ዒዮቤ ማፃኣፖ 19

ዒዮቤ

1ዬካፓ ዒዮቤ ሂዚ ጌይ ማሄኔ፦

2«ዒንሢ ዓይዲ ሄላንዳኣና ታና ሜታሳይ?

ሃሣ ዓይዲ ሄላንዳኣና ጌኤዞና ዒኖ ታኣኮ ዒንሢ ዱኡዛይ?

3ሃይሾ ዒንሢ ታጶ ማይንቲ ታና ጫሽካኔ፤

ቦርሲንቱዋዖ ታና ዒንሢ ቶኦቻኔ።

4ጎኔና ታ ዻቢንቴያ ማዔቴ

ዻቢንታ ሜታሳንዳሢ ታና ሌሊኬ።

5ጎኔና ዒንሢ ዒንሢ ቶኦኮ ዼግ ዼጊዳኔ፤

ታኣኮ ሜቶይዳ ጌሊፃ፦

ታኣኒ ዻቤም ፆኦሲ ታጊዳ ዓጌያኬ ጌይ

ዬያ ባኮ ማርካ ማሂ ዔኪ ታና ዒንሢ ሞኦታኔ።

6ጋዓንቴ ሃይ ሜታሢ ታና ሄሌሢና

ቡኡዳሢ ሱዞይዳ ታና ኬኤሬሢ

ፆኦሲታሢ ዒንሢ ዔራንዳጉዲ ታ ኮዓኔ።

7ታ ሜታዼኔ ጌይ ዒላቴያታቶዋ

ታኣሲ ዋይዛ ዓሲ ታ ዴንቂባኣሴ፤

ዑኡዞ ታ ዼጊዲ ዒላቴቶዋ

ፒዜ ዎጌ ታ ዴንቂባኣሴ።

8ጎይፆ ታኣኮ ቢያ ፆኦሲ ዲርቄሢሮ

ታ ኬስካንዳ ጎይሢ ባኣሴ፤

ታ ዓኣዻ ጎይፆዋ ዹሚና ዒ ካንቄኔ።

9ቦንቾዋ ታኣኮ ቶኦካፓ ጉሲ ታና ቦርሲሴኔ።

10ዑፆ ታኣኮ ቢያ ዛሎና ዹይ ዹይ

ጋፒሲ ሾኦሌኔ፤

ታኣኮ ሃጊ ማዓ ዎዞ ፃጳፓ ቱጊንቲ ዶዓ

ሚሢጉዲ ዒ ማሄኔ።

11ፆኦሲኮ ዻጋ ታጊዳ ታሚጉዲ ዔኤቴኔ፤

ዓዳ ሞርኬጉዲ ታና ዒ ፓይዴኔ።

12ታና ባይዛኒ ፔኤኮ ዖላ ዓሶ ዒ ዳኬኔ፤

ዔያታ ታ ማኣሮኮ ዙሎ

ዋርዲ ዴዒ ታና ማንጌኔ።»

13«ፆኦሲ ታ ጌርሲንሢ ታ ኮራፓ ሃኪሴኔ፤

ታና ዔራ ዓሳ ቢያ ፃንጎ ማሂ ታና ዛጌኔ።

14ታኣኮ ዒጊና ታጊዳፓ ዱማዼኔ፤

ታኣኮ ላጋኣ ታና ዋሌኔ።

15ታ ማኣራ ሾኦቺንሢ ታ ዔኬ ዓሳ

ቢያ ታና ዋሌኔ፤

ታኣኮ ማዾ ማዻ ላኣላ ቢያ ሙፒ ዓሲ ማሂ ታና ፓይዴኔ፤

ሜሌ ፃንጎ ዓሲ ማሂ ታና ዛጌኔ።

16ታኣኮ ዓይላሢ ታ ዔኤላዛ ታኣም ዬሁዋሴ፤

‹ሃዳራ ታና ማኣዴቴራ› ጌይ ታ ዒዛ ሺኢቃዛታዖ

ዒ ታኣም ዔኤዑዋሴ።

17ታ ማቻ ታኣኮ ካሶ ዒፄኔ፤

ታኣኮ ጌርሲንሢያ ታና ሻኣኪንቴኔ።

18ዻኮ ናኣታታዖ ታና ቶቶኦቻኔ፤

ታና ዔያታ ዛጋ ዎዶናኣ ቦቦሃኔ።

19ታኣኮ ዑኬ ላጋ ታና ሻኣኪንቴኔ፤

ሚርጌና ታ ናሽካ ዓሳኣ

ታኣኮ ሞርኬ ማዒ ዔቄኔ።

20ዓሽካ ታኣኮ ጋፒ ዒልዓ ሜጌፆይዳ ፓፄኔ፤

ታኣኒ ጉቤና ጋፔዖ ዻካሮ ዓቴኔ።»

21«ታ ላጎንሢዮቴ! ፆኦሲ ኩጫ ታና ጳርቄሢሮ

ዒንሢ ታኣም ዖዪ፥ ሚጪንቱዋቴ!

22ፆኦሲ ታና ዳውሳሢጉዲ

ዒንሢያ ሃሣ ታና ዓይጋ ዳውሳይ?

ሃያ ሄላንዳኣና ዒንሢ ታና ሜታሴሢ ጊዳኑዋይ?»

23«ሃይማ ሄላንዳኣና ታ ጌስቴ ባኮ ማሊ ጶቂሣያና

ማፃኣፔይዳኣ ፃኣፓ ዓሲ ጴዼቴ

ዎዚ ታና ዎዛሳንዳዖ ዓቴይ!

24ዓንጊና፤ ሃሣ ዒርሳሴ ጌይንታ ባኮና ፃኣፒንቴቴ

ዬያጉዲ ሹቺዳ ቆኦቂንቲ

ናንጊና ናንጋንዳጉዲ ጌሦናቴ ዎዚ ታና ዎዛሳንዳይ!

25ጋዓንቴ ታና ዓውሳሢ ባይቁዋያ ማዔሢና

ጋፒንፆ ዎዶና ታና ዓውሳኒ

ሳዖይዳ ዒ ዔቃንዳሢ ታ ዔራኔ።

26ዒልዓ ታኣኮ ሙይንቲ ጋፔቴያ

ዓሽካፓ ታ ዱማዺ

ፆኦሲ ዛጋንዳሢ ታ ዔራኔ።

27ዒዚያ ታኣኒ ታኣሮ ዒዛ ዛጋንዳሢኬ፤

ታ ዓኣፓ ዒዛ ዛጋንዳኔ፥ ሜሌቱዋሴ፤

ታኣኮ ዒና ዬኖ ኬሌሎ ሚርጌና ጶቂሣኔ።»

28«ታ ላጎንሦ! ሜቶ ማዤሢ ዒዛታሢሮ

‹ኑ ዒዛ ዳውሶም› ዓይጎሮ ዒንሢ ጋዓይ?

29ፆኦሲኮ ዻጋ ጬንቻ ዓፓሮና ሜቶና ዔኪ ሙካሢሮ

ጬንቾ ዓፓራ ዒንሢ ዎዹዋጉዲ ዔሩዋቴ።

ፆኦሲ ዎጋ ዎጌ ዓኣሢያ ዔሩዋቴ።»