ዔፕሶኔ ዓሶም

ፆኦሲ ማዾም ዳኪንቴ ጳውሎሴ ኪኢቶ

ዔፕሶኔ ዓጮ ዓሶም

ዓይፆ ካሮ

ጳውሎሴ ዔፕሶኔ ዓሶም ፃኣፔ ኪኢታ ባሼና ዔርዛሢ፦ «ፆኦሲ ማሊፃ ጫሪንጮና ሳዖናይዳ ዓኣ ባኮ ቢያ ፔቴ ማሂ፥ ፔቴ ኪሪስቶሴ ቢታንቶ ዴማ ማሂሢኬ» ጋዓ ማሊፆኬ (1፡10)። ሃሣ ጊንሣ ዬሱስ ኪሪስቶሴና ማዒ ዓሲኮ ዜርሢ ፔቴ ማዓንዳጉዲ ሃያ ዼኤፖ ማሊፆ ማዾይዳ ዔያታ ፔኤሻንዳጉዲ ፆኦሲኮ ዴሮም ዔርዛያኬ።

ዔፕሶኔ ኪኢቶኮ ዓይፆይዳ ፃኣፓ ዓሢ ዓሲኮ ፔቱሞ ዛላ ዓርቄ ማሊፆ ዳልጊሺሢና ፆኦሲ፥ ዓዳሢ ፔኤኮ ዴሮ ዎዲ ዶኦሬቴያ፤ ሃሣ ፔኤኮ ናዖ፥ ዬሱስ ኪሪስቶሴ ዛሎና ዔያቶኮ ጎማ ዓቶም ጌይንቴም ዎይቲ ዔያታ ጌኤሽኬቴያ ፆኦሲኮዋ ዼኤፖ ሃጊ ማዓንዳ ዎዛ ዓያኖ ጌኤዦ ዛሎና ዎይቲ ጎናዺ ዔርቴቴያ ኬኤዛኔ። ላምዓሲ ኬኤዛ ማሊፆይዳ ፃኣፓ ዓሢ ሃኖ ኪኢቴሎ ናባባ ዓሶኮ ፔቱሞ ናንጋ ዔያቶኮ ኪሪስቶሴና ዓኣ ፔቱማ ጎኔ ማዓንዳጉዲ ዎይቲ ዔያታ ናንጋንዳያ ኮይሳቴያ ኬኤዛኔ።

ዓሳ ኪሪስቶሴና ዓኣ ፔቱሞና ዎይቲ ፔቴይዳ ናንጋኒ ዳንዳዓቴያ ዱማ ዱማ ኮኦኪንሢ ማዓ ሃይሴና ኬኤዚንቴኔ፤ ዬይያ፦ ሺኢጲፆ ማኣሮ ዓሳ ፔቴ ዑሢጉዲ ማዓዛ ኪሪስቶሴ ቶኦካሢኬ፤ ሃሣ ሺኢጲፆ ማኣሮ ዓሳ ማኣሮ ማዓዛ፥ ኪሪስቶሴ ማኣሮኮ ሄላሢኬ፤ ሺኢጲፆ ማኣሮ ዓሳ ማቾጉዲ ማዓዛ፥ ኪሪስቶሴ ዓኒጉዲ ማዔኔ፤ ፃኣፓ ዓሢ፦ ኪሪስቶሴ ዛሎና ፔጋዼ ፆኦሲኮ ኮሹሞ ዒንጊፆ ሚርጌና ሄርሺ ሄርሺ ኬኤዛ ዎዶና ኮሺ ዓኣሺንቴ ማሊሢ ኬኤዛኔ፤ ቢያ ባኣዚ ዒ ዛጋሢ ኪሪስቶሴኮ ናሹሞና ፆኦሲም ዒንጎ ባኣዚ ማዒ ዒንጊንቶና ጎሞ ዓሶኮ ዓቶም ጌይፆና ዒዛኮ ኮሹሞ ዒንጊፆና ጌኤሹሞና ካንሢኬ።

ማፃኣፔላ ዱማ ዱማ ዓርቄ ባኮ

ዓይፆ ካሮ (1፡1-2)

ኪሪስቶሴና ሺኢጲፆ ማኣሮ ዓሶና (1፡3—3፡21)

ኪሪስቶሴና ጴዻ ዓኪ ናንጊ (4፡1—6፡20)

ጋፒንሢ ሃይሴ (6፡21-24)