢሮ ታ ዚኢሊንታኔ።

9ናንጊና ናንጋ ታ ጎዳሢዮ! ታኣኒ ኮዓ ባኮ ቢያ ኔ ዔራኔ፤

ታኣኮ ዚኢሊንቲፃ ኔኤም ዓኣሺንቴያቱዋሴ።

10ሳዛ ታኣኮ ዑኮ ዑኮ ዹዓኔ፥ ቆሳኣ ታኣኮ ጌላኔ፤

ዓኣፓ ታኣኮ ዛጎ ዒፄኔ።

11ታኣኮ ዒጊኖንታ ላጎንታ ኪፆ ታኣኮ ሻኣኪንቴኔ፤

ታ ዒጊና ታ ኮራፓ ሃኬኔ።

12ታ ሼምፓሢ ባይዛኒ ኮዓዞንሢ ፒሮ ታኣም ፒራኔ፤

ፑርታና ታና ሜታሳኒ ማላዞንሢያ ባይዛኒ ታኣም ዚርቃኔ፤

ሮኦሮ ጉቤ ታና ባይዛኒ ጌኔ ማሊሢ ሱካኔ።

13ታኣኒ ዋይዚ ባይቄያ

ጌስታኒያ ዳንዳዑዋያ

ዻንጋ ባይቄ ዓሲጉዲኬ።

14ጎኔና ዋይዚ ባይቄ ዓሲና

ዻንጋ ቡሊንቲ ጌስቱዋ ዓሲጉዲ ታ ማዔኔ።

15ናንጊና ናንጋ ጎዳሢዮ! ኔና ታ ጉሙርቃኔ፤

ናንጊና ናንጋ ጎዳ ማዔ ታ ፆኦዛሢዮ! ኔ ታኣም ማሂ ኬኤዛንዳኔ።

16«ሞርካ ታኣኮ ቶኦቺ ታና ዛጋንዳጉዲና

ቶካ ታኣኮ ሃሊፄም ፔና ዔያታ ጎኦቢሣንዳጉዲ ማዺፖ!»

ጌዒ ታ ኔና ሺኢቃኔ።

17ሎኦማኒ ታ ዑኬኔ፤

ታኣኮ ዋኣዪፆይዳፓ ፔቴታዖ ታ ኬስኪባኣሴ።

18ዻቢንቶ ታኣኮ ታ ቡኡፃኔ፤

ጎማ ታኣኮ ታና ሜታሴኔ።

19ታኣኮ ዶዶ ሞርካ ሚርጌኬ፤

ታ ዔኤቢ ዎኦቲባኣንቴ ታና ዒፃዞንሢኮ ፓይዲ ባኣሴ።

20ታኣኒ ኮሺ ማዾ ማዼሢሮ

ዬያ ኮዦ ማዾ ዛሎ ፑርታ ታኣም ማዺ ማሃ ዓሳ

ታኣኮ ሞርኬ ማዒ ዔቄኔ።

21ናንጊና ናንጋ ጎዳሢዮ! ታና ሃሺፖ፤

ታ ፆኦዛሢዮ! ታ ኮራፓ ሃኪፖ።

22ታ ዼኤሻሢ ማዔ ናንጊና ናንጋ ጎዳሢዮ!

ታና ዑካዺ ማኣዴ።