ዓይኑሞ ማፃኣፖ 32

ዳውቴ ኬኤዚ ዔርዜ ባኮ

ጎሜ ቡኡፂ ማኣሪንቲሢ

1ጎሞ ዓቶም ጌይንቴዞንሢና

ዻቢንቶዋ ካንቆና ዓሳ

ዓንጂንቴያኬ።

2ናንጊና ናንጋ ጎዳ ጎሞ ዒዛኮ ዓርቂባኣሢ

ሉኡዙሞ ሉኡቁዋ ዓሲያ ዓንጂንቴያኬ። 1

3ጎሞ ታኣኮ ታኣኒ ቡኡፁዋዖ ሃሼ ዎዶና

ሮኦሮ ጉቤ ታኣኒ ዚኢሊንታሢሮ ዑፃ ታኣኮ ላቤኔ።

4ሮኦሮና ዋንቶና ኔ ታና ኮሺ ሜታሴኔ፤

ሎጪ ባኣዚኮ ሎጩማ ዖጎሢና ሜላሢጉዲ

ዎልቃ ታኣኮ ጋፒ ባይቄኔ።

5ጎሞ ታኣኮ ታኣኒ ኔኤም ቡኡፄኔ፤

ዻቢንቶዋ ታኣኮ ታኣኒ ዓኣቺባኣሴ፤

ጎሞ ታኣኮ ቢያ ኔኤም ታ ቡኡፃኒ ማሌኔ፤

ኔኤኒያ ጎሞ ታኣኮ ቢያ ዓቶም ጌዔኔ።

6ዬያሮ ፂሎ ዓሲ ቢያ ሜቶ ዎዴና ኔና ሺኢቆንጎ፤

ዎልቄና ዓኣ ዶዲ ዲጲ ኩሚ ሙካ ዎዶና

ዬይ ዲጳ ዒዛ ዔኤቢ ዎኦታዓኬ።

7ኔኤኒ ታኣኮ ፑኖ ካያሢኬ፤

ሜታስካፓ ኔ ታና ካፓንዳኔ፤

ኔኤኒ ታና ዓውሴሢሮ ዒላቲ ዎዛና ታኣኒ ዓይናዻኔ።

8ናንጊና ናንጋ ጎዳ ታኣም፦ «ታኣኒ ኔና ዔርዛንዳኔ፤

ኔኤኒ ሃንታንዳ ጎይፆዋ ታ ኔና ዻዋንዳኔ፤

ታ ኔና ዞራንዳኔ፥ ካፒያ ካፓንዳኔ» ጌዔኔ።

9ዔያቶ ዓርቂ ቃዛኒ፥ ቢፃልቂያ ጫኣናኒ

ጎቺ ዓኣዾ ፓሮና ባቁሎናጉዲ

ጊኢጉዋያ ማዒፖቴ።

ፓሮና ባቁሎና ዒንሢ ዬያይዲባኣቴ

ዒንሢ ባንሢ ዑካዓኬ።

10ጎሞ ዓሶኮ ሜታሢ ሚርጌኬ፤

ናንጊና ናንጋ ጎዳ ጉሙርቃ ዓሳ ጋዓንቴ

ዒዛኮ ናንጊና ናንጋ ናሹሞና ካንቂንታንዳኔ።

11ፂሎ ዓሲዮቴ! ናንጊና ናንጋ ጎዳና ዎዛዹዋቴ፤

ዒኖ ፒዜዞንሢዮቴ! ዒላሹዋቴ።