ጌኤዦ ማፃኣፖ
ዓይኑሞ ማፃኣፖ 20
ዓይኑሞ ሱኡጋሢ ዓይሣ ጎይፆና ዓይናዺንታ ዳውቴ ዓይኑሞ
ባሺሢ ዴንቃኒ ሺኢቂንቴ ሺኢጲሢ
ኔኤኒ ሜታዻኣና ናንጊና ናንጋ ጎዳ ኔኤኮ ሺኢጲፆ ዋይዞንጎ!
ያይቆኦቤ ፆኦዛሢ ኔና ካፖንጎ!
ፔኤኮ ጌኤዦ ማኣራፓ ማኣዶ ኔኤም ዒ ዳኮንጎ፤
ፂዮኔ ዹካፓ ኔና ዒ ማኣዶንጎ።
ኔ ዒዛም ዒንጋ ባኮ ቢያ ኔኤኮ ዒ ዔኮንጎ፤
ኔ ሚቺ ዒንጋ ባኮናኣ ዒዚ ዎዛዾንጎ።
ኔ ዒና ዓፃዺ ማላ ባኮ ኔኤም ዒዚ ዒንጎንጎ፤
ማሊፆ ኔኤኮ ቢያ ዒ ኩንሦንጎ።
ኔኤኮ ባሺፆና ኑኡኒ ዎዛዻኔ፤
ኑ ፆኦዛሢ ሱንፆና ባንዲሮ ዼጊዲ ኑ ዓርቃኔ፤
ናንጊና ናንጋ ጎዳ ኔ ሺኢቃ ባኮ ቢያ ኔኤም ኩንሦንጎ።
ናንጊና ናንጋ ጎዳ ዶኦሚ ካኣታሤ ካኣቲ
ዒዚ ማኣዳንዳሢ ታኣኒ ዔራኔ፤
ዒዛኮ ሚዛቆ ኩጮና ዒዛ ኔኤኒ ባሺሲ
ኔኤም ዱማዼ፥ ጫሪንጫፓ ሺኢጲፆ ኔ ዒዛኮ ዋይዛንዳኔ።
ፔቴ ፔቴ ዖሎ ዓሳ ፔኤኮ ዖሎ ሳርጌሎ ዖይቶና
ዓቴ ዓሳ ሃሣ ፔኤኮ ፓራሢና ሄርሺንታኔ፤
ኑኡኒ ጋዓንቴ ናንጊና ናንጋ ጎዳ ማዔ
ኑ ፆኦዛሢ ዎልቆ ጉሙርቃኔ።
ዔያታ ዹቂንቲ ሎኦማንዳኔ፤
ኑኡኒ ጋዓንቴ ዔቃንዳኔ፥ ዶዲያኣ ኑ ዓታንዳኔ።
ናንጊና ናንጋ ጎዳሢዮ!
ካኣታሢ ዒዛኮ ሞርኮ ኩጫፓ ዓውሴ፤
ኑኡኒያኣ ኔና ዔኤላ ዎዶና ኑኡም ዋይዜ።
ጌኤዦ ማፃኣፖ. Copyright © 2008 The Word for the World International and The Bible Society of Ethiopia. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.