Sabo Talango’e 1

1Ty Sabo talango’ i Selomò.

Kokoa’e

2Apoho hañorok’ahy re

amo orok’ am-palie’eo!

Fa soa te amo divaio ty fikokoa’o.

3Mandrifondrifoñe

o mena-pañosora’oo,

rano máñitse nailiñe ty tahina’o,

izay ty ikokoa’ o somondrarao azo.

4Kozozoto iraho, antao halisa;

Nandese’ i mpanjakay mb’añ’efets’

efen’anjomba’e ao.

Rañe’eo

Hañonjoñ’ azo zahay naho hirebeke, honjone’ay ambone’ ty hamañin-divay.

An-kahiti’e ty fikokoa’ iareo azo.

Kokoa’e

5Mainte iraho, naho ginoke,

ry anak’ampela’ Ierosalaimeo,

manahake o kiboho’ i Kedareo,

hambañe amo lamba’ fañefe’ i Selomoo.

6Ko mangarek’ ahy ami’ty hamaintelèñeko,

ie nisamb’ ahy i àndroy.

Niboseha’ o ana-dahin-drenekoo iraho,

nampañalahala’ iareo

o tanem-baheo,

vaho namoeako ka

i tanem-bahekoy!

7Saontsio amako,

ry fikokoam-piaiko,

Aia ty fiandraza’o,

i fampandrea’ o an’tsingilingilieñey?

Amy te ino ty hitsikombeako ty mpisaron’ tarehe marine’ o lia-rain-drañe’oo?

Rañe’eo

8Aa naho tsy fohi’o,

ry hatsomerentseren’ampelao,

le tinoño ty lia’ i lia-raikey

vaho andrazo marine’ o kibohom-

piarakeo o vik’ose’oo.

Mpikoko

9Ry kokoako, Ampanahafeko ami’ty renen-tsoavala amo sarete’ i Paròo,

10Fanjaka o fifi’oo ty amo hangehangeo,

ty vozo’o miravake vatosoa.

11Hitsenea’ay bangem-bolamena

nihamineñe volafoty.

Kokoa’e

12Ie nandre an-tihi’e eo i mpanjakay,

ro nañakara’ i ramekoy i hañi’ey.

13Hoe sandrifen-drame mandre añivo’

o nonokoo i kokoakoy.

14Fitoborom-boñen-tseva

an-tanem-balobo’ i En-Gedy ao

i kokoakoy.

Mpikoko

15Akore ty hamozohozo’o, o kokoakoo,

Hen! ty hatrenotreno’o;

deho o maso’oo.

Kokoa’e

16Toe tsomerentseren-drehe kokoakoo, vata’e miehañe;

maindoñe ty fandrean-tikañe;

17Mendoraveñe o fahan-trañon-tikañeo,

akao o tapena’eo.