ዒዮቤ ማፃኣፖ 40

1ሄሊሳዖ ሃሣ ናንጊና ናንጋ ጎዳ ዒዮቤም፦

2«ዔዞ ዒዮቤ! ሂንዳ ቢያ ባኮ ዳንዳዓ ፆኦዛሢ፥ ታኣና

ዓሲ ማርሚ ላሣንዳያ ኔኤም ማላ?

ታና፥ ፆኦሲና ዎላ ማርማሢ ኔናታሢሮ

ሂንዳ ማሂ ታኣም ኬኤዜ» ጌዔኔ።

ዒዮቤ

3ዬካፓ ዒዮቤ፦

4«ናንጊና ናንጋ ጎዳሢዮ! ታኣኒ ፓሡዋያ ላኣፓ ዓሲኬ፤

ሃካፓ ሴካ ታ ዻንጎ ታ ኩጮና ታ ዓርቂ

ዚቲ ጋዓንዳኣፓዓቴም

ማሂ ታ ኔኤም ኬኤዛ ባኣዚ ባኣሴ።

5ፔቴና ሃሣ ጊንሣ ላሚያኣ ታ ጌስቴኔ፤

ሃካፓ ሴካ ፔቴታዖ ታ ጌስታዓኬ» ጌዔኔ።

6ናንጊና ናንጋ ጎዳ ዓልጎ ዢባሬና ማዒ ዒዮቤም ሂዚ ጌዔኔ፦

ናንጊና ናንጋ ጎዳ

7«ዔቂጋፓ ኬርኖ ኔኤኮ ዓቲንቄ ማይ ቱኡቴ፤

ታ ኔና ዖኦጫንዳኔ፤ ታኣም ማሂ ኬኤዜ።

8ታና ኔኤኒ ዻቢንቲ ዎጋያ ማሂ ጌስቲ ጌስቲ

ኔና ኔኤኒ ጌኤሺ ማሃኒ ማላ?

9ዓካሪ ዎልቃ ኔኤኮ ታ ዎልቆጉዴያ ዶዲዳ?

ሃሣ ዑኡዛ ኔኤኮ ታ ዑኡዞጉዴያ ዎልቃዻያዳ?

10ያዺ ማዔያታቴ ኔ ቶኦኮ ዒጊቻያ ማሂ ቦንቺሴ፤

ቦንቾና ዼኤፑሞና ኔ ዔኬ።

11ዖቶርቃ ዓሶ ዛጊ ዔያቶ ቦርሲሴ፤

ኔኤኮ ዻጎዋ ዔያቶ ዑፃ ጮኦሽኬ።

12ቢያሢ ኮሺ ዛጊ ዔያቶ ቦርሲሴ፤

ፑርቶ ዓሶ ዔያታ ዓኣ ቤዛ ዓኣንቴ ባይዜ።

13ዓጪ ዔያቶ ዑፃ ማሂ

ቢያሢ ፔቴይዳ ዱኡኬ።

14ዬካፓ ታኣኒ ታ ዛሎና

ኔኤኒ ኔ ዎልቄና ዖሊ ባሻያ ማዔሢ ማርካዻንዳኔ።»

15«ታኣኒ ኔናንታ ሃይላሻሢንታ ማዤኔ፤

ሃይላሻሢ ጌማይጉዲ ማኣቲ ሄንቃኔ።

16ዒዛኮ ጊኢሮይዳ ዓኣ ዶዱሞና

ጎጶ ጋራ ዓኣ ሻዦ ዶዱሞዋ ዛጌ።

17ዑንካ ዒዛኮ ዚቢቂ ሚሢጉዲ ፒዝ ጌዔያኬ፤

ጉባዞ ሻዣ ዒዛኮ ዓንዲሪ ሃሣ ዶዲኬ።

18ሜጌፃ ዒዛኮ ሞኦና ዓንጊጉዲኬ፤

ሃሣ ዓንጊ ኮኦሎጉዲያኣ ዶዲኬ።»

19«ታ ማዤ ማዢንቶይዳፓ ቢያ ዒ ዎልቄና ዓኣያኬ፤

ታጊዳፓዓቴም ዒዛ ባሻይ ባኣሴ።

20ካዮ ቦዓ ፂካ ዹካ

ዒዛም ሄንቆ ማኣቶ ባቃልሳኔ።

21ሚሢ ሺቢና ማጫሬና ባኣካ

ሃሣ ጫሮ ባኣካኣ ዒ ላሃኔ።

22ሺባ ዓኣ ሚፃ ፔ ሺቦና ዒዛ ዓኣቻኔ፤

ዎሮ ዓጫ ባቃላ ዓሃያ ጌይንታ ሚፃኣ ዒዛ ዓኣቻኔ።

23ዎሮይዳ ዋኣፆ ኩሙፃ ዒዛ ፔቴታዖ ዲቃሡዋኣሴ፤

ዮርዳኖሴ ዎራታዖ ዓጮ ኬስኪ ሄላንዳኣና ኩሜቴያ ዒዚ ዒጉጩዋኣሴ።

24ዓኣፖ ዒዛኮ ዎዺ ሲኢዾዋ ዒዛኮ ዑሪ

ዒዛ ዓርቃኒ ዳንዳዓይ ዖናዳይ?»