1 ቆሮንቶሴ ዓሶም

ፆኦሲ ማዾም ዳኪንቴ ጳውሎሴ ዳኬ ቤርታሳ ኪኢቶ

ቆሮንቶሴ ዓጮ ዓሶም

ዓይፆ ካሮ

ጳውሎሴ ቆሮንቶሴ ዓሶም ፃኣፔ ቤርታሳ ኪኢታ ፃኣፒንቴሢ ዓይጎሮዳይ ጌዔቴ ጳውሎሴ ቆሮንቶሴይዳ ዔቂሴ ሺኢጲፆ ማኣሮይዳ ኪሪስቶሴ ጉሙርቂ ናንጎ ናንጎና ኪሪስቶሴ ጉሙርቂፆና ዛሎ ዔቄ ሜታሳ ጌኤዞ ጊኢጊሾንዶ ጎይሢ ኮዓኒኬ። ቆሮንቶሴ ዬኖ ዎዶና ዓጮ ቢያሢሮ ማዔ ጊሪኬ ዓጪ ካታማኬ፤ ሃሣ ዓካይያ ጌይንታ ሮሜ ዓጮ ዴማ ዓኣ ዓጬሎኮዋ ዼኤፒ ካታማኬ። ዬና ካታሜላ ሚርጌ ኮርሞ ኮርሚንታያ፥ ዓሳ ዱማ ዱማ ጎይሢ ናንጋያ ጊንሣ «ፑርታኬ፥ ኮሺኬ» ጎዖ ባኣዚ ባኣያ ሃሣ ዱማ ዱማ ካኣሺ ዺቢ ዓኣ ቤሲኬ።

ጳውሎሴ ባሼ ዔርዛኒ ኮዓሢ ሺኢጲፆ ማኣሮ ዓሶ ባኣካ ዓኣ ፓቂንቲፆና «ፑርታኬ፥ ኮሺኬ» ጋዓ ማሊሢ ባኣያ ናንጊፆ ዛሎ፤ ዬያጉዲ ሃሣ ዓኒ፥ ማቾ ማዒባኣያና ላሂሢ ዛላና ዔፒ ዛላ፥ ዓሶኮ ማሊፆይዳ ዓኣ ዖኦጪሢ፥ ሺኢጲፆ ማኣሮ ዓሳ ዎርቃንዳ ዎጌ ዛላ፥ ዓያና ጌኤሺዳፓ ዒንጊንታ ዱማ ዱማ ዒንጊፆ ዛሎና ሃይቢዳፓ ዔቂሢ ዛላኬ። ኮዦ ሃይሳ ዬንሢ ዖኦጪፆንሢኮ ማሂ ኬኤዛ ማሊፆ ዒዚ ኮሺ ፔጋሲ ኬኤዛኔ።

ፆኦሲ ፔ ዴሮም ዒንጌ ዒንጊፆይዳፓ ቢያ ናሹሞ ባሼ ማዔሢ ዔርዛ፥ ዓይ. 13 ሃኖ ማፃኣፖይዳ ሚርጌና ዔርታ ቤሲ ማዓንዳኔ ጌይንታኔ።

ማፃኣፔላ ዱማ ዱማ ዓርቄ ባኮ

ዓይፆ ካሮ (1፡1-9)

ሺኢጲፆ ማኣሮ ዓሶ ባኣካ ማዢንቴ ዱሙሞ (1፡10—4፡21)

ዓኒ ሃሣ ማቾ ማዒባኣያና ላሂሢ ዛላና ማኣሪ ዓሲና ዛላ (5፡1—7፡40)

ኪሪስቶሴ ጉሙርቃ ዓሶና ጉሙርቁዋ ዓሶና ዛላ (8፡1—11፡1)

ሺኢጲፆ ማኣሮ ዓሶ ናንጎና ፆኦሲ ካኣሽኮንዶ ጎይሢና (11፡2—14፡40)

ሃይቢፓ ዔቂሢ ዛላ (15፡1-58)

ኪሪስቶሴ ጉሙርቃ ዓሳ ዒንጋኒ ኮይሳ ማኣዳሢ (16፡1-4)

ጳውሎሴ ፔ ዛላ ኬኤዜ ባኣዚና ጋፒንሢ ሃይሴ (16፡5-24)