ዒሲያሴ ማፃኣፖ 62

ፂዮኔኮ ዓኮ ሱንፆ

1ዒዞም ዎጊንታንዳ ዎጋ ሳዓ ካሪሢጉዲ ፖዓንዳኣና

ዻቂንታ ዔኤታ ኩሻጉዲ ፖዒሳንዳያ ሄላንዳኣና

ታኣኒ ፂዮኔ ዛሎ ዚቲ ጋዓዓኬ፤

ዬሩሳላሜ ዛሎዋ ማሊፆ ሃሺ ሃውሻዓኬ።

2ዴራ ኔኤም ዎጊንታ ዎጎ፥ ካኣታኣ ቦንቾ ኔኤኮ ዛጋንዳኔ፤

ናንጊና ናንጋ ጎዳ ኔኤም ጌሣ ዓኮ ሱንፆና ኔኤኒ ዔኤሊንታንዳኔ።

3ኔኤኒ ናንጊና ናንጋ ጎዳኮ ኩጮይዳ ዓኣ

ካኣታ ቶኦካ ዓጋ ቦንቾ ባኮጉዲ ማዓንዳኔ።

4ሃካፓ ሴካ ኔ «ሃሺንቴዞ» ጌይ ዔኤሊንታዓኬ፤

ሳዓኣ ኔኤኮ «ጉሪ ቤሲ» ጌይንቲንዱዋሴ፤

ኔኤኒ ዔኤሊንታንዳ ዓኮ ሱንፃ፦

«ናንጊና ናንጋ ጎዳ ኔኤና ዎዛዻኔ» ጌይንታያ ማዓንዳኔ፤

ሳዔላኣ ኔኤኮ «ዓኒ ዓኣያ» ጌይንታንዳኔ፤

ናንጊና ናንጋ ጎዳ ኔኤና ዎዛዻንዳኔ፤

ሳዔላ ኔኤኮ ዓኒ ዓኣ ላኣሊጉዲ ማዓንዳኔ።

5ዼጌ ኩሙሢ ዉዱሮ ናይ ዔኪ ዑኡታዻሢጉዲ

ኔኤኮ ናኣታ ኔና ዔካንዳኔ፤

ዑኡታሢ ዑኡቴሎ ዔኬሢሮ ዎዛዻሢጉዲ

ፆኦሲ ኔኤና ዎዛዻንዳኔ።

6ዬሩሳላሜ! ኔኤኮ ኬኤሎ ዲፆ ዑፃ ካፓ ዓሶ ታ ዴይሤኔ፤

ሮኦሮንታ ዋኣንቶንታ ፔቴታዖ ዔያታ ዚቲ ጋዓዓኬ፤

ዒንሢ ናንጊና ናንጋ ጎዳ ሺኢቃዞንሢ

ሃውሺ ዚቲ ጌይፖቴ።

7ዬሩሳላሜ ዒ ጊንሣ ማዣንዳያ ሄላንዳኣና

ዓጮ ቢያይዳ ዔርቴ ካታማ ዒዞ ዒ ማሃንዳያ ሄላንዳኣና

ሃውሹዋዖ ዒዛም ኬኤዙዋቴ።

8ናንጊና ናንጋ ጎዳ ፔኤኮ ዎልቄና ቢታንቶና ሂዚ ጌዒ ጫኣቄኔ፦

«ሃካፓ ሴካ ሃኣኮ ኔኤኮ ሞርካ ሙዓንዳጉዲ ታ ዒንጋዓኬ፤

ኔኤኒ ላቤ ዎይኖ ዑዦ ኔኤኮ ሜሌ ዓጫፓ ሙኬ ዓሳ

ዑሽካንዳጉዲ ታ ማሃዓኬ።

9ጋዓንቴ ኮና ዔያታ ዋሄ ሃኣኮ ፔኤሮ ሙዒ

ታና ናንጊና ናንጋ ጎዳ ጋላታንዳኔ፤

ዎይኖ ቲቂ ዔኪ ኮሼ ዎይኖ ዑዦ ዔያታ ፔኤሮ

ዓሳ ቡካ፥ ታኣም ዱማዼ ጶኦካ ዑሽካንዳኔ።

10ጌሎ ዲሮ ካሮ ባንፆና ዓኣዹዋቴ፤

ዓሶም ጎይፆ ጊኢጊሹዋቴ፤

ዳልጎ ጎይፆዋ ኮሹዋቴ፤

ሹጮዋ ቡጊ ኬሱዋቴ፤

ባንዴሮዋ ዴሮም ዼጊዲ ሱፁዋቴ።»

11ናንጊና ናንጋ ጎዳ ዓጮም ቢያ፦

«ዓውሳሢ ኔኤኮ ሙካኔ፤

ማዼሢ ዛሎ ዓሶም ዒዚ ጪጋንዳያና ዒንጋንዳ ባኮ ዔኪ ዬዓኔ

ጌዒ ፂዮኔ ዉዱሮ ናዔሎም ኬኤዙዋቴ» ጌዔኔ።

12ዬኖ ዎዶና ዔያታ፦ «ፆኦሲም ዱማዼ ዴሬ፤

ናንጊና ናንጋ ጎዳ ዓውሴዞንሢ» ጌይንታንዳኔ፤

ኔኤኒ ኮይንታያ፥ ሃካፓ ሴካ ሃሺንቱዋ ካታማ ጌይንታንዳኔ።