ዒሲያሴ ማፃኣፖ 4

1ዬኖ ዎዶና ላንካይ ላኣሊ ፔቴ ዓቲንቄ ዓርቃዖ፦ «ሙኡዚናታቴያ ማኣዖና ኑ ቶኦኮ ኑ ዳንዳዒ ዎርቃንዳኔ፤ ‹ዓኒ ዔያቶኮ ባኣሴ› ጌይንቲ ጫሽኪንቶፓ ኑ ኔ ማቾንሢ ጌይንቲ ዔኤሊንታንዳጉዲ ሌሊ ኔ ዔኤዔቴራ!» ጌይ ዒዛ ሺኢቃንዳኔ።

ዬሩሳላሜ ላሚ ዓካሶናሢ

2ዬኖ ኬሎና ናንጊና ናንጋ ጎዳ ዓጬሎይዳ ዓኣ ቱኮና ሚፆ ካኣፖኮ ዋዻ ሚዛጴያና ቦንቺንቴያ ማሃንዳኔ፤ ዒስራዔኤሌ ፃጶኮ ባይሲንታፓ ዓቴዞንሢ ቢያ ሳዔላ ካሣ ሃኣኮና ዎዛዺ ዖቶርቃንዳኔ። 3ዬሩሳላሜይዳ ፒኢጫዺ ዓቴዞንሢና ዒኢካ ናንጋንዳጉዲ ዓይሦናዞንሢ ዖኦሲም ዱማዼ ዴሬ ጌይንቲ ዔኤሊንታንዳኔ። 4ዬሩሳላሜኮ ዒኢቲፆ ሻቲንሣንዳኔ፤ ዒ ዎጋ ዎጎና ታሞጉዲ ሚቻ ፔኤኮ ዓያኖ ዎልቆና ዓሲ ዎዺሢ ዒዞ ባኣካፓ ባይዛንዳኔ። 5ዬካፓ ናንጊና ናንጋ ጎዳ ካታሞ ጉቤና፥ ዒኢካ ቡኪንታ ቢያሢዳ ሮኦሮና ዹሜ ሻኣሬ፥ ዋኣንቶና ታሚ ሎስቶ ፖዒ ዳካንዳኔ። ፆኦሲኮ ቦንቻ ካታሜሎ ዼኤፒ ዓፒላፓ ኮሾና ማኣሪጉዲ ካንቂ ካፓንዳኔ። 1 6ዒዛኮ ቦንቻ ካታሜሎ ሮኦሮና ዓባ ሚቻሢዳፓ ሺባንዳኔ፤ ሃሣ ዒርዚና ጉዶ ዢባሬናይዳፓ ቶሊ ዓቶ ቤሲ ማዓንዳኔ።