ጌኤዦ ማፃኣፖ
ዓይኑሞ ማፃኣፖ 124
ፂዮኔ ኬዞ ዓይኑሞ ዳውቴ ዓይናዼሢ
ፆኦሲ ፔ ዓሶ ካፓያ ማዒፆ
ናንጊና ናንጋ ጎዳ ኑኡና ዎላ ማዒባኣቴ
ኑ ዎዎይታንዳዖ ዓቴይ?
ዒስራዔኤሌ ሂዚ ጎዖንጎ፦
«ዎንዴ ናንጊና ናንጋ ጎዳሢ ኑኡና ማዒባኣቴ
ኑኡኮ ሞርካ ኑና ባይዛኒ ሙኬያና፥
ዼኤፖ ዻጎና ኑጊዳ ዔያታ ዔቄያና
ሼምፔና ዔቂ ዓኣንቴ ኑና ዔያታ ዔዔኤዼዖ ዓቴኔ፤
ዲጳ ኑና ዔኤዺ ጋፔያታንቴ
ዬይ ሴኤሊንቲ ዴንዳ ዋኣፃ ኑና ሙይ ጋፔያታንቴኬ፤
ሩኡሪና ዴንዳ ዲጳ ፒፂ ኑና ዔኪ ዴንዴናንዳንቴኬ።»
ኑኡኮ ሞርካ ዓጮና ኑና ዻይ ሾኦሉዋጉዲ ካፔ
ናንጊና ናንጋ ጎዳሢ ጋላቲንቶም።
ኑኡኒ ካፒጉዲ ኑኡም ፒሮና ፒራስካፓ ቶሌኔ፤
ዬይ ፒራሢ ሜቄም፥ ኑኡኒ ዓዺንቱዋዖ ዓቴኔ።
ዬያይዲ ኑና ማኣዴሢ
ጫሪንጮና ሳዖና ማዤ ናንጊና ናንጋ ጎዳ ሱንፆኬ።
ጌኤዦ ማፃኣፖ. Copyright © 2008 The Word for the World International and The Bible Society of Ethiopia. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.