ጌኤዦ ማፃኣፖ
ዒሲያሴ ማፃኣፖ 55
ዼኤቢንቴ ዓሶ ዔኤሎና ዔኤሊሢ
ናንጊና ናንጋ ጎዳ ሂዚ ጋዓኔ፦
«ዒንሢ ዼኤቢንቴ ዓሳ ቢያ ሃንጋ ዋኣፆ ባንሢ ሙኩዋቴ!
ዒንሢ ሻንቃኒ ሚኢሻ ባኣ ዓሳ!
ሃኒ ሙኪ ሻንቂ ሙዑዋቴ! ሃኒ ሙኪጋፓ
ሚኢሼ ጪጊባኣያታዖ ዲኢቆና ዎይኖ ዑዦና ዑሽኩዋቴ። 1
ፓሡዋ ሙኡዚም ሚኢሾ ዒንሢኮ ዓይጋ ዒንሢ ኬሳይ?
ሚሻኑዋ ባኣዚም ዎልቆ ዒንሢሲ ዓይጋ ዒንሢ ጋፒሳይ?
ሃሢ ታ ጋዓ ባኮ ኮሺ ዋይዚጋፓ ኮሺ ማዔ ሙዖ ሙዑዋቴ፤
ዶኦሪንቴ ኮዦ ሙዖ ሙይ ዎዛዹዋቴ።»
«ዋዮ ዒንሢሲ ቡሊ ታ ባንሢ ዑኩዋቴ፤
ሼምፔና ናንጋኒ ቃኣሎ ታኣሲ ዋይዙዋቴ፤
ታኣኒ ዳውቴ ናሽኬሢጉዲ
ዒንሢም ጉሙርቂንታያ ማዒ ናሽካኒ
ናኣናና ናንጋ ጫኣቁሞ ዒንሢና ታ ጫኣቃንዳኔ። 2
ዓካሪ ታኣኒ ዒዛ ሜሌ ዴሮም ማርካ፥
ሱኡጌ፥ ቢታንቶና ዎይሣያኣ ማሄኔ።
ኔኤኒ ዔሩዋ ካኣቶ ኔ ዔኤላንዳኔ፤
ናንጊና ናንጋ ጎዳ ማዔ ኔ ፆኦዛሢ
ዒስራዔኤሌኮዋ ዱማዼሢ ኔና ዼግ ዼጊዴሢሮ
ኔና ዔሩዋ ካኣታ ሩኡሪና ኔ ባንሢ ሙካንዳኔ።»
ናንጊና ናንጋ ጎዳ ጴዻ ዎዶማና ዒዛ ኮዑዋቴ፤
ዒዚ ዑኬ ዓኣማና ዒዛ ዔኤሉዋቴ።
ፑርቶ ዓሳ ፔኤኮ ሃንቲፆ
ጎሞ ዓሳኣ ፔኤኮ ፑርቶ ማሊፆ ሃሾንጎ፤
ማኣሪፃ ዒዛኮ ሚርጌታሢሮ ዓቶም ዒ ጋዓንዳጉዲ
ሃንጋ ናንጊና ናንጋ ኑ ጎዳ ባንሢ ዔያታ ሙኮንጎ።
ናንጊና ናንጋ ጎዳ ሂዚ ጋዓኔ፦
«ታኣኮ ማሊፃ ዒንሢ ማሊፆጉዲ
ታ ጎይፃኣ ዒንሢ ጎይፆጉዲቱዋሴ።
ጫሪንጫ ሳዓፓ ዼጋሢጉዲ
ታኣኮ ጎይፃ ዒንሢ ጎይፃፓ
ታ ማሊፃኣ ዒንሢ ማሊፃፓ
ሚርጌና ዼግ ጌዔያኬ።»
«ዒርዚና ሻቺና ጫሪንጫፓ ኬዲ
ሳዖ ዎዒሲ ዓኣፒ ዓኣፓንዳጉዲ ማሃሢ
ዜርፆ ዜርቃሢም ዜርሢ
ሙዓሢም ካሣ ጴዺሹዋዖ ሌካ ማዑዋሢጉዲ፥ 3
ታ ዻንጋፓ ኬስካ ቃኣላ ዬያጉዴያኬ፤
ማዻንዳጉዲ ታኣኒ ዳኬ ማዾ ማዹዋዖ
ኪኢቲንቴ ኪኢቶዋ ማዺ ኩንሡዋዖ ታ ባንሢ ማዓዓኬ።»
«ዒንሢ ባብሎኔ ዓጫፓ ዎዛና ኬስኪ
ኮሺና ዒንሢ ዓጮ ማዓንዳጉዲ ታ ማዻንዳኔ፤
ዹኮና ጌሜሮና ዒንሢኮ ቤርታ ዓይናዺ ኮኦማንዳኔ፤
ካዮ ሚፃኣ ቢያ ኩቺ ባዓንዳኔ።
ዓንጊፆ ቤዛ ዚቢቂ፥ ጋውዶ ቤዛ
ቤርሴኔቴ ጌይንታ ሚፃ ባቃላንዳኔ፤
ዬይ፥ ናንጊና ናንጋ ጎዳ ቤርቶይዳ
ዒዛ ማዾ ጶቂሣ ማላታ ማዒ
ናንጊና ባይቁዋዖ ዴዓንዳኔ።»
Source notes (3)
- Cross-reference ዮሃ. ፆፔዻ 21፡6፤ 22፡17።
- Cross-reference ዳኪ. ማዾ 13፡34።
- Cross-reference 2ቆሮ. 9፡10።
ጌኤዦ ማፃኣፖ. Copyright © 2008 The Word for the World International and The Bible Society of Ethiopia. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.