സങ്കീ. 126

മടങ്ങിയെത്തിയ പ്രവാസികളുടെ ഗീതം

ആരോഹണഗീതം.

1യഹോവ സീയോൻ്റെ പ്രവാസികളെ മടക്കിവരുത്തിയപ്പോൾ1

ഞങ്ങൾ സ്വപ്നം കാണുന്നവരെപ്പോലെ ആയിരുന്നു.

2അന്നു ഞങ്ങളുടെ വായിൽ ചിരിയും

ഞങ്ങളുടെ നാവിന്മേൽ ആർപ്പും നിറഞ്ഞിരുന്നു.

“യഹോവ അവർക്കുവേണ്ടി വൻകാര്യങ്ങൾ ചെയ്തിരിക്കുന്നു”

എന്നു ജനതകളുടെ ഇടയിൽ അന്നു പറയപ്പെട്ടു.

3യഹോവ ഞങ്ങൾക്കുവേണ്ടി വൻകാര്യങ്ങൾ ചെയ്തിരിക്കുന്നു;

അതുകൊണ്ട് ഞങ്ങൾ സന്തോഷിക്കുന്നു.

4യഹോവേ, തെക്കെനാട്ടിലെ അരുവികളെപ്പോലെ

ഞങ്ങളുടെ പ്രവാസികളെ വീണ്ടും മടക്കിവരുത്തേണമേ2.

5കണ്ണുനീരോടെ വിതയ്ക്കുന്നവർ

ആർപ്പോടെ കൊയ്യും.

6കരഞ്ഞുകൊണ്ട് വിതക്കുവാനുള്ള വിലയേറിയ വിത്ത് ചുമന്ന് നടക്കുന്നവൻ വീണ്ടും

ആർപ്പോടെ കറ്റ ചുമന്നുകൊണ്ട് വരും, സംശയമില്ല.