ዓይኑሞ ማፃኣፖ 26

ዳውቴ ዓይኑሞ

ጌኤሺ ዓሲ ሺኢጲሢ

1ናንጊና ናንጋ ጎዳሢዮ! ፒዙሞና ሴካ ሃንጋ ዓጊፁዋዖ

ኔና ጉሙርቂ ታ ናንጌሢሮ ታኣም ዎጌ።

2ናንጊና ናንጋ ጎዳሢዮ! ታ ዒና ዎማዺታቴያ ዓጊሢ ዛጌ፤

ታኣኒ ሱኡካዻ ሱኡኮንታ ታኣኮ ማሊፆዋ ዛጊ ዔሬ።

3ኔኤኮ ጋፑዋ ናሹማ ታ ዓኣፓፓ ባይቁዋሴ፤

ቢያ ዎዴ ታና ዔኪ ዓኣዻሢ ኔኤኮ ጉሙርቂንቲፆኬ።

4ጌሻ ዓሶና ዎላ ታኣኒ ላጋቲባኣሴ፤

ፔና ጌኤሺ ማሃ ዓሶና ዎላ ታ ሶኦሪባኣሴ።

5ፑርቶ ማዻ ዓሶኮ ቡኪንቶ ታኣኒ ዒፄኔ፤

ዬያ ዓሶና ዎላ ታ ዴዓኒያ ናሽኩዋሴ።

6ናንጊና ናንጋ ጎዳሢዮ!

ታኣኒ ጌኤሺ ማዔሢ ዔርዛኒ

ኩጮ ታኣኮ ታኣኒ ማስታኔ፤

ዒንጎ ባኮ ኔኤም ሺኢሾ ቤዞኮ

ዓጮ ታ ሺሪ ሺሪ ኔና ካኣሽካኔ።

7ጋላታ ዓይኑሞ ዓይናዺ ዓይናዺ

ኔ ዎልቆና ማዺንታ ዓኮ ባኮ ቢያ ታ ኬኤዛኔ።

8ናንጊና ናንጋ ጎዳሢዮ!

ኔኤኒ ናንጋ ማኣሮና

ቦንቻኣ ኔኤኮ ጴዻ ቤዞ ታ ናሽካኔ።

9ሼምፓሢ ታኣኮ ሱጉፆ ላኣላ ዓሶሲና ዎላ ዔኪፖ፤

ናንጎዋ ታኣኮ ዓሶ ዎዻ ዓሶና ዎላ ባይዚፖ።

10ዬያቶኮ ኩጫ ጌኔ ማዾ ማዻኒ ዔቄያ

ሚዛቆ ኩጫኣ ዔያቶኮ ዴሜና ዒንጎ ሚኢሼ ቡኩሳያኬ።

11ታኣኒ ታ ዛሎና ፓጬ ባኣዚባኣ ፒዜ ናንጊ ናንጋኔ፤

ታና ሚጪንቴ፥ ዓውሲያ ዓውሴ!

12ቶካ ታኣኮ ባኣሲንቲ ጊኢጌ ቤሲዳ ዔቄኔ፤

ሚርጌ ቡኬ ኔ ዓሶ ባኣካ ናንጊና ናንጋ ጎዳ ታ ጋላታኔ።