സങ്കീ. 120

വഞ്ചകരിൽ നിന്നുള്ള മോചനത്തിനായുള്ള പ്രാർത്ഥന

ആരോഹണഗീതം.

1എന്‍റെ കഷ്ടതയിൽ ഞാൻ യഹോവയോടു നിലവിളിച്ചു;

കർത്താവ് എനിക്ക് ഉത്തരം അരുളുകയും ചെയ്തു.

2യഹോവേ, വ്യാജമുള്ള അധരങ്ങളിൽനിന്നും

വഞ്ചനയുള്ള നാവിൽനിന്നും എന്‍റെ പ്രാണനെ രക്ഷിക്കേണമേ.

3വഞ്ചനയുള്ള നാവേ, നിനക്കു എന്ത് ലഭിക്കും?

നിന്നോട് ഇനി എന്ത് ചെയ്യും?

4വീരന്‍റെ1 മൂർച്ചയുള്ള അസ്ത്രങ്ങളും

പൂവത്തിൻ കനലും തന്നെ.

5ഞാൻ മേശെക്കിൽ2 പ്രവാസം ചെയ്യുന്നതുകൊണ്ടും

കേദാർ3 കൂടാരങ്ങളിൽ പാർക്കുന്നതുകൊണ്ടും എനിക്ക് അയ്യോ കഷ്ടം!

6സമാധാനദ്വേഷിയോടുകൂടി വസിക്കുന്നത്

എനിക്ക് മതിയായി.

7ഞാൻ സമാധാനപ്രിയനാകുന്നു;

എന്നാൽ ഞാൻ സംസാരിക്കുമ്പോൾ അവർ കലശൽ തുടങ്ങുന്നു.