ዒያሱ ማፃኣፖ 12

ሙሴ ዖሊ ባሼ ካኣቶ

1ዓርኖኦኔ ዶኦጫፓ ዴንዲ ሄርሞኔ ዹኮ ሄላንዳኣና፤ ዓባ ኬስካ ዛሎና ዓራባ ሄላንዳኣና ቢያ፤ ሃሣ ዮርዳኖሴ ሱካ ዓባ ኬስካ ዛሎና ዓኣ ዓጮ ባሺ ሳዖ ዔያቶኮ ዒስራዔኤሌ ዓሳ ዔኬ ካኣታ ሃካፓ ሊካ ፓይዲንታዞንሢኬ፦ 2ሃሴቦኦኔይዳ ዴዒ ዎይሣ ዓሞራ ዓጮ ካኣቲ ሲሆኔ፤ ዒዚ ዎይሣ ዓጫ፦ ጌሌዓዴ ዓጮኮ ሄካሢ ዔካዖ ዓርኖኦኔ ዶኦጮ ኮይላ ዓኣ ዓሮዔኤሬፓ ዓርቂ ዬያ ዶኦጮኮ ሳዛ ዓኣ ዓሞኦኔ ዓሶኮ ዛጶ ማዔ፥ ያኣቦቄ ዎሮ ሄላንዳኣናኬ፤ 3ሃሣ ዒዚ ዎይሣሢ ዓባ ኬስካ ዛሎና ዮርዳኖሴ ዶኦጫፓ ዴንዲ ጌሊላ ባዞ ሄላንዳኣና፤ ቤትሺሞቴ ዛሎና ዴንዲ ሶኦጌ ባዚ ሄላንዳኣና፤ ጊንሣ ሃሣ ሶኦጌ ባዚኮ ዾኦሎ ዛሎና ፒሲጋ ዹኮ ዴሞ ሄላንዳኣናኬ።

4ዬያጉዲ ጊንሣ ሬፓ ዓሶ ፃጶይዳፓ ዓቴያ ዓስታሮቴና ዔድሬዒናይዳ ዴዒ ዎይሣ ባኣሳኔ ዓጮ ካኣቲ ዖኦጌ፤ 5ዒዚ ፔ ዴማ ማሂ ዎይሣሢ፦ ሄርሞኔ ዹኮ ዓጫ፥ ሳላካ ዓጫ፥ ዴንዲ ጌሹሬና ማዕካ ጌይንታ ዓጮኮ ዛጶ ሄላንዳኣና ዓኣ ባኣሳኔ ዓጮ ቢያ ዔኪ ሃሴቦኦኔ ዓጮ ካኣቲ ሲሆኔ ዎይሣ ዓጮ ማዔያ ጌሌዓዴኮዋ ዛሎ ቃሲ ዔካያኬ። 1

6ዬያኮ ቤርታ ናንጊና ናንጋ ጎዳኮ ዓይላሢ ሙሴንታ ዒስራዔኤሌ ዴሮንታ ዬንሢ ላምዖ ካኣቶንሢ ዖሊ ባሼያኬ፤ ዬያሮ ናንጊና ናንጋ ጎዳኮ ዓይላሢ፥ ሙሴ ዬያ ዓጮ ሮኦቤኤሌና ጋኣዴ ማኣሮ ዓሶናም፤ ሃሣ ሚናኣሴ ማኣሮ ዓሶኮዋ ዛሎም ዔያቶ ዓጪ ማሂ ጊሽኪ ጊሽኪ ዒንጌኔ። 2

ዒያሱ ዖሎና ባሼ ካኣቶ

7ዒያሱና ዒስራዔኤሌ ዴሮና ዮርዳኖሴ ዎሮኮ ዓባ ኬስካ ዛሎይዳ ዓኣ ካኣቶ ቢያ ዖሊ ባሼኔ፤ ዬይ ዓጫ ሊባኖኦሴ ዶኦጮይዳ ዓኣ ባዓልጋኣዴይዳፓ ዓርቃዖ ዾኦሎ ዛሎና ዔዶኦሜ ኮይላ ዓኣ ሃላቄ ዹኮ ሄላኔ፤ ዒያሱ ዬያ ዓጮ ጊሽኪ ጊሽኪ ፔቴ ፔቴ ዒስራዔኤሌ ማኣሮ ማኣሮ ቶይዶም ፔ ዓጪ ማሂ ዒንጌኔ። 8ዬይ ዒንጊንቴ ዓጫ፦ ጌሜራዻ ዓጫ፥ ዓባ ኬስካ ዛሎና ዓኣ ጌሜሮ ዴማ ዓኣ ዓጫ፥ ዮርዳኖሴ ዶኦጮና ዬያ ዓጮኮ ጌሜሮ ዴማ ዓኣያ ዓባ ኬስካ ዛላ ዓኣ ቦኦላዻ ቤዞና ዾኦሎ ዛሎይዳ ዓኣ ዳውላዻ ዓጮ ቢያ ዓርቃያኬ፤ ዬይ ዓጫ፦ ቤርታ ሂኢታ ዓሳ፥ ዓሞራ ዓሳ፥ ካኣናኔ ዓሳ፥ ፔሪዛ ዓሳ፥ ሂዋዌ ዓሶንታ ዒያቡሳ ዓሶንታ ናንጋ ቤዞኬ። 9ዒስራዔኤሌ ዴራ ካኣቶ ዖሊ ዖሊ ባሺ ዓርቄ ካታማ ሃካፓ ሊካ ፓይዲንታ ካታሞኬ፦ ዒያርኮ፥ ቤኤቴኤሌ ኮይላ ዓኣ ዓይ፥ 10ዬሩሳላሜ፥ ኬብሮኦኔ፥ 11ያርሙቴ፥ ላኪሼ፥ 12ዔግሎኔ፥ ጌዜሬ፥ 13ዴቢሬ፥ ጌዴሬ፥ 14ሆርማ፥ ዓራዴ፥ 15ሊቢና፥ ዓዱላሜ፥ 16ማቄዳ፥ ቤኤቴኤሌ፥ 17ታፑሃ፥ ሄፔሬ፥ 18ዓፔቄ፥ ሻሮኔ፥ 19ማዶኔ፥ ሃፆሬ፥ 20ሺምሮንሜሮኔ፥ ዓክሻፔ፥ 21ታዕናኬ፥ ሜጊዶ፥ 22ቄዴሼ፥ ቄርሜሎሴይዳ ዓኣ ዮቅኒዓሜ፥ 23ባዞ ኮይላ ዓኣ ዶኦሬ፥ ጌልጌላ ኮይላ ዓኣ ጎይሜንታ 24ቲርፃ ካታሞንታ ማዓዛ ዬያታ ካኣታ ዎሊ ዑፃ ሃይሢታሚ ፔቴኬ።